Penahbisan Pertua & Diaken (Majelis Jemaat) GBKP "Perminggun" Johor Malaysia

Penahbisan Pertua & Diaken (Majelis Jemaat) GBKP "Perminggun" Johor Malaysia

Ibadah Minggu GBKP Johor Malaysia Tgl. 10 Maret 2024 yang dilaksanakan di Tamil Methodist Church (TAC) Kulai Johor yang dilayani Pdt. Sabar S. Brahmana, S.Th.,MA (Ketua GBKP Klasis Kepulauan Riau) merupakan ibadah dimana untuk pertama kali dilaksanakan penahbisan satu orang Pertua (Pt. Damaiyanti Br. Tarigan) dan satu orang Diaken (Dk. Keristi Br. Ginting) periode 2019-2024. Ibadah yang juga di hadiri sekretaris GBKP Klasis Kepri (Pdt. Anry, S.Th) juga dilaksanakan acara peneguhan sidi/angkat sidi kepada Risnawati br. Sembiring dan "ilakoken mulihi" Emylia Br. Ginting. 

Kiranya dengan adanya majelis jemaat di "Perminggun" GBKP Johor,  GBKP semakin bertumbuh menjadi berkat dalam kehadirannya bagi dunia ini.

Read more >>

[+/-] Ringkasan...

SERPON BAHAN PERPULUNGEN JABU-JABU (PJJ) TGL. 5-11 NOVEMBER 2023

SERMON PJJ TGL. 5-11 NOVEMBER 2023

TEKS    : 2 TIMOTIUS 1:11-14

TEMA  : ERBERITA, ERKINITIKEN RAS ERKEKELENGEN

Catatan:

1. Bagin teksta ibas Pjj Minggu enda eme surat Paulus man Timotious bagin sipeduaken. Surat enda itulis sekitar tahun 67M.
2. Endame surat terakhir Paulus. Paksa ia nulis surat e, Kaisar Nero si sangana erkuasa berusaha uga maka ngadi perkembangen kekristenen I Roma alu penganiayan si kejam nandangi kalak si enggo tek man Yesus Kristus. Ibas paksa e sekali nari Paulus jadi tahanen Negara I Roma (2 Tim 1:16). Ia lit ibas kiniseran selaku penjahat biasa (2 Tim2:9), ia pe kesepian erkiteken itadingken mbue teman-temanna (2 Tim 1:15), janah isadarina enggo deher kematenna (2 Tim 4:6-8,18).
3. Tujun surat enda eme mereken persinget ras motivasi man Timotius ibas kengudanna, ibas sifatna si pemela gelah tetap nteguh ncikep Injil, meritaken Kata Dibata dingen megenggeng ibas kiniseran ras tetap setia ndalanken tugas si ipercayaken man bana. Enda isehken Paulus erkiteken isadarina maka keadaan si man hadapen Timotius labo gampang, lit kemungkinen terjadi penganiayan si mbelin sirehna idarat kereja bagepe litna guru-guru palsu ibas gereja nari.
4. Ibas teks Pjj Paulus mereken kesaksin uga ia enggo iangkat Dibata jadi rasul dingen guru lako pembarken berita simeriah. Janah pengangkaten enda sada sisi tuhu-tuhu mulia tapi sisi sideban erkiteken pengangkaten enda me maka mbue ngenanami kiniseran. Tapi nina Paulus, tetap nge aku tek, sabab kutandai nge ise penalemenku (singangkat aku e). Tek aku ia ngasup ngkawali aku bagepe kerina kalak si enggo tek she kuwari pendungi.
5. Kenca isehken Paulus kata enda ayat 11-12, emaka ipindo Paulus man Timotius ibas ayat 13-14 segelah:

Ncikep kata si enggo iajarkenna e alu nteguh. Ertina kai si iajarken Paulus man Timotius eme ajaren sipayo emaka ula pernah iraguken. Enda penting gelah ula terpengarus ajaren guru-guru palsu ibas gereja. Adi ibas jamanta genduari lebih parah ka sebab mbue pengajaren-pengajaren si bertebaren arah dunia maya, emaka man banta ngawan perpulungen refrensita eme Alkitab, konfesi GBKP ras pengajaren  si isehken pendeta si itempatken (pendeta e enggo ndalani proses sekolah teologia, vikaris ibas GBKP).

Keteladanen Paulus gelah jadi usihen si man ikuten. Kai kin keteladanen Paulus? Kai sinianggapna ndube untung genduari kenca itandaina Kristus Yesus ianggapna e kerina desken sampah (Bd. Filipi 3:7-8). E me sebabna tetap ia megenggeng, tetap ia sitia ibas ngalaken kiniseran teridah maka Ibas pencara pe ia tetap ermeriah ukur (Filipi 4:4).

Tetap ibas kiniteken ras kekelengen ibas persadan ras Kristus Yesus. Kiniteken e tegak lurus ras kekelengen. Sabab adi la bage tentu labo tuhu erkiniteken.

Jaga erta-erta simehuli si enggo iendesken Dibata arah kuasa Kesah Sibadia. Ijenda Paulus ngingetken Timotius segelah jaga kiniteken si enggo iwarisken ninina Lois ras nandena Eunike (2 Timotius 1:5) eme erta simehuli si enggo iendesken Dibata arah kuasa Kesah Sibadia. Paulus pe ngingetken gelah Timotius la ngelakoken kesalahen fatal bagi sinilakoken Figelus ras Hermogenes (ayat 15). Emaka manbanta pe ula sempat siambekken erta simehuli e ntah pe salih kiniteken erkiteken latahan ngalaken ancamen kiniseran ntah godaan kebayaken. Inget erta doni enda ras kini kehaganna sementara kap tapi erta simehuli si enggo ipercayaken Dibata man banta eme tahan rasalalap janah e tuhu-tuhu layak ipertahanken.

• 6. Temata eme Erberita, Erkiniteken ras erkekelengen. Tema enda ngingetken kita segelah ula pernah kita lupa maka kita enggo kalak sierkiniteken ibas Yesus Kristus berarti enggo lit erta simehuli ibas kita siharus sipertahanken ras pe si bagiken ka man kalak sideban segeah ibas ia pe lit erta simehuli e arah erberita simeriah baik secara verbal ntah la verbal, baik arah kata sinebelasken bagepa ara terbahanenta si palasna kekelengen. Sabab temata enda erkawiten, tegak lurus ia. Kernca enggo erkiniteken, la banci lang arus erberita simeriah janah teridah maka kegeluhenta dem keleng ate, labo saja man temanta si mehuli man banta tapi pe bagi nina Tuhan Yesus kelengi imbang-imbangta (Matius 5:43-44). Adi bage payo enggo lit ras sipertahanken erta simehuli e ibas kita. Amin.

Pdt. Sabar S. Brahmana

Read more >>

[+/-] Ringkasan...

Ibadah Perdana GBKP "Perminggun" Trans Barelang Runggun GBKP Batu Aji, Tanggal 14 Agustus 2022

Kebaktian Perdana GBKP Perminggun Trans Barelang Runggun GBKP Batu Aji.  Pada tanggal 14 Agustus 2022 telah dilaksanakan ibadah Minggu perdana GBKP Barelang Runggun GBKP Batu Aji yang berlokasi belakang Perumahan Rexvin Boulevard/Belakang Lapas Barelang. Ibadah yang dipimpin Liturgis Dk. Nd. Ean Br. Ginting, pelayan Firman Pdt. Sabar S. Brahmana, S.Th., MA (Ketua GBKP Klasis Kepri) dengan Nats Khotbah Kisah Para Rasul 8:4-13, tema “Bersehati dalam Pengajaran” dimulai pada pukul 09.00-11.00 dan jemaat yang hadir 86 orang, kolekte Rp. 1.257.000,-

Ibadah perdana ini juga dihadiri BPMR GBKP Batu Aji, Pt. Rejeki Barus (Ketua BPMR), Dk. Danial Tarigan (Sekretaris BPMR),  Pt. Bp. Dion Tarigan (Kabid Koinonia), Dk. Nd. Cana Br. Ginting (Bendahara) dan sejumlah majelis jemaat (Pt/Dk). 

Gereja yang dibangun di atas tanah 300 M2 masih bersifat semi permanen, dibangun diatas bukit sehingga jemaat disuguhi pemandangan yang indah, yang membuat suasana hati semakin bersukacita. Walaupun jalan menuju lokasi gereja ini belum di aspal namun dapat dilalui kenderaan roda 4.

Dengan terlaksananya ibadah perdana ini, boleh dikatakan apa yang menjadi harapan sejak adanya wacana GBKP di Kepri menjadi satu Klasis (dan pada bulan Maret 2017 telah disahkan menjadi satu klasis yang definitif), GBKP Runggun Batu Aji yang telah memiliki jumlah anggota lebih 400 KK agar dimekarkan menjadi 2 gereja telah terwujud, walaupun keberadan gereja ini masih membutuhkan perjuangan, namun kita menyakini bahwa ketika sudah dimulai maka Allah Sang Pemilik Gereja akan memberkati sehingga semua proses yang masih membutuhkan perjuangan tersebut dapat berjalan sebagaimana yang diharapkan.

Read more >>

[+/-] Ringkasan...

PERPULUNGEN JABU-JABU (PJJ) TGL. 5-11 JUNI 2022; TEKS: KEJADIAN 1:31; 2:1-4

PJ TANGGAL 05-11 JUNI 2021

 

KERINA TINEPA DIBATA MEHULI

Kejadin 1:31; 2:1-4

(GBKP Tahun 2022: kelestarian Alam/Hari Lingkungen Hidup)

 

Cataten

Tema: kerina tinepa Dibata mehuli. Tema enda jadi kesimpulen si isehken penulis kitab Kejadin, janah arah pernyatan enda pe lit ije tanggungjawab manusia selaku tinepa Dibata si menam seri ras Dibata gelah la saja mengagumi tapi pe bagi si isingetken ibas Kejadin 2:15 eme guna ngusahai ras njagaisa ertina lit tanggung jawab njagaisa gelah predikat “mehuli” e tetap terjaga. Mehuli ijenda tentuna labo saja adi kin erbahan bangunen rumah rapi bekasna, kokoh ras serasi, tapi mehuli ijenda banci pe ipahami maka tinepa Dibata e lit keterhubungen, lit keseimbangen, saling melengkapi ras pe ije lit ketergantungen.” Manusia ras tinepa sideban tuhu mehuli ras harmonis. Secara khusus hubungen manusia ras Dibata.

Tapi uga genduari? Siidah denga nge maka tinepa Dibata e tuhu-tuhu mehuli? Banci saja ragu kita jababsa. Sabab turah penungkunen ibas pusuhta: engkai maka doni genduari enda tempa la nai aman? Mbue kalak lit ibas aru ate, mbiar she maka lit deba perlu penjaga kemamanen. Engkai maka bage? Ise nge si erbahansa ras ise nge si ertanggungjawab?

Bagin kata Dibata Kejadin 1:31a ras Kejadin 2:1-4 mpersingeti kita uga ndube Dibata jadiken sinasa lit alu predikat “sungguh amat baik”. Jenari ikataken pe maka ibas wari si pepituken enggo idungi Dibata dahinNa janah ipasu-pasuna pe wari si pepituken e. Bagin kata Dibata enda ngingetken kita paling tidak lit 2 hal eme (1) Doni ras kerina isina eme tinepa Dibata si tuhu-tuhu mehuli gelah manusia ras kerina tinepana lit ibas hubungen si harmonis. Pemahamen enda arusna lit upaya semehuli ka ibas manusia selaku tinepa Dibata si iberena mandate lako ngusai ras njagai gelah mpertahanken keharmonisen e. (2) Wari si pepituken ija Dibata enggo dungi dahinNa, ipasu-pasuna wari si pepituken e janah pe iserapken Dibata jadi wari sibadia eme sababna kalak israel setiap wari pepituken ngadi ia erdahin ras ipakena wari e lako ersembah man Dibata sabab wari e me si iserapken Dibata jadi wari sibadia ras ipasu-pasuNa. Arah pemahamen end ape arusna manusia ibas wari pepituken e labo terjeng ersembah man Dibata, tapi mereken energy si mbaru lako nehken tanggungjwabna jagai ras pekena-kena doni tinepa Dibata gelah tetap harmonis.

Menaken tanggal 5 Juni 1972 setiap tahunna iperingati hari lingkungen hidup sedunia. Tentu lahirna hari lingkungen hidup sedunia la terlepas ibas pemahamen maka doni inganta tading si enggo itepa Dibata alu mehuli gelah tetap terjaga kelestarianna. Sabab adi la terjaga kelestarianna tentu e berdampak ku bas kegeluhen kerina tinema Dibata termasuk manausia. Emaka iban me erbage tindaken secara kolektif, rencana global, kesepakaten bersama ibas kerina anggota PBB (Perserikatan bangsa-Bangsa) menaken tahun 1972 I Stockholm ibu kota Swedia.

GBKP ibas tahun enda iban sebage tahun programna eme kreatif merawat lingkungen. Tentuna la terlepas pe ku bas usaha nehi tanggungjawabta selaku manusia tinepa Dibata si ibereken tugas ras tanggunjgjawab “njagai ras ngusahai doni enda” gelah tetap terjaga kelestarianna. Seh ija tugas enda banci sidalanken tentuna lit hubungenna ku bas kinitekenta man Dibata si njadiken si nasa lit e, si itandai kita ibas Yesus Kristus. Emaka Momentum peringeten nusurna Kesah Sibadia ibas tanggal 5 Juni 2022 si erketepaten ras Hari Lingkungen Hidup Sedunia mpersingeti kita maka tandana kesah sibadia e lit ibas kita la saja sitandai Dibata secara payo tetapi pe ngelakoken singena ateNa, janah salah sada singena atena eme nehi tanggungjawabta ikut terlibat gelah terjaga kelestarian doni enda arah kreatif merawat lingkungen.

 

Pdt. S. Brahmana

Read more >>

[+/-] Ringkasan...

PA MAMRE TANGGAL 22-28 MEI 2022; TEKS: 1 RAJA-RAJA 17:10-16; TEMA: MELUMBAR I BAS MASA SULIT

PA MAMRE TANGGAL 22-28 MEI 2022

Melumbar pada masa krisis (beasiswa)

 

Teks         :   1 Raja-raja 17:10-16

T e m a    :   MELUMBAR I BAS MASA SULIT

Teman  “Melumbar I bas masa sulit” eme sada harapen ras harusna kegeluhen kalak si enggo erkiniteken man Tuhan Yesus, amin gia tema enda ibas kinatana la segampang melaskenca.

Engkai maka la gampang? Sabab orat nggeluh si bagenda ngena ate Dibata ras adi ngena ate Dibata tentu labo banna kita kemalun, ibas masa sulit e pe ibere Dibata serpang pulah si erbahansa reh gegehna kita, reh ngasupna kita naksiken kinitekenta kerna Tuhan Yesus Kristus.

Kerna si enda lit kesaksin sada keluarga si bene sepeda motorna. Emaka reh perpulungen kurumahna, kami per eh lako mereken pergegeh. Ibas wari Mingguna sehkenna persembahen pengataken bujurna. Tuhu heran aku paksa si e. Kok bias-bisanya ibas kebenen (masa sulit) shekenna pengataken bujurna man Dibata. Bisana adi sepeda motor bene jarang nge dat mulihi, tapi sada minggu kemudian reh pihak polisi nelponi ia maka sepeda motorna si bene e enggo dat. La e saja si langsung saksiken kami kerna ibas masa sulit pe ngawan perpulungen melumbar mere ras kesimpulenku maka ibas melumbar mere kepeken lit ije pasu-pasu Dibata eme sababna si iblis imbang kebenaren Kata Dibata e la ia senang adi lit anak-anak Tuhan melumbar mere terlebih ibas masa sulit sabab ieteh si iblis ije lit simpar ka pasu-pasu Dibata.

Ibas Teks Kata Dibata 1 Raja-raja 17:10-16 ituriken uga sekalak diberu balu-balu I Sarpat ipasu-pasu Tuhan erkiteken melumbar ia mere man Elia selaku nabi Tuhan. Ituriken ija Elia mindo lau gelah banci ia minem bage pe roti sitek gelah ia man erkiteken tuhu enggo muas ras melihe kal ia. Adi ipahami keadaan sekalak diberu balu-balu e banci ninta nabi Elia mindo man kalak si la tepat, erkiteken ipindona penampat man kalak si susah kal. Ibas ayat 12 ituriken uga kondisi diberu balu-balu e, I bas ia hanya lit sekerauk tepung ras sitik minak ibas botol ras menurut diberu balu-balu e. Man diberu balu-balu e ras sekalak anakna pe la cukup, apai ka ibereken man kalak. Tapi  si terjadi kenca nina Elia ibas ayat 13-14 “Ula mbiar … banci isikapkenndu pangandu, tapi ope denga si e bahan lebe roti si kitik, jenari baba man bangku. Kenca bage ibana banci taksakkenndu man panganndu ras anakndu”. Sabab bage nina Tuhan, Dibata Israel, tepung bas mangkuk la keri-keri, minak bas botol pe la kurang-kurang she kupesusur udan ku taneh enda, bage nina Tuhan”. Luar biasa megi si e tek diberu e, ilakokenna bagi si ikataken Elia janah tuhu kata Dibata ya ras Amin jadi me bagi si ikataken Elia. Tepung ras minak e la keri-keri.

Perlu tole ijelasken maka paksa e enggo ndekah la udan-udan bahken dekahna la udan paksa e eme 3 tahun 6 bulan (bd. Yakobus 5:17). Banci sibayangken uga susahna paksa si e. Janah enda jadi erkiteken ibas masa pemerintahen raja Ahab ras ndeharana Isebel bangsa Israel la nai patuh man Dibata, pengajuk Isebel ndehara raja Ahap  bangsa Israel enggo nembah Dewa Baal ras dewi Asire. Tentu enda la ngena ate Dibata she maka  la nusur udan 3 tahun 6 bulan (Bd. 1 Raja-raja 7:1; Yakobus 5:17).

 Relevansina Kata Dibata

1. Arah kata Dibata enda jadi pelajaren tole man banta: sipemena, segelah ula kita nembah berhala, ula kita menduaken Tuhan bagi bangsa Israel masa raja Ahap she maka iban Dibata lego 3 tahun 6 bulan; sipeduaken, ternyata ibas paksa lego e labo saja kalak si la patuh man Dibata rate mesui ntah lit ibas masa sulit tapi pe kalak si erkiniteken. Bagem ibas paksa pandemic covid 19 kerina nge jelma lit ibas masa sulit, la saja masalah ekonomi tapi pe arus nggeluh ibas kebiasan si mabru si la nai bebas beraktifitas bagi ope covid, tambah si e perasan mbiar, aru ate sabab mbue jelma mate termasuk pe banci saja lit kade-kadeta. Janah masa sulit enda la saja man kalak si la erkiniteken tapi pe man kalak si erkiniteken.
2. Indicator kalak si erkiniteken eme ibas masa sulit pe ngasup denga nampati kalak, ngasup denga ia melumbar mere bagi sekalak diberu balu-balu I Sarpat ibas perikopta, bagepe kesaksin si enggo ndai isehken man banta. Tentuna arah kata Dibata enda, jenda nari ku lebe wari enda ula kita mbir melumbar mere amin gia keadanta ibas masa si sulit. Inget maka ibas melumbar mere lit ije pasu-pasu Dibata. Perdiatekenlah kalak si tutus nehken pengataken bujur bagepe persepuluhen, pasti labo reh musilna ia ntah reh susahna. Tapi tole isingetken maka pasu-pasu Dibata e labo saja secara kuantitas tapi pe secara kualitas. Ertina urak gia pendapatenta tapi ersada arihta itengah jabu, sehat ras mejuah-juah kita, anak-anakta megi ajar ras tutus atena sekolah, si enggo erjabu mehuli perjabunna ras sidebanna. La kin e nge harapenta? Asangken secara kuantitas tuhu tambah pendapatenta tapi dekahen bangger, lalap segangen sora I tengah jabu, anak-anakta pe “gege” la erngadi-ngadi, ras sideban.
3. Mamre Pusat enggo erbahan program beasiswa, Pengurus mamre tingkat Klasis pe deba enggo erbahansa, tentuna enda merandal ras perlu iterusken ras I tingkatken, bagepe Mamre tingkat Klasis ras Runggun si lenga erbahansa mehuli kal adi beasiswa enda jadi program. Terlebih ibas masa sulit erkiteken dampak pandemic covid 19, semangat melumbar mere sue ras temata ngingetken maka salah sada program banci iban arah beasiswa.  

Pdt. S. Brahmana

 

Read more >>

[+/-] Ringkasan...

PEKAN DOA WARI SI PE VII KEN TGL. 4 JUNI 2022 - TEKS YOHANES 14:13-14

PEKAN DOA WARI SI VII KEN

Sabtu, 4 Juni 2022

 

OEGEN        :  Yohanes 14:13-14

T e m a        :  ERTOTO RAS KEGELUHEN

Tema ibas Pekan Doa si terakhir enda eme Ertoto ras kegeluhen. Tema enda lit dua hal si ikawitken eme ertoto ras kegeluhen. Ertina tema enda mpersingeti kita selaku kalak Kristen maka ertoto e arusna selket ras kegeluhen. Tanda kita kalak Kristen eme teridah lit ibas kegeluhenta tutus, kontinu ras konsesten ertoto e (bandingken kegeluhen Daniel). Sabab bagi usur isingetken  maka ertoto e desken erkesah, janah kalak si lanai erkesah tentu la nai lit ibassa kegeluhen. Bagem pentingna ertoto man kalak Kristen.

Tapi perlu pe tole ijelasken arah tema enda eme ertoto si nimaksud tentu labo sekedar ertoto si la mempengaruhi kegeluhen. Sabab lit ka nge kalak si tempa teridah tutus ertoto tapi si kap kegeluhenna labo berubah ras erbuah ntah pe alu kata sideban ketutusenna ertoto tanpa maba dampak si positif nandangi carana nggeluh. Emaka temata ibas pecan doa berngi siterakhir enda ikawitken kerna ertoto ras kegeluhen.

Arah bagin kata Dibata Yohanes 14:13-14 ija enda bagin perikop si iban LAI judulna eme JESUS ME SI NEGU MANUSIA NDAHI BAPA, Yesus mpersingeti ras sekaligus petetap ukur ajar-ajar gelah tetap ukur ibas ernalem man Yesus sabab Yesus me dalanna kempak bapa I surga, bahken ikataken ibas ayat 6 “ise pe la banci ndahi Bapa adi la arah Aku (Yesus)”. Kerna si enda ijelasken Yesus maka Yesus ras Bapa e ersada nge (ayat 10) emaka nina Yesus “adi aku enggo itandaindu BapangKu e pe itandaindu” (ayat 7), “ise si enggo ngidah Aku, enggo idahna pe Bapa e” (ayat 9).

Yesus tole menekanken maka ise saja si tek man Yesus maka ibas kegeluhenna lit kuasa bagi si enggo ibahan Yesus sedekah enda, bahken ibas ayat 12 ikataken maka man kerina kalak si tek man Yesus tuhu ibanna pe terbelinen asangken si ibahan Yesus. Tentuna kai si ikataken Yesus enda terteki, sabab Firman Tuhan ya ras amin. Janah kerna sienda tentuna terjadi arah pemindonta ibas gelar Tuhan Yesus. Enda me si isingetken ibas ogenta ayat 13-14.

Ibas ayat 13-14 ikataken “Maka kai pe pagi ipindondu I bas gelarKu, ku bereken nge, gelah Bapa ipermuliaken arah Anak e.  Ntah kai gia ipindondu I bas gelarku, Kubereken nge”. Ayat enda labo berarti asal si belasken “ibas gelar Tuhan Yesus”  ibas pendungi pertotonta ibereken Dibata nari nge kai saja pe si pindo kita. Labo bage.  Sabab adi bage enggo bali nge pemahamenna ras “mantra”.  Ertoto ibas gelar Yesus berarti kita ertoto sue ras peraten Dibata, emaka adi ertoto pe kita ibas gelar Yesus adi labo guna kemulian Dibata ras sue peratenNa labo lit ertina si belasken pe ibas gelar Yesus e.  Emaka ertoto ras kegeluhen selket kal. Adi kegeluhenta palasna tek man Yesus Kristus maka salah sada tandana eme tutus ertoto, kontinu ras konsisten jenari kai pe sibahan kita, kai pe sinilakoken kita, bahken tujun ras sura-suranta si utama eme guna kemulian Dibata sue ras sura-suraNa maka igenapi me kata Dibata enda “ntah kai gia ipindondu ibas gelarku, kubereken nge”. 

Relevansi kata Dibata man banta

1. Tanda kalak si enggo tek man Yesus Kristus teridah pe arah kegeluhenna situtus ertoto, la saja ertoto guna dirina, keluarga, tapi pe kalak sideban. Kegeluhen si rusur mbiar, aru ate ibas mbue hal banci ikataken erkiteken kurang tutus ertoto si palasna tek man Yesus Kristus.
2. Ertoto ibas gelar Tuhan Yesus labo berarti otomatis kai pe si ipindo kita ibereken Dibata nari nge. Lang. Pertotonta ibegiken ras ibereken Dibata sipindo kita e adi lit ibas kiniteken si payo nandangi Yesus Kristus, janah kalak si enggeluh ibas kiniteken si payo tentuna tujunna nggeluh bagepe sura-surana la lit sideban seyakatan guna mpermuliaken Dibata ras nggeluh sentudu ras peratenNa. Eme sebabna ibas Yohanes 15:7 ikataken “Adi kam tetap ibas Aku janah katangKu tetap nggeluh I bas kam, banci ipindondu kai pe atendu, janah ialokenndu me kai si ipindondu e”.
3. Engkai maka pertotonta la ibegiken ntah la ikabulken Tuhan? Arah kata Dibata si jadi oratenta ibas pekan doa si pe pituken enda enggo mereken jabapenna ija kepeken Pertoton ras kegeluhen arus kepe “tegak lurus” ertina sendalanen eme ija adi kita rajin ras tutus ertoto arusna teridah kegeluhenta reh ngasupna ngukuri ras ndalanken kai singena ate Dibata.
4. Tole guna mereken penjelasen kerna si enda lit sada ilustrasi: sekalak anak ras mesin es krim. Sekalak anak teridah tangis janahna mekpeki sada mesin es kirim alu ngataken pembohong man mesin es krim e. Engkai maka bage erkiteken lit idahna kalak si tempa engkuit/ngetuk mesin es krism e janah otomatis ndarat sada mangkuk es krim ibas mesin e nari. Ngidah si e anak si tangis ndai kepeken merincuh ka ndatken es krim e janah kuitna ras ketuk-ketukna mesin es krim e tapi lalap es krim e la lit ndarat ibas mesin e nari bagi si idahna ndai eme sababna janahna nentemi mesin e, tangis ia ras ikatakenna mesin pembohong. Ngidah si e lit sekalak bapa ndahi anak e janah sungkunna engkai maka anak e tangis ras nentemi mesin es krim e, kenca enggo ijelasken anak e, reh nina sekalak bapa ndai labo bage carana gelah ndarat es krim ibas mesin e nari, tapi arus lebe imasukken sen ku bas lubang silit kenca si eme maka ndarat es krim e nina. Kenca ilakoken anak e bagi si ikataken sekalak bapa ndai mis tuhu ndarat sada mangkok es krim.  Kai maknana ilustrasi enda sehubungen ras ertoto man Dibata gelah sialoken kai sipindo kita? Dibata labo erbual, kata si ikatakenNa tuhu bage. Saja ngenca megati carata salah ibas mindo man Dibata, siakap alu ertoto ibas gelar Tuhan Yesus kai sipindo kita e iberekenNa, kepeken si benar eme siendesken geluhta man Dibata (bd Yohanes 15:7) maka iberekenna kai sipindo man baNa.

 

Pdt. S. Brahmana

Read more >>

[+/-] Ringkasan...

PA MORIA TANGGAL 22-28 MEI 2022 - TEKS 1 KORINTUS 7:10-11

PA MORIA TANGGAL 22-28 MEI 2022

Siman Ogen:   1 Korinti 7:10-11

T e m a:          

NJAGA KINIERSADAN PERJABUN

Tema enda ngingetken gelah kerina kalak si enggo erjabu njaga kiniersadan perjabun. Kata ersada (yada) berrarti la nai lit si terbuni, kerina terbuka sada nandangi sidebanna. Perjabun dua jadi sada labo berarti otomatis perjabun e bagi ukur nari nge eme sababna tema enda lit unsur perjuangen “njaga” berarti pe lit upaya gelah kai si ipersadaken Dibata tetap nteguh persadan I bas perjabun e. Ngkai maka lit unsur perjuangen? Sabab masing-masing perbulangen ras ndehara selaku manusia lit nge kekurangen ras kelebihenna, si pasti waktu erbunuh ukur erjabu tentu mbelin arapen maka perjabun e “langgeng”, perjabun e pagi lit kiniersadan si nteguh desken perik sidua-dua teridah sada teridah duana ntah kerbo sada nioga kuja sada kuje duana. Tapi kinatana? Eme sababna lit ije perjuangen, perjuangen tanpa leleh sabab kiniersadan ibas jabu eme pendilo Dibata man setiap pasangen perjabun. Kegeluhen perjabun igambarken pe desken hubungen Kristus ras perpulungen (bd. Efesus 5:29)

 

Menurut cataten pemerintah maka ibas masa covid 19 angka perceraian naik 5 persen[1]. Tuhu mbue sababna, ibas si mbue e masalah ekonomi hal utama penyebabna. Emaka lit singatakenca pandemic covid 19 eme badai paling sempurna untuk menguji pasangen suami istri, tetap setia ntah lang.

Bagin kata Dibata si jadi ogen ibas PA Moria enda eme nasehat rasul Paulus man perpulungen Korinti. Judul si iban LAI perikop enda eme Kerna Perjabun. Ngerana kerna perpulungen berarti pe ngerana kerna perjabun sabab perpulungen e terdiri dari pribadi-pribadi baik dilaki bagepe diberu ija kenca dewasa ngelakoken perjabun si merupaken bagin anggota perpulungen emaka lit singatakenca pe keluarga Kristen eme gereje kecil itengah-tengah masyarakat. Erjabu eme sada hal si sangat alamiah sabab tangtangna nai pe Dibata njadiken dilaki kenca si e diberu guna jadi teman nggeluh si cocok (sepadan). Berarti tantangna nari Dibata enggo merancang perjabun e. Saja ngenca sehubungen ras pemahamen Paulus maka kerehen Tuhan Yesus si peduakaliken la nai ndekah maka ulin la erjabu bagi Paulus gelah la lit si erbahan ertupang ukur ibas meritaken berita si meriah. Saja ngenca Paulus pe sadar maka labo kerina jelma ngaloken pendilo Dibata bagi dirina emaka  ibas ayat 9 ikatakenna “tapi adi kam la ngasup, erjabulah. Ulin erjabu asangken gara usur kerincuhenndu”.

Saja ngenca adi enggo erbunuh ukur erjabu maka la nai lit pilihen sideban selain tetap setia nandangi pasangenna, la lit kesirangen pala kematen. Sabab bagi ikataken Matius 19: 6 “Dage si enggo ipersadaken Dibata la banci isirangken manusia”. Enda me pe si mulihi itekanken Paulus alu ngataken ibas ayat 10-11 “Man kalak si enggo erjabu kuperentahken-enda labo perentahku, tapi perentah Tuhan: sekalak ndehara la banci nirangken perbulangenna (bd. Matius 5:32, 19:9; Markus 10:11-12; Lukas 16:18). …. Bagepe sekalak perpulangen la banci ngulihken ndeharana. Adi la banci lang terjadi perceraian menurut Paulus ula nai erjabu mulihi ras sideban, kecuali mulihken ia man pasangenna ndube.

Relevansina ras Moria

• Lit singatakenca maka adi perbulangen e lanai bagi perbulangen ibas jabu, perjabun e banci denga bertahan bahken mbue si kedungenna endingna jadi keluarga si mehuli erkiteken perbulangen ndai robah jadi perbulangen si setia. Tapi adi pernanden ntah ndehara e la nai bagi ndehara perdalanna sontar nari nge jabu e. Pendapat enda ngatakensa uga pentingna posisi sekalak ndehara ntah pernanden ibas sada jabu. Emaka man moria, ndehara ntah pernanden bagem pentingna peranndu ibas erbahan tetap paguh ntah lang perjabun/rumah tangga e. Langna pe ibas kejadin 2:18 diberu ijadiken guna penolong yang sepadan man perbulangenna berarti peran ntah posisi ndehara tuhu sangat penting. Emaka labo salah adi lit singatakenca ka di balik kesuksesan suami ada istri yang cakap di belakangnya.
• Erkiteken perjabun man kalak Kristen perjabun seumur hidup, janah perjabun e tujunna gelah reh ngasupna mpermuliaken Dibata si mereken kegeluhen ras keselamaten man banta kerina, emaka man Moria tetaplah berjuang uga njaga kiniersadan jabu. Adi kune mberat kal iakapndu ibas perjuangen e ingetlah maka ngasup nge akap dibata ndube maka perbulangenndu e iberekenna jadi perpulangendu. Teklah maka Dibata si enggo persadaken kam ngasup pegegehi ras mereken kengasupen menang ibas perjuangen e.
• Jenari ibas jodoh anakta si enggo banci jabuken bana, ula siban sukat-sukat doni si jadi hal utama nentuken  kreteria jadoh anakta e. Sabab lit kesaksin maka lit orang tua si perlebena sungkunna kerna calon kela ntah permenna eme ija tading orang tuana, piga ia sembuyak, kai sekolahna ras pendahinna, ras sidebanna, labo perlebe isungkunna apakah calon kela ntah permenna e kalak situtus erkiniteken ntah lang.

 

Pdt. S. Brahmana

---

[1] https://ejournal.kemsos.go.id/index.php/Sosioinforma/article/view/2417

Read more >>

[+/-] Ringkasan...