KHOTBAH MINGGU 3 OKTOBER 2010
(Kebaktian Minggu ras pengumpulen dana GBKP Klender)
---------------------------------------------------------------------------
Introitus:
Tapi pe kerna kam: Tep-tep perbulangen arus engkelengi ndeharana bagi ia engkelengi dirina, janah tep-tep ndehara arus mehamat man perbulangenna (Efesus 5:33).
Pengogen: Maleaki 2:13-16; Khotbah: Efesus 5:22-33
Thema:
Kelengi ndehara, hormati perbulangen
(“keluarga siharmonis”)
Renungen
Kerina keluarga tentu ersura-sura keluargana, keluarga si harmonis, keluarga bahagia. Kuakap lano lit kalak sierjabu ngarapken jabuna pagi la bahagia, la harmonis. Cuba sungkuni anakta permata, kuakap kerina nge ia ersura-sura adi erjabu pagi, jabuna jabu si harmonis, jabu siberbahagia. Emaka ula mamang ateta adi lit anakta melawen ia erjabu. Deba lalap la erjabu, she panglatu. Labo atena la erjabu, tapi lenga jumpa sicocok akapna. Pengakapna, cocok akapna eme si erbahansa bagi jabuna harmonis, berbahagia.
Ugakin jabu siharmonis, jabu si berbahagia? Mbue jababna, mbue definisi kerna si enda.
1) Menurut Mahfudli (1995: 48): Keluarga harmonis adalah hidup bahagia didalam ikatan cinta, kasih suami istir yang didasari oleh kerelaan, keselarasan hidup dalam ketenangan lahir dan batin karena merasa cukup puas atas segala sesuatu yang ada[1].
2) Singgih D. Gunawan (1995 : 20), menyatakan bahwa :
Keluarga bahagia adalah bila mana seluruh anggota kelaurga merasa bahagia yang ditandai oleh berkurangnya ketenggangan kekacauan dan puas terhadap seluruh keadaan dan keberadaan dirinya.
3) Dirjen Bimas Hindu dan Buddha, 2001: 8, keluarga bahagia adalah keluarga yang dibina atas perkawinan yang sah, mampu memenuhi hajat spiritual dan material secara layak dan seimbang, diliputi suasana kasih sayang antara anggota keluarga dan lingkungannya dengan selaras, serasi, saling setia, serta mampu mengamalkan, menghayati, dan memperdalam nilai-nilai sraddha dan bhakti[2].
Arah definisi enda banci ikataken keluarga harimonis eme keluarga bahagia siitandai nggeluh (1) tercukupi kebutuhen spiritual bagepe material secara layak ras seimbang, (2) nggeluh alu damai ndauh ibas perpecahen ntah kehancuran.
Uga enggo me jabuta bage? Masing-masing kita jababsa. Sijelas kebahagiaan ibas rumahtangga labo terjadi bage-bage saja. Harus iperjuangken. Arus lit usaha si serius sinilakoken kerina komponen jabu. Emaka iperluken sasatuan hati. Adi nina Paulus ibas Filipi 2:2 “ersada min arihndu, sikeleng-kelengen min kam, ersada min geluhndu dingen ersada ukurndu”. Kerna nasehat Paulus enda, tuhu gampang mbelaskenca, ntabeh man beginken, tapi mesera ndalankenca. Emaka solusina ula siandalken gegehta, tapi gegeh Dibata. Emaka tips ibereken pemazmur ibas Masmur 128 eme erkemalengen man Dibata.
Ugakin kalak sierkemalangen man Dibata? Batang belinna eme nggeluh ngikutken peraten Dibata. Kai kin peraten Dibata? Adi si perdiateken bahan khotbahata eme (1) Ndehara patuh man perbulangen; (2) perbulangen ngkelengi ndehara; (3) anak-anak pehagana orang tuana (Efesus 6:2). Adi si ikutken kata Dibata enda, dijamin keluargata harmonis, bahagia. Adi la kam tek cubaken.
Tambah si e, adi ngerana kita terdauhen kerna erkemalangen man Dibata, adi sinin kegeluhen tokoh-tokoh ibas Alkitab eme teridah kal kepatuhenna ersembah ras nehken persembahen. Sinin kegeluhen Abraham, ija ia ngadi, ija ia tading mis banna ingan ersembah jenari isehkenna persembahenna man Dibata. Kai ulihna? Abraham labo reh musilna amin gia ia kalak pertandang I negeri kalak Kanan. Ikataken ibas Kejadin 13:2 Abraham kalak sibayak namura. Bagepe adi sioge ibas Mazmur 112:1-3, ije pe ikataken maka kalak sierkemalangen man Tuhan, siermeriah ukur ngikutken perentah-perentahNa ipasu-pasu Tuhan. Isi jabuna jadi kalak bayak namura”. Enda me janji Tuhan man kalak singgeluh ngikutken peratenna.
Lit sada cerita sekalak anak perana, situtuskal ersembah man Dibata ras bagepe nehken persembahenna man Dibata. Anak perana enda kalak batak. Mergana la isingetken. Tapi mungkin mergana silalahi/sembiring. Ceritana bagenda. Erlajang ia ku Jakarta. La dekah sa, alu modal pendidiken serjana erdahin ia ibas sada persahaen. Si menarik eme setiap ia gajin, mis sisihkenna deba jadi persembahen man gereja, deba ikirimna man orang tuana ikuta. Bagem terus-menerus. Ibas sada paksa, perusahaen inganna erdahin tutup/bangkrut erkiteken krisis ekonomi global. Kerina pegawaina ipengadi ras ndatken piga-piga bulan gaji sebagai pesangon. Amin gia bulan sireh lanai dat gaji, perbahan ngadi erdahin, anak perana enda bagi biasana sen sinialokenna isisihkenna ka sada bagin man gereja, sada bagin nari ikirimkenna ku kuta man orang tua. Ngaloken kirimen anakna si lain asa biasana eme reh buena, orang tuana kuta she kal riahna ukurna, naik nge jabaten anakku atena. Emaka ibas PJJ ipindona sintua notoken anakna sue ras isi surat ikirimken anakna radu ras ngkirimken sen e. Isi surat e eme “Nunga memble au nuae” (enggo memble aku gundari) totoken aku. Emaka sue ras pemindon e, itotoken sintua e me anak ndai. Nina ibas totona, “mekuah atendu anak sianu enda Tuhan, pasu-pasundulah ia gelah reh memblena”. La kepe iteh bapa anak enda, bagepe sintua sinotoken e erti memble. Emaka ipindona gelah anak e tambah memble. Arti “nunga memble au nuae” eme gundari aku enggo memble/hancur”. Bagem turi-turin enda. Payonge reh memblena anak e sue ras pertoton sintua e? Lang. Cerita selanjurna eme, la ndekah kenca ia ngadi erdahin, datca ka dahin si terulin ras reh galangna gajina. Engkai maka bage? Kuakap, enggo siteh jababna. Perban anak enda setia ersembah man Dibata, bagepe la biar-biaren nehken persembahenna amin gia ia PHK.
Bagem, sendah kenca dung kebaktin enda iban me pengumpulen dana guna ngelitken ingan ersembah/gereja GBKP Runggun Klender. Siteh maka enggo me ndube lit taneh ras gereja GBKP Klender enda, tapi uga ban terkena penanggulangen banjir kanal Timur. Enggo menda iupayaken segelah dat ganti rugi taneh ras bangunen. Tapi she ngayak genduari ganti rugi bangunen denga idat. Sementara ingan ersembah harus lit. Emaka enggo isewa ruko. Janah lit soniarap ibere Dibata dalan, ija ruko enda banci itukur alu erga she bulan Desember 2010 enda 1,5 miliar, adi lewat bulan desember lanai dat erga bage. Emaka mari ras-ras sitotoken ras muat bagin ibas pengumpulen dana enda segelah GBKP Klender lit inganna ersembah man Dibata secara permanen. Siingetlah maka salah sada singena ate Dibata silakoken eme nehken persembahen guna ngelitken ingan ersembah. Ula kita mbiar, labo ibahan Dibata kalak si ngelakoken singena atena tambah musil ntah pe erserana babanna nggeluh. Kerna sienda, lit kesaksin si luar biasa kuakap. Lit anggota perpulungen, bene sepeda motorna. Reh kami kurumah ertoto rassa. Adi la salah kejadin e wari rabu. Sabtuna isiruhna anakna ku gereja, ku sekretariat nehken persembahen gelah icatat. Terus terang, aku pe sengget paksa e. Enda hal luar biasa ateku. Aneh tapi nyata, la masuk akal tapi bage kenyataanna, la ndekah, mungkin kurang lebih sada minggu sepeda motor idat polisi janah mulihken man keluarga enda. Maksudku nuriken kesaksin enda, ngatakenca maka lit kepe mujizat arah nehken persembahen. Emaka ula mbiar, ula aru ateta nehken persembahen. Siberekenlah siterbaik ibas pepulung dana enda.
Jenari man bandu, BP Runggun Bekasi-Galaxi si terpilih jadi BP Runggunperiode 2009 s/d 2014, dalankenlah tugas tanggungjawab si ibereken man bandu. Ula asamken gegehndu saja, la kap serta e. Tapi asamken gegeh Dibata si enggo milih kam. Alu bage nge maka berhasil kam. Sebab kata Dibata ibas Yohanes 15:5 jelas kap ikataken, “adi la kin ras Aku labo kam ngasup erbahan kai pe, nina Tuhan Yesus. Amin.
Jatiwaringin, 3 Oktober 2010
Pdt.S.Brahmana
--------------------------------------
[1]http://lusiana-solita.blogspot.com/2010/04/pengaruh-keluarga-broken-home-terhadap.html
[2]http://www.cyberdharma.net/isudarma/index.php/susila/21-membentuk-keluarga-harmonis-dan-bahagia.html
0 komentar:
Post a Comment