Khotbah Kejadian 6:8-18, Pekan Penatalayanen Wari I (Minggu, 22 Januari 2012)

Introitus:

Meriahlah ateta sabap Ia kap si mada kita, asa kalak si nembah Ia meriahlah ukurna (Mazmur 105:3).

Ogen: Mazmur 105:1-11; Khotbah: Kejadin 6:8-18

Thema : SOLIDARITAS IBAS JABU

Perlebe
Tahun enda, prioritas Program GBKP eme “Solidaritas Internal GBKP”. Adi ngerana kerna Solidaritas Internal GBKP maka salah sada bagin eme Solidaritas ibas Jabu. Kai kin Solidaritas e? Situhuna Solidaritas labo istilah ibas Alkitab, bagepe labo istilah si ipake Teologi Kristen, tapi dasar ras nilai dasar geraken buruh Internasional[1]. Amin gia bage, definisi Solidaritas[2]: “perasan bersatu (senasib, sehina semalu), setia kawan eme nilai nggeluh siniajarken Alkitab. Ola ipahami istilah Solidaritas enda ibas kontek Solidaritas Buruh, ija menurut Joas Adiprasetya[3] kata enda mekelek nekanken memposisiken “kita” melawan “mereka”, tapi ibas erti definisi e secara global (umum). Alu bage, banci pe ipahami “pembebasen” sinilakoken Dibata arah Yesus Kristus nandangi manusia silit iteruh kuasa dosa eme bentuk Soldaritas Dibata kempak tinepaNa, kempak manusia. Alu bage dage, kita ersolidaritas erkiteken solidaritas Dibata ibas Yesus Kristus ndilo kita ersolider nandangi temanta manusia, terkhusus nandangi isi jabu.

Pendalamen Nats
Kejadin 6:8-18 eme bagin turi-turin kerna Nuah ras keluargana si iselamatken Dibata ibas banjir simbelin nari. Turi-turin si Nuah enda situhuna mulai ibas pasal 6-9. La ituriken secara rinci kerna kegeluhen jabu Nuah. Ibas ayat 8 ikataken Nuah ngena ate Tuhan ras ibas ayat 9 ikataken lit 3 anakna eme Sem, Ham, Japet ras ibas jamanna Nuah ngenca si mehuli, janah la lit kesalahenna. Ia erdalan I bas dalan Dibat. Penilaian Dibata kerna Nuah labo “mata-matan”, tapi memang kin situhuna bage. Enda teruji arah kepatuhen Nuah ngelakoken kasakai si isuruh Dibata, eme erbahan sada kapal sigalang. La ia jungut-jungut, bagepe ndehara ras anak-anakna rikut 3 kalak permenna la komplain, la nganggap Nuah enggo lasehsa bagi pengakap anak kuta. Tapi ersada arihna kerina, masing-masing ngelakoken peranna she maka kapal si gedangna 150 meter, belangna 25 meter ras ganjangna 15 meter dung ibanna. Sada pendahin si membutuhken kerja keras, konsentrasi, fokus ras megenggeng. Teridah Nuah ras isi jabuna jadi team work si solit. Engkai maka banci bage? Kuakap enda me si perlu ndatken perhatinta. Jenari sihubungken ras jabunta sekalak-sekalak. Enggo me jabunta sepengodak sepengole ibas tutus ku gereja? Muat bagin ibas mendukung dahin-dahin gereja? Ras banci denga tole itambahi penunkunen.

Ponter Aplikasi
(1) Jabu Nuah banci jadi team work sisolit, sepengodak sepengole ngelakoken pedah Tuhan, adi kuakap labo jadi bage-bage saja, tapi mbue itentuken sikap Nuah ras ndeharana ibas uga ia pebelin belin anakna e. Buah ndabuh la ndauh ibas batangna nari. Kuan-kuan enda payo, khususna ibas kontek keluarga Nuah. Keteladanen Nuah ras ndeharana nggeluh erdalan ibas dalan Dibata kepeken mbelin mpengaruhi kegeluhen anak-anak Nuah, bagepe permenna. Si luar biasana eme, anak-anak Nuah la terkontaminasi kejahaten simekelek isekelewetna.

(2) Bentuk solidaritas ibas jabu eme memfungsiken peran masing-masing anggota keluarga erpalasken malang man Dibata. Peran enda banci ilakoken adi lit Solidaritas sada ras sidebanna. Kata sideban Solidaritas eme “kam kap aku, aku kap kam”, ertina lit penggejapen keleng ate, kepate, ras rusaha erbahansa sada ras didebanna ermalem ate. Ntahpe alu kata sidaban “latih temanta latihta siakap”, malem ate temanta malemta ka siakap”, ras seterusna. Kerna sienda banci pe sibandingken kai sinisingetken Matius 7:12 “Bahanlah man kalak si deban bagi ngena atendu ibahanna man bandu. Enda me ertina Undang-undang si isuratken Musa ras kai si enggo isuratken nabi-nabi”.

(3) Ngena ate Dibata adi kita ersolidaritas. Terlebih ersolidaritas ibas jabu mbelin kap gunana. La saja kita nggo ndalanken singena ate Dibata, tapi pe kita mpersiapken generasi penerus gereja, bangsa ras negara eme anak-anakta si erkemalangen man Dibata. Sierbahansa malem kal ateta eme tek kita kasakai kalak si ndalanken singena ate Dibata, bagi nina Mazmur ibas introitus ras pengogenta: …“asa kalak si nembah Ia meriahlah ukurna”, sabab “Man bandu Kubereken taneh Kanaan, jadi taneh pusakandu”[4]

Diskusi:

1. Kai sierbahansa maka Nuah ngasup setia man Dibata itengah-tengah masyarakat si kerina nggo jahat? La ia “terbawa arus”? Oge ayat 9-10. Turiken!
2. Kai arus ibahan bapa ras nande I tengah-tengah jabu gelah kerina anak-anak ngikutken kata orang tua bagepe kata Dibata? Gelah kerina isi jabu sada arih? Turiken
3. Kai tantange-tantangen si lit ibas masyarakat ras lingkungen si erbahansa keadan keluarga terutama anak-anak la ngikutken kata orang tua?

Pdt.S.Brahmana

------------------------------
[1] Jurgen Moltmann, Khotbah Masa Kini 5. Jakarta: BPK Gunung Mulia, 2003, hal.141
[2] Pius A.Partanto & M.Dahlan Al Barry, Kamus Ilmiah Populer. Surabaya: Arloka, 1994, hal.717; Juga lihat Kamus Umum Bahasa Indonesia edisi ke tiga karangan W.J.S.Poerwadarminta, 2006, hal.1138.
[3] Joas Adiprasetya, Respons atas Artikel Arman Barus (Solidaritas Sosial Gereja) (Jakarta, 19 September 2008, askses tgl.11 Januari 2012); http://www.leimena.org/en/page/v/493/solidaritas-baru-sosial-gereja-di-tengah-masyarakat-berwajah-majemuk-dan-miskin
[4] Mazmur 105:3, 11

Artikel lain yang terkait: