Khotbah Markus 9:2-9, Minggu 19 Februari 2012 (Pasion I)

Introitus :
TUHAN si Erdolat reh alu kinimbisanNa, lako jadi raja si dem alu kuasa. Nehenlah, radu ras kerehenNa, ibabaNa upah man bangsaNa(Yesaya 40:10).

Pembacan : II Raja-raja 2:1-12; Khotbah : Markus 9:2-9

Thema :
Yesus ipermuliaken, kalak sitek pe ipermuliaken

Cataten Khotbah

(1) Enem wari kenca sindai…maksudna eme kenca iakuken ajar-ajar secara pribadi siniwakili Petrus isekin Yesus situhuna eme mesias (Markus 8: 27-30).

(2) Engkai maka Petrus, Yohanes ras Yakobus ngenca ibaba Yesus ku deleng simeganjang (“Hermon”? ganjangna l/k 3000 m), la ijelasken ntah la itueiken alasenna. Si jelas amin gia la lit pengangkaten, Petrus me pemimpin ajar-ajar sedekah enda janah Yakobus ras Yohanes eme ajar-ajar Yesus si ikelengina.

(3) Peristiwa enda eme Jesus ipermuliaken lit isuratken ibas Injil Synopsis (Matius, Markus ras Lukas). Berarti peristiwa enda penting erkiteken peristiwa enda bermakna:

1. a. Maka la nai Ia ndekah ndalani kematen I kayu persilang guna nebusi manusia ibas kuasa dosa (Lukas 9:31, Matius 16:21).
2. b. Legitimasi maka Yesus Tuhu-tuhu mesias si enggo ipadanken Dibata nebusi dosa manusia (Lukas 9:35).
3. Maka ise si enggeluh setia ras tutus ndalanken pedah Dibata imuliaken me pagi (ayat 4-5).
   

(4) Musa eme kalak sipatuh man Dibata. Ia ngenca si ndatken kesempaten iban Dibata guna ngerana ras Dibata alu pedempak ayo (Keluaren 33:11), she maka ayona ersinalsal (Keluaren 34:29).

(5) Elia pe sekalak nabi si luarbiasa. Ia ibere kesempaten guna pesusur api I langit nari (1 Raja-raja 18:36-38). Tambah si e, nabi Elia me salah sada nabi si la ngenanami kematen secara pisik tapi ras daging kulana e kerina iangkat ku surga (2 Raja 2:11-12).

(6) Yesus Kristus eme mesias sinipadanklen Dibata. Amin gia itehna erbage-bage kiniseran bakal ibentasina, tapi la Ia mundur, ia setia she mate I kayu persilang.

(7) Dage arah kata Dibata enda mereken pengangkan man banta:

1. a. Gelah kita pe selaku kalak kristen tetap setia she ku kedungenna, bagi Musa, Elia, bagepe Elisa ibas pengogenta, setia ia tetap ngikutken Elia she maka ialokenna kuasa nabi Elia. Tentu kita pe adi setia ngikutken Yesus Kristus sialoken me kuasa guna tetap ngasup nggeluh bagi singena ate Tuhan ras bagepe kemulian ibas kegeluhen si rasa lalap.
2. b. "Enda me AnakKu si Kukelengi, begikenlah Ia!, Ertina adi sibegiken kataNa ras ngelakokenca kai pe sipindo ibas gelarna iberekenna man banta. Pemahamen enda penting, sabab ibas kinatana ibas perdalanen geluhta labo kap kerina bagi ukur. Erbage-bage perbeben reh nderpa, terlebih reh majuna jaman tantangen labo kepe reh urakna. Amin bage gia, ula kita mbiar, ula aru ateta sebab Tuhanta Yesus Kristus payo kap Mesias e, berarti Ia me jalan keluar ibas kerina masalah sinialami kita.
3. c. Kerna Mesias enda enggo inubuatken pe ibas Padan Sindekah. “TUHAN si Erdolat reh alu kinimbisanNa, lako jadi raja si dem alu kuasa. Nehenlah, radu ras kerehenNa, ibabaNa upah man bangsaNa” (Yesaya 40:10). Adi bagem kapndu Dibata sisembah kita ibas Yesus Kristus me labo nari mbiar kita, aru ateta iba geluh enda? Ia dem kuasa, tambah sie reh ia maba upah man bangsaNa. Kita me bangsaNa genduari, emaka tetaplah kita setia, labo pediatNa kita kemalun. Tambah sie ibas ibas paksana pagi kita pe ipermuliaken bagi Musa, Elia ras Yesus Kristus.

Pondok Gede, 18 Februari 2012
Pdt.S.Brahmana

Artikel lain yang terkait: