Khotbah Perbahan Rasul 9:31, Pekan Penatalayanen Wari II, Senin 21 Januari 2013

Introitus :

Ma ietehndu kin maka kam me Rumah Pertoton Dibata dingen kesah Dibata ringan ibas kam?” (1 Kor 3 : 16).

 

O g e n : Joel 2 : 28 – 32 Khotbah : Perb.Rasul 9 : 31

T e m a :

“Kesah siBadia erbahanca reh belinna kiniteken perpulungen”

 

Megati sibegi kata sindiren ibas temanta aliren sideban nari nina: “ibas GBKP lalit kesah sibadia”, payo kin ndia pengakap enda??? Adi iakap kami justru ibas GBKP enda nge simbuena Kesah sibadia, sabab adi lakin pendahin kesah sibadia lamungkin banci GBKP enda reh belinna. Ngaku kuakap kita maka adi siidah keberadaanta, ketutusenta gegehta, bagepe pemeteh silit ibas Serayan (Pdt/Pt/Dk), ibas waktu sikurang, ibas perukuren simelala erbagena, labo banci GBKP enda bagi sigenduari enda. Kerina e gegeh kuasa kesah siBadia.

Kesah siBadia e desken “Dudumen” (mungkin lanai enterem kita ngankaisa kerna kai kin dudumen enda) rikutken turi-turin siadi dudumen enda eme desken sada rubia-rubia, asakai ingan, sinuan-sinuan tah buluh-bulung sinibentasi dudumen enda kerina jadi merim. Bageme pe pendahin kesah siBadia e, asai sinibentasiNa, siniianiNa kerina jadi merim, kerina reh belinna, emaka GBKP end ape jadi GBKP simalem, seh kal riana teman senina.

Senina ras turang, arah Natsta ibas berngi sipeduaken enda, icidahken 2 gambaren kecibal perpulungen silit ibelang-belang Judea, Galilea ras Samaria.

Sipemena: Perpulungen lit ibas keadaan aman (Bhs.Ind.Damai), alu kata enda nuduhken maka sope sie keadaan perpulungen la aman, litna kebiaren, aru ate ras sidebanna. Paulus (Saul) kalak si enggo ikuasai kesah sibadia pe jadi kebiaren denga man kalak sienggo tek, erkiteken penandaina Saul terjeng simunihi kalak siningetken gelar Jesus (9:21). Perpulungen aman/damai e berarti la kalak sihebat kerina ije, labo kalak simegeh, erkuasa ije tapi perpulungen e ngasup saling menerima sada ras sidebanna, perpulungen e siteken, perpulungen e siergan, saling menopang ras sidebanna. Kai sierbanca maka banci bage???: KESAH SIBADIA.

Sipeduaken: Perpulungen erkemalangen nandangi Tuhan (Bhs.Ind.Takut akan Tuhan). Piga-piga kali Lukas nekanken rumusen erkemalangen man Tuhan,umpana ; Lukas 1;50, 18:2, 23:40, Perb. 9:31)

1. Erkemalangen man Tuhan erbahanca kiniteken ras ketaaten begepenilahken sijahat (Job 28:28 )
2. Kalak sierkemalangen man Tuhan ndatken pemeteh simehuli (Masmur 111:10, Kuan 1:7)
3. Kalak sierkemalangen man Tuhan, tentu keleng atena temanna manusia, sebalikna kalak silaerkemalangen man Dibata, labo erkeleng ate man temanna manusia (Bd.Lukas 18:2).

Senina ras Turang, Tema-nta ibas berngi sipeduaken enda: Kesah siBadia erbahanca reh belinna kiniteken perpulungen. Rikutken Samson T maka lit 3 pilar- tanda perpulungen reh belinna eme:

• Enggo lit ketedehen ate ngoge pustaka siBadia / enggo er-SATE (Saat Teduh)
• Ertoto Tep-tep wari
• Ibadah/Bersekutu, reh ku perpulungen

Ibas dambar sideban adi sianalogiken desken sinuan-sinuan maka , sinuan-sinuan e arus. “RURAT, ERTUNAS ras ERBUAH” ertina perpulungen e arus rurat ibas Kata Dibata, erTUNAS ibas pertoton ras ERBUAH ibas kiniersadan itengah-tengah perpulungen.

Perpulungen simbelin e pe teridah arah Kwalitas ras Kwantitas, Siidah ibas perpulungen silit I Judea, Galilea ras Samaria enda ndai dari segi Kwalitas Aman/Damai dari segi Kwantitas ” reh teremna kalak sitek”. Kai sierbanca maka banci bage???: KESAH SIBADIA

Senina ras turang, arah gambaren perpulungen enda, mari dage sinen gambaren perpulungenta, enggo me ndia reh belinna kiniteken perpulungenta??? Indikatorna: aman/damai kita ibas perpulungen/sektorta enda, erkemalangen kita man Dibata, ertambahna rusur kalak sitek, atau la gia ertambahna erkurangna lahgia ola!!!.

Dasarna Kesah sibadia lah siban sierkuasa, ula “kesahta” tah kesah sibas ia”. Ma ietehndu kin maka kam me Rumah Pertoton Dibata dingen kesah Dibata ringan ibas kam?” ( 1 Kor 3 : 16 ). Erkiteken Kesah siBadia e lit bas kita emaka kita kita terkelin kap, kita tetap nggeluh (Bd.Ogen; Joel 2:28-32).

Pdt.Iswan Ginting Manik,M.Div GBKP Cililitan

Artikel lain yang terkait: