Bahan : Ulangen 16:9-12
Thema : “Baganlah Kerja Rani Alu Ukur Meriah”
Tujun :
- Gelah ngawan perpulungen nggejapken pasu-pasu Dibata ibas pendahin bagepe kegeluhenna
- Gelah ngawan perpulungen meteh maka erbahan kerja rani eme guna mpehaga Tuhan
Ibas Tahun 2013 enda enggo ka seh kita nikapken diri guna ngelakoken sada dahin simbelin eme Kerja Rani. Ikataken kerja seban bagem pengertin silit ilakoken ibas dahin sidem keriahen ukur, radu ras erpesta bagepe man-man ras. Rani sinimaksud eme ibas bentuk hasil/ulih pendahin (juma). Jadi secara sederhana ibas ngelakoken dahin Kerja Rani eme ibas bentuk pesta keriahen ukur ibas ulih pendahin (juma) sienggo ialoken.
Secara Kiniteken sieteh maka kerina silit ibas kuasa, keleng ate bagepe pemere Dibata. Lit ulih peranin siertiken erkiteken pemere Dibata man banta seh maka banci sidatken ulih arah pendahin e. Jadi ibas kita ngelakoken Kerja Rani siman pehaganken eme Tuhan Dibata labo kiniliten ibas kita. Penggejapen kerna silit ibas kita rehna ibas Dibata nari tentu mahan bana sisehken Kerja Raninta ibas dem keriahen ras pe hormat man Dibata.
Ulangen 16:9-12
Ibas kitab enda ituriken kerna kai si arus ibahan bangsa Israel ibas ia pagin bengket ku tanah perpadanen. Arah Musa Dibata mpersingeti bangsaNa guna ngelakoken sada aturen eme ndalanken Kerja Rani. Biasana sienda ibahan ibas wari pe 50 ken (Pentakosta) kenca enggo dung peranin (page/gandum). Ibas ngelakoken dahin enda :
- Bahan alu pengertin maka dahin e guna mpehagaken Tuhan
- Bahan alu cara nehken persembahen.
- Isehken persembahen e alu dem keriahen ukur (lalit simaksasa) entahpe ipengaruhi hal-hal sideban.
- Sehken e guna kemulian man Tuhan,
- Sehken ibas erti kiniersadaan alu nehken kekelengen man anak-anak, suruh-suruhen, kalak Lewi, kalak pertandang, anak melumang, diberu balu-balu
- Jaga maka ula lupa aturen e
- Ingetlah ise dirindu mbarenda (budak)
Arah bahan enda ipersingeti kita ngelakoken Kerja Rani ibas tahun 2013 enda. Adi siperdiateken pengertin silit tentu iarapken sibahan alu bentuk kerja meriah (pesta). Jadi rusur pe siertiken maka Kerja Rani pe sada bentuk ibas Pesta Iman perpulungen man Tuhan Dibata ibas pengertin enggo sialoken kekelengenNa simbelin arah pasu-pasuNa pendahin/pencarinta.
Payo tuhu maka lanai kita kerina “erjuma”. Tapi siertikenlah maka “juma” nta (inganta erdahin) gundari pe e pemere Dibata kap, emaka ulih pendahinta e jadi persembahen simerim lah man Tuhan Dibatanta.
Perlu sigejapken maka ibas ndalanken kerja rani :
- Arus alu pusuh simeciho segelah ula min sempat perukurenta lanai payon ibas nehken persembahen enda. Ertina langa ibas perukuren pengataken bujur siendesken, tentu sienda kerina mahan bana buen rusur kita ertimbang kerna untung rugina ibas nehkensa. Adi penggejapen perukuren simeciho ilakokenna alu dem pengataken bujur uga Dibata enggo masu-masu pendahinna jenari iendeskenna persembahenna.
- Ula min siendesken persembahenta ibas bentuk kiniganjangen ukur, sebab siman pejanjangen eme Tuhan Dibata labo manusia termasuk dirinta.
- Lakoken alu meriah ukur labo alu jungut-jungut. Sienda mahan bana terjaga perukurenta simahan bana turah dame bagepe keriahen.
- Endesken siterbaik. Sienda siertiken erkiteken Dibata enggo ngendesken siterbaik man banta eme keselamatenta. Ibas nehken persembahen enda siinget pemereaNa jenari sikataken bujur.
- Persiapken alu mehuli. Ibas ngendesken siterbaik man Tuhan tentu perlu ipersiapken i rumah nari. Sitotoken man Dibata jenari sisehken persembahenta.
- Tek nandangi persembahen e. Ertina lanai man ukuren kuja persembahen e ipakeken gerejanta, sipasti ibas ukurta siendesken e man Dibata. Gereja makeken persembahen enda tentu siimani ras si amenken guna ndalanken tugas panggilen gereja.
- Ulih nehkensa maka Ia si mbuka tingkap-tingkap langit guna maler pasu-pasuNa man banta.
Siinget ka pe maka ngelakoken Kerja Rani ilakoken alu pesta simeriah ibas ungkapen pengataken bujur,sienda pe perlu sipersiapken alu mehuli. Ingetlah maka si ermulia ibas Kerja Rani e eme Tuhan Dibata labo dirinta. Tek kita pasu-pasu simpar ibereken Dibata man banta.
Selamat Ngelakoken Kerja Rani 2013, Tuhan Yesus simasu-masu kita.
Pdt.Alexander Simanungkalit
0 komentar:
Post a Comment