Suplemen Pjj tanggal 28 Juli - 3 Agustus 2013, Yosua 3:5-17

Ogen : Josua 3:5-17
Thema : “Pasu-pasu Tuhan si Maba Indonesia Merdeka”

Tujun :

• Gelah ngawan niperpulungen meteh maka Tuhan nge sinaruhken geluhna ras sinaluken musuh-musuhna seh bebas
• Gelah Ngawan ni perpulungengelah tetap setia ras labo bera-bera ngikutken Tuhan.

Perlebe

Setuju kalak ntah lang, selaku kalak si erkiniteken tek kita maka kemerdekaan bangsanta ibas penjajahen bangsa asing nari eme erkiteken campur tan Tuhan. Pemahamen enda menentuken sikap nandangi Tuhan ras mengisi kemerdekaen e. Turi-turin 10 kalak si gadamen (Lukas 17:11-19). 10-na ia madan iban Yesus, tapi sada ngenca si mulihken ndahi Yesus ngataken bujur, si 9 kalak nari lang sabab labo gejapna pinkitna e madan perban kuasa Yesus waktu nina Yesus “To laws, cidahken badanndu man imam”. Akapna enggo kin paksana madan ntah pe buen akapna usahana asangken kuasa Dibata. Emaka wajar akapna la pe mulihken ndahi Yesus ngataken bujur. Bagepe kerna kemerdekan bangsanta, banci saja ningkalak perban bom atom si idabuhken Amerika ras sekutuna ku Nagasaki dan Hiroshima nge maka Jepang nadingken Indonesia, ras sidebanna alasen guna mengecilken peran Dibata. Sah-sah saja, tapi selaku kalak sieragama tentu tek kita bagi thema Pjj-ta “Pasu-pasu Tuhan si Maba Indonesia Merdeka”.

Penjelasen/Pengenanna

Sue ras Kata Dibata siman oratenta ituriken uga Yosua si gantiken Musa jadi pemimpin bangsa Israel, tuhu-tuhu nggejapken maka adi la kin Dibata nemanisa ras ncidahken kuasaNa nampati bangsa Israel ibas perdalinen nuju ku Taneh Kanan, taneh si ipadanken Dibata jadi sekerajangen Israel labo banci jadi kenyatan. Ibas perdalinen e tuhu mbue tantangen, baik interen bagepe eksteren. Salah sada tantangen eksteren eme labo saja uga kari naluken kalak singiani tanah Kanan simenurut penelitian eme ija iingani bangsa simegegeh, lit suku enak ije eme suku raksasa (Bilangan 13:17-33), bagepe naluken kota Yeriko ija bentengna tuhu-tuhu megegeh, tapi pe uga ngepari lau Jordan, eme tantangen sigundari ihadapi bangsa enda.

Ibas ngelaken tantangen sinihadapi, Josua labo mengandalken gegeh ras kinibelohenna tapi gegeh Dibata alu pelebe ndalanken kai singena ate Dibata eme alu nuruh bangsa e “mbersihken dirina sue ras aturen agama” (Pengudusan diri, Bd.Keluaran 19:10, 14-15). Tindaken Pengudusen enda nuduhken prinsip maka Dibata labo nggit bertindak alu dem kuasa guna bangsaNa adi pusuhna lenga badia/kudus sue ras peraten Dibata. Arah sienda banci pe kita erlajar maka ope kita mindo segelah Dibata ngelakoken tanda sengget itengah-tengah geluhta, kepeken kita perlebe harus memastiken maka pusuhta bersih ras sura-suranta e ipimpin Kesah Sibadia.

Kenca hal sipenting enda ilakoken, ibas ayat 7 ngerana Tuhan man Josua maka Dibata nggit erbahan perbahanen si mbelin seh maka Josa ipermuliaken bangsa Israel bagi Musa ndube sabab alu perbahanen sibakal ilakoken Dibata e iangkai bangsa enda me maka Dibata ras Josua bagi ras Musa. Arah sienda jadi perenungen pe man banta maka adi pemimpin e ngelakoken kepemimpinenna sue ras singena ate Tuhan la saja rakyat sinipimpinna e simpar pasu-pasu tapi pe pemimpin e ipermuliaken rakyatna. Adi kin pemimpin gereja, iergaken jemaat e me ia, masin katana, termotivasi perulungen guna setia nggeluh sue ras singena ate Dibata, labo sebalikna urak semangat perpulungen ersembah man Dibata.

Ibas ayat 6, kai si ikataken Josua minter ilakoken imam-imam, bagepe ilakoken bangsa e siisuruh Josua eme milih 12 kalak tep-tep suku Israel (ayat 12). Alu kata sideban begiken ras ilakoken bangsa Israel kai si isusuh Josua, la saja rakyat sirulo, tapi pe pemimpin-pemimpin suku ras imam-imam erkiteken tek ia man pemimpinna, tek ia man Josua emaka ibegiken bangsa enda kai si ikataken Dibata arah Josua ras tek ia maka kata Dibata e “ya dan amin”. Uga kinata kepemimpinen bangsanta genduari? Bagepe pemimpin gerejanta?

Tole jadi pelajaren pe man banta arah perikop enda, khususna ayat 6a ija Josua selaku pemimpin tetap menomor sadaken Dibata (Peti Perpadanen symbol kehadiren Dibata) ras imam-imam, teridah arah ipelebe Josua ia erdalan arah lebe bangsa e. Janah payo adi Dibata sinomor sadaken ibas geluhta labo kita kemalun, labo kita kekurangen. Kerna sienda jelas ikataken Ibas Matius 6:33 “Tapi si pentingna kal, daramilah lebe KinirajanNa, janah dalankenlah si ngena ateNa, maka icukupiNa kai si perlu man bandu”.

Dage turi-turin Dibata ncidahken kuasaNa arah Lau Jordan ngadi maler kenca imam-imam si ngangkat Peti Perpadanen Tuhan ndedehken nahena ku bas lau, ngingetken bangsa Israel maka Dibata singgeluh lit itengah-tengahna alu bage reh tetapna ukurna menghadapi tantangen ibas usaha mengketi Taneh Kanan, taneh si enggo ipadanken Dibata jadi sikerakangen Israel. Bagepe tentuna man banata selaku bangsa Israel simbaru ibas ndalani perdalinen geluhta, ula aru ateta, ula kitik ukurta ntah mbiar erkiteken mbue tantangen ntah pe musuh-musuhta siatena meneken kita sabab lit Dibatata sinemani perdalinenta e, si erbahanca kita menang. Sipenting nggeluh kita badia, sinomor sadaken Dibata. Alu bage, bagi lau Jordan si ngambati perdalinen bangsa Israel e ngadi maler seh maka kerina bangsa e banci ngepar, bage me pe tantangen si nihadapi kita kerina teratasi bage pe musuh-musuhta jadi mela akapna sabab la seh jadi sura-surana nandangi kita, talu ia. Emaka arah kata Dibata siman oratenta ibas PJJ sekali enda ngajuk kita pe segelah tetap kita setia ngikut Tuhan, la bo sebalikna erbera-bera. Khususna selaku rakyat Indonesia, labo kebetulen kita nggeluh itengah-tengah bangsa si mbelin enda. Entah uga gia pengidahta ulihna enggo 68 tahun kita merdeka, si pasti tek kita maka erkiteken pemasu-masun Tuhan me maka bangsanta enda merdeka, adi bage mari si syukuri e alu nggeluhken geluhta selaku bangsa Tuhan eme nggeluh badia ras tetap sinomor sadaken Dibata. Tek kita, amin gia kita secara jumlah la nterem tapi jadi pasu-pasu pe kita nandangi bangsanta enda guna reh ulina she maka kai si jadi cita-cita kemerdekaen ndube banci inanami kerina rakyat sirulo enda. Merdeka!!!.

Pdt.S.Brahmana

Diskusi (Pjj siiban Moderamen)

1. Kai nge makna sibanci sitangkap ibas pemilihen Tuhan man Josua (ayat 7) I tengah-tengah kegeluhen si genduari (bdk. Pemilihen pemimpin-pemimpin itengah-tengah bangsanta). Turiken!
2. Lau Jordan, lau mbelin si arus I kepari maka seh ku Taneh Perpadanen e, kai ka nge pengertinna (pemahamenna) ibas kegeluhenta? Turiken!

Artikel lain yang terkait: