Suplemen Bimbingen Perpulungen Jabu-Jabu (PJJ), Tanggal. 25-31 Januari 2015, 1 Raja-Raja 5:1-12

Ogen   : 1 Raja-Raja 5:1-12

Thema : Pasar Bebas (AFTA)

Tujuan :

1. Gelah ngawan perpulungen ersikap ngalo-ngalo Pasar Bebas (AFTA)

2. Gelah ngawan perpulungen “menghadapi” Pasar bebas alu tetap erpengendes man Dibata

3. Gelah ngawan perpulungen ngasup mbangun hubungen kerjasama (networking)

Perlebe

Menaken Perpulungen Jabu-jabu tahun enda sikataken bujur man Dibata erkiteken lit denga kesempaten er-PJJ man banta . Arah PJJ iarapken labo saja segelah pulung-pulung tapi ngawan niperpulungen radu ras ipegegehi arah Kata Dibata siniorati, terlebih arah thema PJJ sipemena enda kita ipersingeti maka menaken tahun 2015 kita enggo mengketi Pasar Bebas Asean (AFTA=Asean Free Trade Area), alu kata sideban enggo iban kesepakaten ibas negara-negara ASEAN guna membentuk Kawasen Bebas Perdagangen si iberlakuken mulai tahun enda. Keadan enda tentu arus sisikapi alu payo sabab adi la bage banci maba dampak ngerugiken kita. Tapi sebaliknya adi sisikapi alu payo jadi peluang simehuli man banta.

Enggo isingetken AFTA eme perdagangen Bebas/Pasar Bebas, arah gelarna saja enggo mereken pengertin maka negara-negara sitergabung kubas AFTA banci alu bebas masarken produkna alu bage man masyarakat enggo mbue pilihen nandangi kebutuhenna. Biasana adi mbue pilihen maka sinipilih eme apai si lebih murah tapi erkualitas. Bagi lit kuan-kuan nukur pangan eme adi banci murah, mbue ras ntabehka. Secara langsung tentu enda mempengaruhi usaha-usaha sinilakoken. Erkiteken si e kita arus meningkatken daya saing produk siniasilken guna bersaing ras produk-produk negara sideban bagepe erga si kompetitif, adi la bage tentu produkta la itukur kalak. Bagepe tenaga kerja, adi sedekah enda bersaing secara nasional ngenca genduari bersaing ras negara-negara sideban, emaka meningkatken SDM-ta enggo jadi keharusen adi lakin ateta “jadi tamu ibas inganta”.

Pebagesi isi Nas

Arah kata Dibata siman oratenta, 1 Raja-Raja 5:1012, nuriken uga Salomo menjalin kerjasama si mehuli ras raja Hiram I Tirus. Kerjasama enda imulai alu litna keperlun raja Salomo guna membangun rumah Pertoton. Salah sada bahanna siiperluken eme batang Pinus si turah I Deleng Libanon. Labo kerina kalak beluh nabah batang kayu enda (ayat6), tambah si e guna mabasa she lawit pe membutuhken kecakapen/kebeluhen khusus. Guna si e me Salomo makeken hubungen si enggo ibangun bapana Daud ras raja Hiram guna erbahan kerja sama si saling menguntungken. Tugas raja Hiram eme muat batang kayu pinus si lit ideleng Libanon jenari mabasa she ku ingan siitentuken, selanjutna e enggo urusen suruh-suruhen raja Salomo. Guna si e raja Salomo mereken man suruh-suruhen raha Hiram 2 ribu ton gandum ras 400 ribu liter minak zaitun tiap tahun.

Bagem beluhna raja Salomo ibas membangun kerajanNa, membangun kerjasama antar negara ibas bidang ekonomi/perdagangen, bagepe ibas bidang deplomatik she maka ibas zamanna la lit peperangen. I bas zaman Salomo me ibangun rumah pertoton. Engkai maka banci bage? Ibas ayat 12 isingetken eme erkiteken Tuhan nepati padanNa, iberekenNa kepentaren man Salomo she maka ibas zaman raja Salomo, kerajan Israel mengalami kemajun si luar biasa.

Pengkenaaina

Tahun enda proritas program GBKP eme “Peningkatan Sosial Ekonomi & Budaya Jemaat”, sehubungen ras semangat AFTA tentu enda jadi kesempaten meningkatken sosial ekonomi & Budaya Jemaat khususna arah:

(1) meningkatken semangat ras khualitas kerja. Ertina erdahin alu tutus. Terlebih erpalasken kiniteken kalak kristen kai pe dahin e eme guna kemulian Dibata. Bbagi enggo isingetken tantangen ibas zaman pasar bebas eme kualitas tenaga kerja arus ngasup ersaing ras kualitas kerja negara sideban. Adi ndube kalak Malaysia erlajar ku Indonesia gundari sebalikna. Engkai maka bage? Tambah sie apakah dokter I Penang lebih hebat asangken dokter I Indonesia? Tek kita lang. Tapi engkai maka mbue kalak ertambar ku luar negeri, khususna kalak Karo ku Penang? Adi kuakap enda labo masalah ise beluhen tapi masalah mental, masalah integritas. Dage tantangen man banta genduari eme masalah mental, masalah integritas. Emaka she kal payona maka bangsanta perlu revolusi mental. Salah sada sehubungen ras semangat ras ke engganen kerja keras eme masalah budaya instan. La ate kerja keras tapi menghasilken melala. Kuakap enda ka me sierbahansa mbue denga praktek korupsi ras kejahaten sidebanna. Sabab la pe tutus erlajar dung kange sekolah, jadi kang PNS. Man kai melimber takal erlajar ras erjuang adi alu santai pe banci “berhasil”? Pemikiren ras mental si bagenda me perlu man kikisen, perlu man benenken.

(2) Meningkatken budaya jemaat, ibas sienda kebiasan nggeluh selaku kalak kristen eme nggeluh bujur, adil, sikeleng-kelengen, sisampat-sampaten, mehuli man isepe, ramah sada ras sidebanna, ngasup membangun kerjasama, rsd. Alu membiasaken nggeluh bagenda, la perlu aru ate ngalaken jaman si lanai tertebeng eme pasar bebas si imulai tahun 2015 enda, sabab ije sinipentingken kualitas, saling percaya ras menguntungken. Modal e arusna enggo lit ibas kalak sierkiniteken;

(3) Tetap erpengendes man Dibata. Alu tetap erpengendes man Dibata, tentuna ntah kai pe sekali jadi, adi bagi ukur la meganjang ukur, adi la bagi ukur la jungut-jungut, la pernah putus asa.

Pdt. S. Brahmana

Diskusi (bagi si lit ibas Bimbingen PJJ Moderamen)

1. Kuga kerjasama dagang antara raja Salomo ras raja Hiram saling menguntungken? Perdagangen maju semakin saling ketergantungen yang lebih tinggi (oge ayat 6-7). Turiken!
2. Diskusiken ntah kuga banci mungkin man kalak Karo bekerjasama dagang ras kalak sideban, terutama kalak cina si enggo lebih berpengalamen, bagepe lebih mbue jaringenna? Turiken!

Artikel lain yang terkait: