Suplemen Bimbingen Perpulungen Jabu-Jabu (PJJ), Tanggal 1 - 7 Februari 2015, Matius 18:15-20

Ogen   : Matius 18:15-20

Thema : Perkunjungen Rumah Tangga

Tujun   :

1. Gelah ngawan ni perpulungen meteh maka PRT eme tanggungjawab kerina ngawan perpulungen
2. Gelah ngawan perpulungen erbahan perencanan/pelaksanan PRT
3. Gelah ngawan perpulungen ikut muat bagin ibas PRT

Perlebe

Erpalasken biak Dibata si mediate, peduli terlebih nggit erkorban waktu ras tenaga guna ndarami biri-biri si bene, bagi isingetken ibas ayat 11-14, bageme arusna nggeluh biak sibage ibas diri kalak sierkiniteken. Perbahanen si bage ikataken meriah ukur Dibata ibas idatNa mulihi biri-biri si bene e, amin gia biri-biri e sada ngenca. Engkai maka meriah ukur Dibata? Ibas ayat 14 ikataken “Bage pe Dibata, Bapandu, labo ateNa sekalak pe danak-danak enda papak”.

Pebagesi pengangkan kerna Nas

Erpalasken biak Dibata enda me maka ibas perikopta isingetken uga arusna nggelu sapih-sapih kalak si erkiniteken ntah pe nggeluh ibas persadan perpulungen. Kinata ibas kegeluhen enda terkadang kita megegeh terkadang ka kote. Ibas kote megati la nai ngasup nggeluh selaku anak-anak Tuhan she maka erbahan salah man teman senina. La ikataken kai sinimaksudna “erbahan salah”, saja ibas terjemahen Bahasa Indonesia ikataken “berbuat dosa”. Adi “berbuat dosa” berarti kerina si ngelanggar Undang-Undang Tuhan, umpamana nembah berhala, erlua-lua, nangko, rsd. E maka tugas selaku teman senina eme nurangisa (“menegor”), nginget kenca. Ibas cakap Indonesia “tegorlah”. Enda penting, sabab erpalasken Esekiel 3:18-19 isingetken adi la sitegor/siingetken sininata si erbahan dosa, kita pe pagi ituntut Dibata. Tapi adi enggo si tegor ntah si surangi, kita enggo pulah ibas pengadilen Dibata.

Payo, salah sada tugas si mberat man kalak si erkiniteken eme “menegor”. Tugas enda la gampang. Sabab mbue kalak la nggit ngaloken “tegoren” (isuriangi) amin gia situhuna man kiniulinna, jenari tegoren e pe mbue isehken alu cara la bijaksana, misalna ilebe-lebe jelma sinterem. Amin gia la gampang erkiteken: (1) segat ate kalak si itegor e. Adi segat atena paling tidak adi sedekah enda mehuli hubungenta ras ia kenca isehken tegoren banci sebalikna, banci daram-daramina ka salahta, ipebau-bauna ka kita amin gia la lit bagi si ikatakenna e (irekayasana); (2) perlu cara si tepat ntah bijaksana ibas nehken tegoren e, berarti ibas ndalanken tugas enda kerina kita perlu (1) tetap setia ndahiken pendilota guna saling mpersingeti adi lit “berbuat dosa”, (2) erlajar uga kin cara simehulina ibas nehken tegoren.

Mari si perdiateken cara nehken penuriangi (menegor) si isihken Yesus arah nas PJJta. Lit 3 tahap si isingetken. Tahapen sipemena eme “pedempak”, ertina secara pribadi. Ibas ayat 15 isingetken “sanga kam dua-dua ertina la lit orang ke tiga. Tahap enda me si idialna erkiteken la lit niat pemela si nisuriangi e. Tujunna eme ndatken mulihi seninanta e desken biri-biri si enggo papak (ayat 12, 15B). Ibas tahap sipemena enda berarti secara pribadi ndahi kalak si enggo “berbuat dosa”, adi enggo ilakoken tahap enda ras la berhasil maka iterusken ku tahap si peduaken. Tahap sipeduaken enda eme ngelakoken penuriangi ilebe-lebe saksi. Ibas ayat 16 ikataken “Tapi adi la kam ibegikenna, babalah temanndu sekalak ntah dua kalak gelah bagi tersurat i bas Pustaka Si Badia: 'Tep-tep pengadun enggo sah adi lit dua ntah telu kalak saksi”. Ibas tahap ntah langkah sipeduaken enda, tegoren ntah penuriangi ilakoken ilebe-lebe saksi. Maksudna segelah tegoren e lebih megegeh asangken tegoren sinibelasken sekalak saja. Tambah si e tentuna percakapen si nilakoken ibas upaya menegor ntah nuriangi lebih “matang” ntah lebih mbages ras lengkap. Iarapken ibas tahap enda si itegor sedar ras ngakuken salahna jenari robah. Adi ibas tahap sipeduaken pe la berhasil, iterusken ku tahap sipeteluken eme isehken man perpulungen ertina perpulungen secara lembaga/persekutuan ikut campur nanganisa persoalen enda. Adi tahapen enda pe la berhasil iberlakuken me “siasat gereja” eme “pengucilan”. Ibas ayat 17B isingetken kalak si bage bali ras kalak perbegu ntah pe kalak si muat cuke. Ertina lanai bagin jemaat. Enda me si ikataken genduari disiplin gereja. Disiplin enda ilakoken guna:

1) Njagai kebadiaan gelar Dibata (Mat 6:9; Rom 2:23-24)

2) Njaga kemurnin maral ras integritas ajaren gereja (1 Kor 5:6-7; 2 Yoh 1:7-11)

3) Upaya nelamatken anggota si la patuh ras mbabaisa mulihi ku dalin si payo (1 Kor 5:5; Yak 5:19-20)

Ibas ayat 18 secara tegas Yesus mereken wewenang “disiplin gereja” labo saja e tindaken anggota jemaat nandangi sekalak anggota jemaat si “berbuat dosa” ras la nggit jera, tapi pe ikataken seri ras tindaken Dibata sendiri. Adi jemaat ibas ertin perpulungen secara lembaga nuriangi/menegor sekalak anggota jemaat erkiteken enggo “berbuat dosa” gelah jera ras nadingken dosana, maka arah tegoren e Dibata sendiri situhuna ndarami ras ndilo kalak e, janah adi tetap ia nulak pendilo Dibata e, maka Dibata pe nulak kalak e. Sebalikna adi ngaku salah dinget jera ia, maka Dibata sendiri menyambut kalak e. Kata “irakuti” ibas kalak Yahudi berarti “mengucilken” (pedauh la ersibar) ras kata “iosari” berarti mulahi kalak e ku bas tahap “pengucilan”.

Jenari ibas ayat 19-20 tole isehken janji maka pertoton ibegiken Dibata adi lit 2 kalak sepakat ntah ersada ukur jadi bukti tambahen maka kai pe keputusen perpulungen erpalasken pertoton sehubungen ras disiplin gereja maka keputusen e I hormati ntah ibegiken Tuhan. Jadi ayat enda pe arus ka ipahami ibas kontek ayat 18, amin gia kerna ertoto si isingetken ibas ayat 19 banci ipahami ka arah sudut ajaren kristen sideban sehubungen ras ertoto (bd. 1 Yoh 5:14).

Pengkenaina

(1) Arah kata Dibata si niorati kita enda, kita ipersingeti kerna salah sada tugas anak-anak Tuhan la erdobahen baik secara pribadi bagepe secara persekutuan eme tugas “Ngajarken Senina” ntah pe “menegor” adi siidah ia nggeluh “berbuat dosa”. Tugas enda penting ilakoken erkiteken lit akibatna man banta adi la silakoken bagi isingetken ibas Esekiel 3:18-19. Tujun ndahiken tugas enda tentuna segelah senina ntah turangta e sadar maka kai sibanna e lepak ntah pe la ngena ate Dibata jenari banci ia robah ntah jera.

(2) Ibas ndahiken tugas enda perlu pe iperhatiken ingan ras waktuna. Labo adi siidah senina ntah turangta “erbahan dosa” mis sitegor. Enda penting sabab ingan ras waktu mbelin pengaruhna tegorenta e berhasil merubah kalak ntah lang.

(3) Lit istilah lebih baik mencegah (Preventif) dari pada mengobati (Kuratif). Arah istilah enda ngingetken pentingna tindaken preventif, sabab arah PRT labo saja guna menegor/nuriangi tapi pe saling melayani ras mpegegehi. Salah sada isingetken ibas GBP 2010-2015 eme kurang puas akap ngawan perpulungen ibas pelayanen si nilakoken sedekah enda, bagepe penurunen kehadiren ngawan perpulungen ngikuti kebaktin kategorial, emaka salah sada solusi banci ilakoken eme arah Perkunjungen Rumah Tangga, baik apakah e lit program ntah lang si niaturken runggun gereja. Tentuna simehulina lit program e. Ibas praktekna ngelakoken PRT enda banci ilakoken: (1) secara pribadi ras inisiatif pribadi. Enda banci ilakoken kerina ngawan perpulungen, terlebih pertua/diaken ras pendeta perlu kal erbahan perkunjungen si teratur terlebih adi ibas runggun enggo iban “Jetro Sistem” (sekalak pertua ntah diaken enggo iban piga KK siman kekepenna, biasana iban erpalasken ingan tading si deher ras ingan pertua/diaken e, gelah alu bage banci reh nukahna pertua/diaken e mperdiateken ras terlebih erbahan perkunjungen). Perkunjungen labo erkiteken lit masalahna saja maka ikunjungi, tapi pe guna saling mpegegehi. (2) Secara pribadi tapi enggo iaturken Runggun ntah PJJ ise siman kunjungen. (3) secara tim/kelompok. Cara enda biasana guna mpegegehi jabu si nikunjungi. Misalna erkiteken ia enggo dekah la reh ku perminggun, sakit, rsd, bagepe ibas upaya nehken disiplin gereja (pengekepen) bagi enggo isingetken I das sehubungen ras tahap sipeduaken (ayat 16).

Pdt. S.Brahmana

DISKUSI (bagi si enggi iban ibas Bimbingen PJJ GBKP)

1. Oge Matius 18:20, kai maksud ayat enda (maksud Yesus) sehubungen ras dahin PRT? Turiken!
2. Uga peran PRT ibas PJJ-nta? Mari sidiskusiken alu dem keleng ate man anggota Pjj nta (man Yesus). Turikenlah!

Artikel lain yang terkait: