RENUNGAN - KHOTBAH MINGGU 19 AGUSTUS 2018

Invocatio:

E maka lanai bo erndobah kalak Jahudi ntah la kalak Jahudi, si ersunat ntah la ersunat; lanai erndobah suku-suku asing, kalak Sekyt si ianggap hina, budak ntah bebas; sabap Kristus kap kerina. 

Kristus ersada ras kerinana

(Kolose 3:11).

Ogen: Amos 5:10-17 (Antiponal), Khotbah: Galatia 5:13-15 (Tunggal)

Thema :

“JAGAI KEBEBASENNDU, SIERGAN PEKEPAR”

Renungan

Dua wari silepas enggo siperingeti HUT Kemerdekaen RI sip e-73 tahun. Ibas mperingeti wari kemerdekaen e ije kita nginget perjuangen para pahlawan si enggo ngasamken kesahna ibas ngayaki ras memperjuangken kermerdekan man bangsa enda, emaka enggo seharusna kita ngataken bujur sebab bangsanta enggo banci pulah ibas penjajahen bangsa sideban nari ras erpalasken idiologi negarata si ngakui Dibata, emaka bangsa Indonesia enda ngakui ras mengimani maka kemerdekan banci jadi erkiteken campur tan Dibat she maka bangsa Indonesia memproklamirken kemerdekan tanggal 17 Agustus 1945 eme 73 tahun silepas. Ibas kita mperingeti e, tentuna hal penting sirenungken eme kita enggo merdeka ras kemerdekan e tukurna meherga kale me pengorbanen kesah para pahlawan bangsa, emaka ula  isalah gunaken kemerdekaan e alu kita enggo jadi penjajah man kalak sideban misalna bagi kalak si koropsi (Koropsi  seri ngenda merampas hak kalak sideban), pengedar narkoba si erbahansa kalak bene, perlakun la adil baik ibas pendahin, bagepe ibas pergaulen,  kelompok mayoritas menindas kelompok minoritas, ras sidebanna. I Jakarta lit nge ingan tertentu adi tehna kita Kristen labo berena rumahna e ikontrak.

Kata Dibata ibas Minggu ngergaken hak asasi manusia enda, Galatia 5:13-15 tole mpersingeti kita secara pertendin kerna kemerdekaen ibas Kristus. Lit 3 hal sipenting ijenda:

1. Kita enggomerdeka ntah ibebasken ibas kuasa dosa simabai ku bas kematen,
2. Sikapta nandangi kebebasen e,
3. Dampak kebebasen e salah sada eme siergan pekepar.

Sipemena, kita enggo ibasken, kita enggo imerdekaken ibas kuasa dosa nari. Kinata enda enggo me jadi penggejapenta? Salah sada penyebab kurang ngasup kita bersyukur, tutus ku gereja ras ngikuti kegiaten gereja  eme biasa-biasa saja denga siakap erga keselamaten e. Mbaru-mbaru enda lit anggota perpulungenta menurut medis ras keluarga enggo ngadi erkesah, enggo ngadi jantung bekerja she maka kenca sehat mulihken jemaatta ndai nungkun dokter kerna penggejapenna paksa enggo ngadi jantung berdetak. Waktu kunjungi kami, salah sada si teridah kal eme penggejapen bersyukur lenga mate berarti lit denga kesempaten dalani kegeluhen sentudu ras peraten Dibata alu kata sideban lit denga kesempaten jera adi lit kin denga siman pekenan.

Sipeduaken, sikap nandangi kebebasen e. Payo kita enggo ibebasken, penggejapen enda ula ka erbahansa kita sombong, mapas nandangi kalak si la bagi ia (kesombongen rohani). Enda me siipersingeti ibas ayat 13 “Kerna kam o senina-seninangku, kam enggo ipilih Dibata gelah bebas. Tapi jagailah maka ola kebebasenndu e jadi alasen si erbahanca kam ikuasai perukurenndu secara manusia ….”. Kerna sienda banci ka enggo jadi batu sandungen.  Pernah lit sekalak perbapan ban me gelarna Bapa Batu, nuriken penggejapenna nina, aku genduari enggo lahir baru. Gnenduari lanai ateku segat ise pe, kai pe nina kalak lanai aku megelut. Kututusi ngikuti kegiaten-kegiaten gereja e. Bagem nina alu bangga. Tapi reh nina perbapan sideban, merespon penggejapen perbapan Bapa Batu e, “payo nge bagena penggejapenndu Bapa Batu, saja perlu ka itehndu kam usur denga megelut kalak ibandu bai arah sikap bagepe pengeranandu” nina. Mis mungkuk Bapa batu e. Enda sada contoh, payo kita enggo bebas, tapi banci jadi kebebasenta e erbahan kalak sideban lanai bebas. Bagi kalak siusur ngerana kerna hak asasi. Katakenlah ngisap. Ngisap ia salah kin e, me hakna e. Emaka adi ilarang banci reh rawana, enda hak asasiku nina. Payo nge? Payo. Saja ula lupa ibas hak asasita, ibas kebebasenta, inget ka hak asasi kalak, kebebasen kalak. Adi ngisap kita ibas ruang public, ntah ibas ingan ije nterem kalak, me hakna kange ula I cemari asap rokok sabab nina medis bahayan kalak silangisap kena asap rokok asangken kalak si ngisap. Jadi kesimpulenna ibas hak asasita e perlu ka siinget hak asasi kalak sideban. Bagai bapa batu e, ia lanai segat atena kalak, tapi la isadarina segat ate kalak ibanna.

Sipeteluken, arusna dampak kemerdekaen manusia ibas kuasa dosa nari salah sada eme SIERGAN PEKEPAR. Siergan pekepar enda banci idalanken alu mehuli adi palasna “keleng ate”. Ayat 13B “Tapi berelah maka keleng ate njemba-njemba kam guna si sampat-sampaten”, tanpa keleng ate labo kita ngasup siergan pekepar, janah kekelengen enda me kesimpulen Undang Undang Tuhan (ayat 14 bd. Matius 22:37-39). Jadi sekali nari enda me kata kunci ibas ndalanken kebebasen erkiteken kita enggo ibebasken, ntah pe adi ngerana kerna soal Hak Azasi Manusia eme SIERGAN PEKEPAR”. Ibas kegeluhen kebersamanta, kegeluhen persekutunta, kegeluhen kemasyarakatenta, kata enda penting jadi palas kita nggeluh, “Siergan Pekepar”. Janah kata Dibata arah Galatia 5:13-15 ngingetken kita kerna sie. Terdauhen, adi bagi rubia-rubia denga kita eme sikaraten (saling membenci, erpikir negative, si tokohen, rsd bagi pe si isingetken ibas pengogen, Amos 5:10-17) amin gia ninta kita kalak si enggo ngaloken kemerdekan ibas Kristus, tapi situhuna lenga bo, alu bage bene me kita, bagepe persadanta.

Emaka mari sigejapkenlah pembebasen sinilakoken Dibata ibas Yesus Kristus nandangi kuasa dosa si arusna meneken kita sabab upah dosa eme kematen sirasalalap (Roma 6:23), jenari si dalani kegeluhenta si landekah ibas doni enda erpalasken keleng ate, siergan kita pekepar gelah meteguh persadanta,malem pe ateta. Amin.

Pdt. Sabar S. Brahmana, S.Th, MA

Artikel lain yang terkait: