Monday 19 November 2012

Suplemen Bimbingen Pjj tgl.18-24 November 2012, Mazmur 42:2-3

Bahan    :    Mazmur 42:2-3
Thema   :    “Mejehe Ateku Kam O Dibata”
Tujun   :
  1. Gelah ngawan perpulungen mpekeke ate mejehe nandangi Dibata ibas kegeluhenna
  2. Gelah ngawan perpulungen erbahan persikapen si tuhu-tuhu ibas ngalo-ngalo ketubuhen Yesus Kristus bagepe kerehenNa si peduakaliken

Mazmur 42:2-3

42:2 Bagi belkih mejehe nandangi lau maler si malem, bage me tedehna ateku Kam, o Dibata.
42:3 Muas tendingku man baNdu o, Dibata si nggeluh, ndigan aku banci ersembah i adep-adepenNdu?
 
Ateku tedeh man bandu o Tuhan, malem me ateku jumpa sierkuasa.... Aku megegeh di ras kam o Tuhan sabab kam me kapen ulu sinasana .....(PEE No. 52). Arah syair lagu enda banci pe siertiken kerna ketedehen nandangi Tuhan sebab sieteh ibas Ia sidatken kerinana sinasana termasuk gegeh ibas ndalani kegeluhen enda. Pengertin enda pe nuduhken kerna bentuk pengakun maka ibas Tuhan sidatken kerina kemalemen ateta termasuk kegeluhenta. Jadi ketedehenta nandangi Tuhan jadi ketedehen nandangi simehuli ibas kegeluhen enda.

Gambaren ketedehen man Tuhan igambarken pemazmur bagi belkih mejehe nandangi lau si maler. Siicidahken kerna pengakun ibas Dibata ngenca sidatken kerinana. (“Marilah kam kerina silatih dingen beraten, Aku bahan pengadi-ngadindu). Sienda pe siertiken ibas pengajaren Yesus : Ketuahen kalak si muas melihe nehken peraten Dibata; sabap ibesuriNa me ia (Matius 5:6).
Mejehe labo terjeng tedeh ate saja, tapi lebihen asa sie : Ketedehen si mesangat... seh maka adi la ilakoken banci erbahansa turah kendelen/sedih, la semangat, jadi mejehe nandangi Dibata eme sada ketedehen simesangat erpalasken kiniteken. Biasana ungkapen kata mejehe ipaeken lit latar belakangna (situasi rikut ras jarak) sibanci erbahanca sikap kalak mejehe e enggo dekahen kem, ngelamun rsd.  Mejehe nandangi Dibata labo ka erbahanca kita pasif ras ngelamun saja, tapi ibas bentuk kiniteken seh maka siakuken : Adi lakin ras Ia la lit malemna.

Mazmur 42:2-3

Enda me ende-enden Anak-anak Korah si mejehe nandangi Dibata (Rumah pertoton). Erkiteken sada situasi kegeluhen sierbahanca ia ndauh ras “Sion” eme siianggap Rumah Tuhan/ingan Dibata. Ibas ingan sindauh e pe megati ihadapina situasi si la menyenangken ibas kalak sideban si megati nungkuni kerna Dibata (Ija Dibatandu).

Situasi si la menyenangken enda erbahanca ingetna uga ndube riahna ukurna banci rembak ras Dibata (rumah Tuhan i Sion), banci beribadah ras kalak sierkiniteken, rsd si kerina e lanai banci idatkenna ibas ingan sindauh. Sienda me erbahanca turah ende-enden ketedehen kerna Dibata siigambarkenna bagi belkih mejehe nandangi lau simaler...

Ketedehen Pemazmur enda ngingetken kita kerna kegeluhenta selaku anak Dibata. Ersembah man Dibata tentu labo terjeng reh ku rumah pertoton tapi ibas kerina dampar nggeluh. Siperlu sirenungken : lit denga nge ketedehenta guna jumpa ras Dibata ibas rumah pertoton atau sebalikna erkiteken siakap jumpa ras Tuhan banci ijapa pe seh maka lanai lit ketedehenta reh kurumah pertoton. Atau entah lit ka sila bagi ukurta sierbahanca lanai lit ketedehenta reh kurumah Tuhan ? Sie kerina arus siinget maka pengalamen Pemazmur ibas ngertiken maka i rumah Tuhan eme idatkenna kerinana keriahen ukurna, jadilah kita sitetap mejehe nandangi rumah Tuhan. Ula min reh sikapna inganta ersembah reh lanai tedeh/mejehe na kita reh sebab enggo ka siakap biasa saja atau banci ka lanai siakap perlu. Arus sipelimbarui lalap perukurenta segelah katawari pe lit sikap mejehe nandangi Dibata sierbahanca banci kita pe ipelimbarui ibas dampar geluhta sebab lit alat kontrol ibas perukurenta. 

Arah bahan enda pe kita ibabai kubas perenungen ibas bengketna kita kubas Minggu Advent selama 4 minggu berturut-turut siimulai ibas tanggal 2 Desember enda. Minggu Advent sikataken pe rusur ibas kata “nimai” nimai alu bentuk ersikap guna ngalo-ngalo kerehen Tuhan Yesus bagepe kerehenNa sipedua kaliken selaku hakim Agung. Tentu ibas pengertin enda arus lit persikapenta. Persikapen sinimaksud labo persikapen fisik saja tapi pe persikapen iman kiniteken.

Secara sederhana banci siidah uga kita nikapken diri ngalo-ngalo Natal ibas kerina asesoris natal termasuk kebutuhen-kebutuhen guna kiniulin, kinijilen natal e. Sienda tentu labo salah, sisalah eme adi terjeng sienda ngenca sisikapken sementara diri, perukuren, kiniteken, pengendesen diri man Tuhan lanai sisikapken alu payo. Simehulina tentu dua bagin enda arus terus sipekena ibas kita nikapken diri.

Gejapkenlah maka lanai bo ndekah reh me Ia. Pengertin enda mabai kita kubas kegeluhen siterus nggit ipelimbarui/iubahken. Kalak siersikap ngalo-ngalo kerehen Kristus eme kalak singgit jadi perubahen ibas kegeluhenna. Persikapen, perubahen secara perukuren bagepe kiniteken teridah alu erbage-bage bentuk kongkrit ibas ngertiken kata “ersikap” eme ngelakoken kai siisuruh Tuhan ibas kegeluhen enda termasuk nggeluh engkelengi ibas kegeluhenna. Kesederhanan Yesus selaku Mesias janah pelayanenna si luar biasa jadi motifasi man banta guna tetap berkarya ibas Minggu Adven enda. La ka terjeng sie, kita pe ersikap ngalo-ngalo kerehenNa peduakaliken alu tetap setia erdalan ibas dalan sienggo itentukenNa, Jenari tetap sicidahken kegeluhen si “Mejehe” nandangi Dibata, subuk ibas ndalani kegeluhen bagepe ibas ndahi ku rumah pertoton.

Pdt.Alexander Simanungkalit


Artikel lain yang terkait:



0 komentar:

Post a Comment