Khotbah Yesaya 32:15-20, Pekan Penatalayanen Wari V, Kamis 24 Januari 2013

Introitus :

Emaka berekenlah man bangku kepentaren ngerajai bangsaNdu alu kebujuren ras Kebeluhen mbedaken sibujur ras si jahat(1 Raja-raja 3:9a).

 

Ogen : Johanes 4:28-30 Khotbah : Jesaya 32:15-20

Thema :

“Kesah Sibadia mpengasup kita jadi pasu-pasu man kalak Karo”

 

Mejuah-juah…senina ras turang ibas kekelengen Yesus Kristus. Ibas pekan penatalayanen berngi si pelimaken enda, ibabai kita lako ngangkai ras encidahken sura-sura Tuhan ibas kegeluhenta baik secara pribadi ras keluargata guna jadi pasu-pasu man kalak si deban, khususna man kalak karo. Tentu enterem denga kal kade-kadenta,anak kutanta, turang ras seninanta si lenga ngangkai ras nggejabken keleng ate Dibata bas geluhna. Kita si enggo ngaloken ras nggejabken pasu-pasu Dibata, eme si ngelakokenca. Jadi pasu-pasu ertina si maba kemalemen ate ras dame. Palas guna menciptaken suasana sibage arus lit kebujuren ras keadilen. Dahin enda tentu lamelukah adi lalit campur tangan Dibata arah Keah Sibadia.

Erpalasken kata Dibata ibas Jesaya 32:15-20 enda, ituriken terdauhen erpalasken pengalamen geluh bangsa Israel Selatan(JUDA) ibas kiniseran(ukumen Dibata), ibas paksa e teruh kekuasan kerajan Asyur. Kiniseran e jadi erkiteken kebenaren, kebujuren ras keadilen lanai idalanken. Nggeluh erbana-bana ras lanai erdiate sada ras si debanna. Sierkuasa ras kalak bayak nindas kalak si musil. Keadan enda mpeturah pernembeh Dibata man bangsaNa(ay.9-14). Tapi pernembeh ate Dibata la ngadi terjeng ukumen, tetap lit denga keleng ate Dibata alu mpelimbarui kegeluhen bangsaNa alu mereken KesahNa(ay.15). Nina Kuan-kuan Karo: “Bagi ketak-ketak lau bampu(perik), mbelangsa pengarasen, mbuesa peninggeren, naruh bas asar lupa mpedemkenca,piah baruken”.

Banci jadi ibas situasi zaman enda rikutken kesibuken ras perayaken nggeluh, enggo malap (kabur) kerna kebenaren,kebujuren ras keadilen, bage pe kerna erdiate man keluarga,kade-kade ras senina turangta. Kata Dibata mpersingeti kita gundari segelah ula sitimai pernembeh ate Dibata maka kita robah/tobat. Tapi Kesah Sibadia e min si ngerajai ukur ras pusuh peratenta alu membina hubungenta ras Dibata, sebab eme ulu gegeh ras kengasupenta guna jadi sira ras terang sebagai saksi Kristus ibas doni enda. Arah pengogen: Johanes 4:28-30, diberu kalak Samaria kenca itandaina Yesus ras kuasaNa, ersuruh ukurna guna erberita man anak kutana. Bage me pe kita idilo guna erberita nehken kekelengen arah gegeh, pemeteh ras buatenta lit ibas nampati ras menciptaken kemalemen ate ras dame.

Kalak si adi (Lenga bengket ku Berita Simeriah), semal kal nungkuni retak tan. Tuhu kerina perdalanen geluh tertulis bas retak tanta(garis ditelapak tangan). Soal pergeluh, per-empo (jodoh),rejeki, masa depan rsd. Payo tuhu kadang perdalanen geluh, tergantung kubas keputusenta, tapi ula lupa…adi sigenggam tanta, lit denga garis si latertutupi. Garis diluar genggaman adalah bagian Tuhan. Ertina: bas kegeluhen manusia lit bagin si labo kita ngasup ndahikenca tanpa campur tangan Dibata menyempurnakenca.

Kepeken labo lit dalanna kita sombong entah meganjang ukur ibas kerina keadaan ras kecibal geluhta. Kerinana erkiteken jujuren ras perkuah ate Dibata kap man banta.

Kesah Sibadia kap ulu gegeh ras kepentaren janah mpelimbarui geluhta guna ngelakoken kebujuren ras keadilen. Jadilah kita jadi saluren berkat man kalak si deban khususna man kerina kalak karo. Sebab guna dame kap kita ipilih Dibata jadi sada kula,(Kolose 3:15-16). Amin.

 

Rg.GBKP Tambun

(Pdt.Terima Tarigan)

Artikel lain yang terkait: