Teks : 1 Timotius 4 : 13 – 16
Tema : “Ngiah-ngiahialu tutus”
Kata Perlebe
Arapen Paulus nandangi Timotius danci jadi arapen perpulungen nandangi serayan-serayan Tuhansi genduari. Serayan sierpusat kempak Kata Dibata ras mbabai perpulungen erpusat kempak Kata Dibata.
Paulus jine empersingeti Timotius segelah empegara mulihi pemere Dibata man bana, tentu lit kelalaian guna makeken pemere Dibata. Nina Paulus “Erkiteken si e kupersingeti man bandu gelah gara mulihken i bas kam pemere Dibata, siialokenndu asum kutamaken tanku ibabo takalndu. Sabap Kesah siibereken Dibata man banta labo erbahanca gelah kita percik-cik; tapi KesahNa e ndemi kita alu kuasa, kekelengen, bagepe gelah ngasup kita ngkuasai dirinta” (2 Tim.1:6-7).
Pembelan secara verbal la empengadi kritik, tapi perbahanen simehuli em pengadi kalak simandangi. Serayan Tuhan perlu ketutusen (bertekun) segelah ketutusenna e erbuahken kemajun, si la pe ibelasken iidah ras igejapken kalak.
Bahan PJJ enda jadi kritik nandangi serayan-serayan Tuhan. Tapi pakekenlah alu konstruktif, labo jadi kesempaten guna erbahan serangen pepuasken pusuh. Enda jadi kesempaten guna nehken arapen perpulungen guna serayan-serayan Tuhan ibas gereja. Segelah perpulungen reh beluhna nehken pertoton man Dibata guna serayan.
PebagesiPengangkan
Ogeken ras ajarken. Jadi labo terjeng iogeken saja, tapi perlu pengajaren sibenar. Kerna pengajaren sibenar enda genduari kurang iperdiateken, erkiteken sipenting eme perbahanen ibas kegeluhen. Pembenaren kerna sieterbegi alu argumentasi, “bicara ibahan ujian pemeteh teologi, iblis danci jadi juara tapi perbahanenna la bagi siniietehna”. Tapi danci kin kegeluhen sesekalak benar adi perukurenna la benar? Iblis erpala-pala segelah kebenaren kata Dibata enda ula iperdiateken kalak. "Jikalau kamu tetap dalam firman-Ku, kamu benar-benar adalah murid-Ku dan kamu akan mengetahui kebenaran, dan kebenaran itu akan memerdekakan kamu" (Yoh.8:31-32). Ngoge ras empetangkas Kata Dibata eme tugas utama gereja. Situhuna perpulungen reh labo ndengkehken pendapat pengkhotbah tapi ndengkehken Kata Dibata. Adi la alu penampat Kesah Sibadia, la mungkin lit khotbah sibenar, la mungkin lit kalak sindengkehken Kata Dibata alu tutus ras la lit perbahanen si sue pengajaren e.
Andalken pemere Tuhan. Kesah Sibadia siempengasup kalak sierkiniteken ngangkai Kata Dibata. Kesah Sibadia tetap sedalan ras Kata Dibata sinisuratken ibas Pustaka Sibadia. Kesah Sibadia labo erdahin alu la make Pustaka Sibadia. Gereja perlu serayan-serayan sijelas integritasna nandangi Kata Dibata. Pengajar simehuli seri ras enjumpai sekalak dokter si ahli, simeteh kerna pinakit ras ietehna tindaken kai siperluken pasienna. Mehuligia pengerana dokter e tapi labo tehna mbereken tambar sitepat man pasienna, kai gunana. Tapi sebalikna ka, dokter si ahli nambari, tapi sitik pe la iergaina pasienna, ate-atena saja ngerana, danci ka perbahan kata-katana pasienna leben mate. Jadi siperlu eme dokter singangkai cara empepalem ras ngergai tep-tep pribadi pasienna. Kerna kualifikasi serayan Tuhan, siniperluken eme pemeteh sinipaduken ras keleng ate man Dibata. Sebab pemeteh rehna arah pusuh sierpusat kempak Dibata. Pemimpin Kristen eme kalak simediate man perpulungen, labo erkiteken perpulungen mediate man bana. Lit inisiatif guna mbabai perpulungen kubas peraten Dibata.
Lakoken alu tutus. Kesetian kempak Kristus erbahan serayan erdahin alu tutus. Ipilih guna ngelakoken tugas khusus, ibereken kehamaten maka ia pe alu mehamat nehken tugasna. Bahaya nandangi serayan eme mekisat erlajar (kemalasan intelektual) ras mekisat ertoto (kemalasan spiritual). Arusna lalap “muas ras melehe” (Mat.5:6) nandangi kebenaren Kata Dibata. Mekisat enda erbahan pikiren tertutup ras empediat perukuren statis (bage-bagelalap). Kedungenna ia jadi membosanken man sindengkehkenca. Pemikir Kristen arusna jadi pemikir kreatif sebab Kata Dibata kreatif (enggeluh).
Njaga diri ras njaga pengajaren. Standart moral Kristen lebih tinggi asangken standart doni enda, sebab standartta eme Jesus Kristus. Ise silebih badia asangken Jesus Kristus? Pemimpin Kristen enjemba perpulungen segelah “makin menjadi seperti Kristus”, maka ia perlebe arusna bage. Perdiateken belinna pengaruh sekalak pemimpin Kristen. Ndabuhna sekalak pemimpin Kristen la danci lang nderpa kalak-kalak sipimpinna. Sebalikna, kesetian kempak Kristus ras ngandalken kuasa Kesah Sibadia, la danci la empengaruhi kalak sindengkeh kenca.
Pengkenaina
Nina William Barclay, “Seorang pengkhotbah Kristen menghabiskan waktuber tahun-tahun dalam hidupnya untuk memperlengkapi dirinya agar mampu memberikan penjelasan tentang iman Kristen kepada orang lain. Ia dibebaskan dari tugas kehidupan sehari-haris upaya ia berpikir, belajar, dan berdoa agar dirinya dapat menjelaskan Firman Allah dengan lebih baik”. Tapi megati siidah serayan Tuhan (pendeta) sisibuk denga alu urusen sideban sierbau bisnis; mungkin anggap urusen rohani bagi “travel agen wisata rohani ku Jerusalem” simenyita waktu ras perukurenna. Inget “ija ertandu, ije ukurndu”, persinget enda labo main-main sebab kai siniakap kita simeherga maka perbahanenta terarah kuje. Kalak sierdua tuan entah pe terpecah fokus geluhna labo danci nuduhken kualitas pelayanen terbaik.
Selanjutna perlusiingetmaka la dancisipaksakenkalaksidebangunandengkehkenkita, tapi kalak sienggeluh ibas Kata Dibata la danci la menarik perhatin perpulungen. Kombinasi Orthodoxi ras Orthopraxis tuhu-tuhu perlu, ertina ajaren simehuli e mpeturah kegeluhen simehuli. Mari sipergermetken ketetapen ukur Jakub singataken: “Aku, kucidahken man bandu kinitekenku arah perbahanenku" (Jakub 2:18).
Persinget Paulus man Timotius eme “Iah-iahi janah ajari kalak e”, ibas bahasa Inggris ikataken “don't stop preaching and teaching”, eme khotbahken ras ajarken eme dua penekanen siarus alu tutus idalanken. Labo isuanken saja tapi pe pesai segelah perturahna mehuli she erbuah meramis. Alu bage e mperdiateken kegeluhen kiniteken jadi sada kearusen man serayan Tuhan. Ketutusen serayan tuhu-tuhu menentuken guna kemajun perpulungen. Bagepe perpulungen la terjeng nuntut tapi perlu emperdiateken serayan si tutus. Bereken waktu sicukup guna erlajar ras ertoto. Bagepe perlu sarana ras prasarana guna berkembang, misalna buku-buku simenunjang. Ulapaksaken kerina waktu guna ngelai, sebab perlu waktu persikapen ras emperlengkapi diri. Adi la lit isina, kai sidanci iberekenna man perpulungen. Sebab danci jadi serayan sienggo mandeg (burnout) erkiteken terlalu ipaksaken terus erdahin. Serayan perlu pesalang ukur segelah ia isegarken mulihi guna nehken tugas pelayanenna.
Bandung, 10 Pebruari 2015
Pdt.SuraPurbaSaputra, M.Th
GBKP Bandung Barat
HP. 081263596400
0 komentar:
Post a Comment