KHOTBAH
MINGGU, 31 MEI 2020
Minggu
Pentakosta I
Invocatio:
Erjabap malekat nina, "Kesah Si Badia pagi nusur ku babondu janah kuasa Dibata ringan i bas kam. Perbahan si e me, maka anak si ipupusndu e pagi Badia janah igelari Anak Dibata (Lukas 1:35)
Ogen:
Galatia 5:16-26
Khotbah: Yesaya 63:11-14
Thema: Itegu-tegu Tuhan BangsaNa
Perpulungen sinikelengi Tuhan, Tuhu menarik adi si perdiateken hubungen bangsa Israel ras Tuhan. Hubungen e kadang mehuli, kadang lang, bahken tempa Bangsa Israel bagi kacang lupa akan kulitnnya. Ertina lupa ia, uga Dibata tuhu-tuhu ngapiti ia. Maka banci darat I taneh perbudaken Mesir ras ngiani taneh Kanan pelin-pelin kerna rancangen Tuhan. Tapi tempa e ilupakenna kerina arah sikap bangsa enda si lanai setia ras patuh nandangi undang-undang Tuhan. Ibas Jesaya 63: 10 I je ikataken maka bangsa e ilawanna Tuhan, perban si e ceda kal ate Tuhan, janah em sababna erkusur Tuhan jadi imbangna, iperangi Tuhan bangsa e. Eme dalan-dalanna maka banci pe bangsa Israel ibuang ku Babilon.
Perpulungen sinikelengi Tuhan, biasa nge kenca enggo lau e she igung ntah kenca enggo lingling kelewet maka turah kesadaren e maka enggo lepak kepe kita, enggo erdosa kepe kita. Biasana I bas paksa e me maka si inget Tuhan bagi bang Israel ibas perikop khotbahta ndai. Emaka arah pengalamen geluh kalak Israel enda tuhu jadi persinget man banta gelah ula kita bage. Tapi sebalikna si ingetlah maka kita eme anak-anak Tuhan, ras janji Tuhan ya ras amin. Kerina janji Tuhan isehina nge, saja bagi usur isingetken kami banlah dalanna gelah janji Tuhan e she man banta, ntah pe sinanami ibas kegeluhenta.
Minggu enda eme Minggu Pentakosta, Minggu pelimapuluhken kenca Yesus keke I bas si mate nari, eme mperingeti nusurna Kesah Sibadia. Salah sada janji Tuhan Yesus ope ia nangkih ku surga eme kerehen Kesah Sibadia gancihken Yesus nemani ntah pe negu-negu ajar-ajar kenca Ia nangkih ku Surga. Janah Kesah Sibadia enda me terdauhen si mereken kinipangen man ajar-ajar bagepe kerina kalak sitek man Yesus guna erberita simeriah. Kesah Sibadia eme si erbahansa nggit ras pang Pdt. HC Kruit ras kerina utusen missi reh ku Buluh Awar guna meritaken berita si meriah.
Tentuna Kesah Sibadia enda ka me maka banci kita ersembah man Dibata paksa enda. Janah bujur ninta man Dibata erkiteken banci denga sigejapken keleng ateNa ibas kerina keadaanta. Bagepe adi sibahanlah Kesah Sibadia tetap negu-negu kita maka amin gia luar biasa upaya-upaya kuasa kegelapen, kuasa setan iblis bagepe kuasa kedagingen tapi tek kita ngasup kita naluken e kerina. Payo bagi ikataken Paulus ibas Galatia 5:16-22 maka sura-sura ukur manusia erlawanen ras Kesah Si badia bagepe sebalikna, bererti adi payo kin kita sekrajangen Kristus Yesus ras Kesah Sibadia negu-negu kita emaka lanai sura-sura ukur manusia jadi penggurunta. Sinimaksud sura-sura ukur manusia eme Erlua-lua, si nggesuh, la meteh mela; nembah berhala ras erbahan ilmu sihir, simusuhen, rubati, mecimburu, perampus dingen kepentingenna saja iukurina. Memang la gampang nadingken sura-sura ukur manusia e, sabab ibas kinatana lit denga nge itengah-tengah perpulungen la siperiahen, deba la siperkuanen, si cian-cianen ras sidebanna. Adi lit si idah temanta si bage denga sigegehilah notokenca gelah gegeh sura-surat ukur manusia ibas temanta e ngasup ia nalukenca. Sabab bagi nina Paulus ibas Galatia 5:26 tandana kita enggo ngaloken kegeluhen siibereken Kesah Si badia e emaka lagu langkahta pe arus rikutken peraten Kesah e.
0 komentar:
Post a Comment