Khotbah - Renungan Kebaktian Minggu tanggal 22 November 2020, Matius 25:31-46

KEBAKTIAN MINGGU  TANGGAL 22 NOVEMBER 2020

MINGGU PENDUNGI TAHUN GEREJA

Invocatio     :

Jenari pulung me kerina manusia i lebe-lebeNa. Kenca bage ibagiNa me manusia e jadi dua terpuk, bagi permakan nerapken biri-biri i bas kambing nari;biri-biri arah kemuhen, kambing arah kawes (Matius 25:32-33)

Ogen : Esekiel 34:11-16;  Khotbah : Matius 25:31-46

Tema:

UKUMEN I BAS WARI PENDUNGI

Puji Tuhan enggo ka kita she ku bas Minggu pendungi tahun gereja ibas tahun 2020 enda. Ibas sie tentuna mbue hal enggo sibentasi ras sialami, banci jadi lit pe kekelengenta ntah senina turangta enggo leben nadingken kita, khususna ibas tanggal 19 November 2020 jam 17.12 WIB Pdt Agustinus Pengarapen Purba, ketua Moderamen GBKP enggo nadingken kita, ia enggo ndungi pelayanenna I doni enda. Ibas sada sisi tuhu GBKP merasa kehilangen, bagepe tentuna keluarga ras pe teman sepalayanen kerina ermorah ate, tapi sisi sideban, kita pe arusna bersyukur sebab ia nggo ndungi pelayanenna, enggo she pakana ia pekesahken, ia enggo imuliaken Dibata sinepasa ras pe si enggo ndilo ia ku bas pelayanen itengah-tengah gerejaNa jadi teman aron Dibata. Alu kata sideban kerina kekelengenta si enggo leben nadingken kita, ia enggo dung sekerajangenna, tek kita kinitekenna man Tuhan Yesus Kristus si icidahkenna arah perbahanen singena ate Tuhan ibas paksa geluhna I doni enda erbahansa enggo sikap sekerajangenna iban Dibata, emaka ibas minggu pendungi tahun gereja enda sipake pe jadi kesempaten mengevaluasi dirinta baik secara pribadi, keluarga bagepe secara gereja. Apakah kita, baik selaku anak, remaja, permata, moria, mamre, lansia, pengurus gereja, serayan Tuhan, pandita ras sidebanna enggo ndahiken tugas ras tanggungjawabta selaku kalak si enggo ngaloken perkuah ate Dibata ntah pe keselamaten  ibas kita tek man Yesus Kristus?

Bagin kata Dibata siman oraten ibas Minggu enda, Matius 25:31-46 mpersingeti kita kerna ukumen  I bas wari pendungi. Sieteh maka kerna wari pendungi eme kerehen Yesus si pedua kaliken, janah kerehenNa e ise pe la metehsa, sabab ibas pustaka sibadia ikataken maka kerehenNa e bagi pinangko.

Ngerana kerna wari pendungi e ikataken ibas ayat 31-33 "Asum reh pagi Anak Manusia persuruhen Dibata e jadi Raja janah kerina malekat-malekat ras Ia, kundul me Ia i kursi KinirajanNa. Jenari pulung me kerina manusia i lebe-lebeNa. Kenca bage ibagiNa me manusia e jadi dua terpuk, bagi permakan nerapken biri-biri i bas kambing nari; biri-biri arah kemuhen, kambing arah kawes. Kai ertina enda?

Ertina, arah ayat enda mereken penekanen man ajar-ajarna paksa sie bagepe man banta genduari maka:

1)  Yesus Kristus si genduari ras ajar-ajar eme pagi reh ibas wari pendungi. Janah Ia me pagi si menghakimi. Amin gia sienda sulit denga imengerti ajar-ajar paksa e, tapi hal enda isehken gelah amin gia Yesus lanai dekah bakal itangkap ras iukum she mate, amin gia mbue rombongen si ngikutken Yesus mulai nadingken Yesus, tapi gelah ajar-ajar tetap setia ngikutken Yesus.

2)   Ibas wari pendungi e hanaya lit dua kemunkinen. Iserapken jadi kelompok beri-biri ntah iserapken jadi kelompok kambing. Jadi la nai lit kelompok sideban, hanya dua saja. Mungkin lit penungkunen ibas ukurta engkai maka pengelompoken e la iban kelompok biri-biri ras kelompok serigala? Me lebih nukah membedakensa, sababna sada rubia si memamah biak man dukut sada nari rubia karnivora man daging. Ijenda me sada persinget si penting kal man banta. Biri-biri ras kambing sada rumpun kap ia (Beti: beda-beda tipis), sama-sama memamah biak ras nakanna pe dukut. Membedakenca eme bukna ras biakna.  Ertina enda mpersingeti kita ula pagi ibas wari pendungi kita sengget, siakap kita kelompok biri-biri tapi kepeken iserapken ku bas kelompok kambing, sabab ibas Dibata terang kap perbedanna kita kerina. Biri-biri gambaren kalak si ngikutken Yesus alu patuh, setia ras pe meteruk ukur, tapi kambing la bage, ia mekeng, sombong, mesera man ajaren, beluh akapna bana, ia akapna sihebatna, ras sidebanna.

3)    Yesus pe ngataken alu tegas ciri-ciri kalak situhu-tuhu singikutken Ia  ntah pe kalak Kristen situhu-tuhu eme labo soal kerajinenna ersembah, labo soa semangat ras beluhna muji-muji Tuhan, labo ka soal mbue tehna kata Dibata tapi kepeken soal kekelengen si isehken man kalak si membutuhkensa. Jadi alu kata sideban tandana kalak e tuhu-tuhu kelompok biri-biri eme kalak si ngasup nehken kekelengen man kalak si membutuhkensa.

4)   Reaksi duana kelompok enda nandangi kai si ikataken Yesus (banci sioge ibas ayat 37-40 ras 44-45), duana sengget kal, duana la menyangka sukat-sukat membedakensa dua kelompok e eme perbahanen nehken kekelengen secara konkrit man teman manusia si musilna, berarti la terbatas man kalak Kristen saja, tapi man kerina jelma si membutuhken perhatian ras keleng ate si nyata. Ijenda Yesus mengidentikken dirina ras kalak simusilna e. Kelompok biri-biri sengget sebab perbahanen si mehuli si ibanna sedekah enda la enggo pernah iinget-ingetna ntah icatatna, sebab kai ninilakokenna labo guna ndatken pujin, tapi dorongen belas kasihen selaku kalak si enggo ngaloken belas kasihen ibas Yesus nari. Sebalikna kelompok kambing la bage, isamping perbahanen si mehuli si ibahanna iinget-ibgetna, kekelengen si isehkenna pe hanya nandangi kalak si mehuli man bana, si menguntungken man bana tapi sebalikna la ia erdiate nandangi kalak si musilna, eme kalak si la ngasup ersemulih man bana. Emaka adi soal nehken kekelengen ia pe enggo akapna nehkenca, emaka sengget kal kelompok kambing enda waktu nina Yesus “Kukataken man bandu: kai si ibahanndu man sekalak simusilna ibas seninangKu enda, eme si tuhuna perbahanenndu man bangKu”.

5)      Ibas ayat 46 ikataken, bengketme kelompok si arah kawes eme kelompok kambing ku bas ukumen si rasa lalap, sebalikna si arah kemuhen eme kelompok biri-biri bengket ku bas kegeluhen si tuhu-tuhu si la erkeri-kerin.

Bagem ibas Minggu pendungi tahun gereja enda, kata Dibata enda jadi persinget man banta kerina, mumpung lit denga kesempaten nggeluh si ibereken Dibata man bata, adi siakap sedekah enda desken kelompok kambing denga kita ibas nehken kekelengen robahlah, adi enggo siakap kita kelompok biri-biri sipertahanken ras sitingkatkenlah. Gegehta ngelakoken sie eme penggejapen maka kita enggo ngaloken perkuah ate Dibata eme kita enggo itebus, kita  enggo itukur alu erga si she kal mehergana eme kematen Tuhan Yesus I kayu persilang. Janah arah Lakon Persadan Sibadia siilakoken kita ibas kebaktin enda kenca kita enggo ngelakoken pecan kebaktin keluarga mulai tanggal 15-21 November 2020 ngingetken kita kerna penebusen e, kerna keleng ate Dibata si enggo mereken geluhna man banta, gelah geluhta sicibalken jadi persembahen singena ate Dibata eme nehken keklengenta man Tuhan Yesus arah nehken kekelengen man kerina jelma simembutuhkenca. Inget, bagi si nisuratken ibas 1 Yohanes 4:19 “kita ngkelengi, sabab leben Ia ngkelengi kita” (Kita mengasihi karena Allah lebih dahulu mengasihi kita). Amin.

Artikel lain yang terkait: