LANGKAH-LANGKAH NUSUN/ERBAHAN KHOTBAH

Perlebe
Nginget pentingna erti dahin “Nehken Kata Dibata” (Khotbah), ijenda ras-ras kita ercakap kerna si e. Ngerana kerna nehken kata Dibata (erkhotbah) situhuna lit ngenda piga-piga langkah eme:

• Ndarami Nats
• Menafsirken Nats
• Nusun Khotbah
• Nehken khotbah

A. Ndarami Nats:

Erkiteken ibas kita GBKP enggo ngenda itetapken Perikop ntah Nats siman khotbahenken setiap mingguna, emaka poin sada lanai sicakapken uga ndarami Nats sue ras kelender Tahun Gereja.

B. Menafsirken Nats:

Adi nats enggo lit, emaka kerina perhatinta patut itujuken nandangi Nats e. Ibas ngoge nats e, penungkunen perlu ifokusken nandangi: Kai erti ntah pe isi nats e. Isi nats e perlu iterangken man perpulungen. Sabab khotbah si mehuli eme adi nats e itafsirken alu mehuli dingen payo.
Nats itafsirken eme gelah jumpa ertina situhu-tuhu. Sinehken kata Dibata (pengkhotbah) pasti kesuliten nehkenca kata Dibata e man perpulungen, adi man bana sendiri pe lenga bo jelas dingen terang dasarna Kata Dibata si jadi nats e. Emaka perlu lebe proses penafsiren.

Langkah-langkah ibas menafsirken:

(1) Nats i oge alu tutus.
Nats e ula ibaca sekedarna saja, tapi perlu kal ibaca alu tutus ras erngolih-ngolih. Bacalah kai si nitulis ije alu cermat segelah tuhu-tuhu i erti kai si nibaca kita. Perlu pe ibaca terjemahen sideban, misalna adi enggo sibaca terjemahen bahasa Karo, si mehulina bacaka terjemahen bahasa Indonesia, ras sidebanna (bhs, Inggris, Ibrani, Yunani, rsd).
Perlu pe ibas kita merenungken Nats e ercakap-cakap ras ndehara ntah temanta kerna kasi si nirenungken kita, gelah ertambah-tambahna bahanta ibas nusun khotbah.
Tentuna ibas ngoge nats e ertoto lebe, jenari maka ioge, ertoto ka, iulangi ka ngogesa bagem erngolih-ngolih, bandingken ras i catat.

(2) Ija terdat nats e? (Latar belakang)
Enda pe la kurang pentingna. Ija terdat nats e. Kai sijadi latar belakangna. I bas Padan si Ndekah ntah ibas padan si Mbaru, kerna kai kin e, nubuat ntah kai, ibas nabi siapai, isekin Yohanes e, ndigan nai Yesaya enggeluh, man ise rasul Paulus nulisken suratna. Payo, penungkunen-penungkunen kerna latar belakang bagi si isingetken enda kadang labo mesunah njababsa. Biasana ayat-ayat pemena ibas tiap kitab lit nge penjelasen e, terlebih ibas Alkitabta bahasa Karo ibas tiap kitab lit nge enggo ibahan pengantarna. Amin gia bage banci saja labo kerina penungkunen ndai terjawab. Emaka perlu pe mpergunaken kitab-kitab “dasar”, eme bagi Kamus Alkitab, Peta Alkitab, Ikhtisar Sejarah Suci, Konkordansi Alkitab, bagepe tentuna buku-buku tafsiren si enggo lit (Tafsiren Masa Kini jilit -3 ntah tafsiren lepas), perlu nge sibahan perbandingen. Bagi pernah ku singetken, man banta si lit komputerta gundari lit program Alkitab Elektronik, ije banci sidarami ayat-ayat si iperluken, ije pe lit peta, bahken lit ije Alkitab mbue terjemahen. Lit 19 terjemahen lengkap (PL ras PB), 15 terjemahen Padan si Mbaru.
Ngidah si e, enggo perlu kal lit perpustakanta, secara umum i gereja, bagepe secara pribadi i rumah.

(3) Setiap kata ibas nats.
Nats sigendekna pe isusun nge ibas piga-piga kata. Emaka kata-kata e perlu iselidiki ras ipertimbangken. Perlu kal si hayati kata demi kata, bagi man panganen si ntabeh, sidat nanamna entabeh adi sipan sengkerauk, sengkerauk. Bage me pe, adi sirenungken nats e kata demi kata.

Adi kune nats e lit piga-piga ayat ibas bentuk cerita ntah perumpaman, banci kita mengarahken perhatinta ku tema-tema pokok ntah pe ku tokoh-tokok/kalak singgelem peranan penting i bas nats e.

Siban contohna Lukas 7:36-50. Si memegang peranan penting i jenda eme sekalak Farisi (Simon), diberu perdosa ras Yesus. Arah telu kalak enda igambarken kerna kalak kristen si enggo puas nandangi dirina (kalak Farisi), sekalak si ndarami Kristus (diberu perdosa) ras Yesus si meteh kai pe. Seh pe ku bas pusuh manusia itehNa. Kerna tokoh-kokoh enda, pengkhotbah banci ncakapkenca sada persada ras mengahapkenca man perpulungen.

Adi nats e piga-piga kata ngenca, kita arus lebih teliti ngenenca. Siban contohna pengakun Thomas (Yohanes 20:28). "O, Tuhanku! O, Dibatangku.” Pengakun enda bages kal ertina. Pengkhotbah banci ncidahken perbedan antara kata “Tuhan” ras “Dibata” (Yesus ras Yahwe/Dibata). Yesus ras Dibata eme pribadi manusia ras pribadi Ilahi. Kata penghubung “ras” eme kiniersadan si selaras antara manusia e ras Dibata. Jenari akhiran “ku”, i pudi kata Tuhan ras bagepe kata Dibata eme pengakun pribadi. Siterakhir kata “O” eme kata seru si ncidahken keriahen ras pengangkan. Alu bage dage terjadi me pengakun perban enggo tek: Enggo ku idah Tuhan selaku manusia, ras enggo ku jemak Tuhan selaku Dibata (bd. Yohanes 1:1). Enggo kutandai Tuhan selaku “milik” pribadiku. Enda me sada pengalamen simbaru man bangku, si mpelimbarui ras mengubah geluhku: “O”,…..

C. Nusun Khotbah
Kenca enggo i tafsirken ras enggo idatken erti nats Alkitab e, bagepe relevansina nandangi kegeluhen gereja paksa enda, genduari seh me ku bas penusunen khotbah, gelah jadi sada uraian Alkitabiah si ratur, hidup, menarik ras menyapa umat ibas perbeben geluhna paksa enda.

Penting kal menyusun khotbah alu mehuli, baik man pengkhotbah sendiri bagepe nandangi perpulungen (si megi khotbah). Engkai? Sebab alu litna enggo iban khotbah e secara tertulis alu mehuli, silang-langna man pengkhotbah reh litna percaya dirina, tambah sie menghindari pengkhotbah sor sendiri ntah pe melantur, jenari perpulungen pe lebih nukah akapna nangkap pesan si isehken.

Lit singatakenca, menyusun khotbah eme bagi kalak si nggule atena (erbahan bengkau). Kenca enggo idat bahan-bahanna, ikuliti adi gundur kin, i gelati ras i bersihken, jenari i giling bumbuna, tentuna iseuaiken ras mbue sitikna gundur ras adumna (misalna manuk). Kenca enggo kuh kerina, jenari i tanggerme gelah jadi gulen/bengkau si entabeh ras ergizi. Bage me pe ibas erbahan Khotbah.

Susunen Khotbah. Memang mbue model susunen khotbah, tape umumna eme Kata perlebe (pendahuluan), Tubuh ntah pe isi khotbah, ras penutup.

Perlebe/pendahuluan
Kata perlebe eme gunana peturah minat perpulungen gelah tutus megiken khotbah si isehken kita. Alu bage dage situhuna mbue banci buat sumberna, alu cataten: Kata penaruh e arus tuhu-tuhu selket hubungenna ras pokok khotbah ntah pe thema khotbah, la banci asal menarik saja, gelah arah kata penaruh reh mesunahna akap perpulungen ngangkai thema khotbah. Bage pe kata penaruh labanci gedangsa, adi khotbah 25 menit, maka kata penaruh sindekahna 5 menit.
Alu bage dage sumber kata penaruh banci arah nats e sendiri, misalna: konteks nats ntah pe ayat-ayat si berhubungen, latar belakang sejarah nats, isu-isu ntah pe situasi si genduari si lit hubungenna ras nats, ilustrasi, alat praga, rsb.

Tubuh ntah pe isi khotbah
Ibas nusun tubuh khotbah/isi khotbah si perlebe perlu iperhatiken eme uga erbahan pembagin isi khotbah e ku bas sub-sub bagin, tentuna enda mbue itentuken model khotbah apai si pake: Thematis, tokoh ntah perikop. Maksud pembagin e eme gelah reh jelasna pokok ntah pe thema khotbah e.

• Adi bentuk khotbah thematis, pembaginna misalna:
  Bagin 1: Apakah. Misalna thema pokok ‘Kiniteken”. Kai kin kiniteken e. Enda banci ibereken penjelasen, ntah pe i jawab alu perumpamaen.
  Bagin 2: Mengapa. Engkai kin kiniteken e seh perluna/pentingna. Banci ijelasken arah ngenehen sebab akibat, kesaksin, rsd.
  Bagin 3: Bagaimanakah. Uga ibahan/uga carana banci kita erkiniteken, bagepe uga ka arusna adi enggo erkiniteken, uga ka ulihna adi enggo erkiniteken ras uga ka akibatna adi la erkiniteken, rst.
  Bagin 4: Pengkenaina/aplikasi. Ibas bagin enda, nats arah thema pokokna iperhadapken kubas situasi gegeluhen teptep wari. Kai pengkenaina, misalna uga kinatana kegeluhenta selaku kalak kristen. Enggo me nggeluh secara kiniteken? Emaka isehken me ajaken, nasehat, bagepe dorongen gelah enggeluh secara kiniteken.
• Khotbah thematis banci ka ibagi alu cara sideban, misalna kenca ijelasken bagin 1 langsung i hubungken ntah pe langsung isehken pengkenaina/aplikasina. Bapepe bagin 2, 3, kenca si e langsung ku penutup/kesimpulen.

Penutup/kesimpulan.
Bagin penutup enda seh kal pentingna ras menentuken kal. Erkiteken si e penutup enda banci ikataken “perjuangan akhir” si menentukan. Penutup/kesimpulan enda pe arus gendek ras tegas, ula lebih 3 menit. Iarapken ibas 3 menit e, perpulungen reh tangkasna man bana kerna pokok khotbah, la saja terjeng si e, gaungna banci pe terus i inget ras ijadiken pedoman ntah persinget ibas ndalani kegeluhen si tep-tep wari. Perlu si inget penutup ntah pe kesimpulen ula nari itambahi gagasen-gagasen si mbaru, si la lit hubungenna si logis ras kai si enggo ijelasken.

Lit nge piga-piga bentuk penutup /kesimpulen khotbah
Ibas erbahan penutup/kesimpulen, tentuna labo kerina khotbah e arus i dungi alu cara si seri. Perlu nge ervariasi. Perpulungen pe mesikel adi lit variasina iban. Emaka banci nge ibahan penutup/kesimpulen alu bentuk:

(1) Penerapen. Kesimpulen alu bentuk penerapen enda, menurut Dr. S. De Jong ibas bukuna “Khotbah, persiapan, isi dan bentuk” menarik man perpulungen. Contohna nats Yohanes 12:32 banci irumusken penerapenna bagenda: “adi kita nggit mbuka diri ras mereken diri man temanta manusia, eme bagi Kristus enggo mereken diriNa seh mate i kayu persilang, maka temanta manusia pe ndarami kita. Emaka kalak si ngasup persilahang bana, eme si iperluken doni enda. Janah kita pe kerina banci nge jadi kalak sibage”. Amin.

(2) Penungkunen. Misalna khotbah alu nats Yohanes 12:32. “Enggo ipeteruk Yesus Kristus baNa i kayu persilang, emaka ia ngasup nelamatken doni enda. nggit nge kita pe mpeteruk dirita gelah kalak sideban pe terkelin”? Amin.

(3) Syair. Misalna syair nde-nden GBKP no. 207, si berhubungen ras kiniseran Yesus i kayu persilang. “I uruk golgota, ku idah silangNdu. Dosaku simajekkenca, silangNdu e Tuhan. Reh aku Tuhan, ngadap man baNdu. Yesus dudurken tandu alokenlah aku”. Amin

(4) Kutipen ayat si tepat. Kutepen ayat sitepat misalna 1 Petrus 2:24 “Kristus jine enggo ngangkut dosa-dosanta ibas kulaNa i kayu persilang, gelah kita mate nandangi dosa, jenari nggeluh nandangi singena ate Dibata .....” Amin.

(5) Lukisen. Misalna, kita banci merangkum keselamaten si rehna ibas Tuhan Yesus Kristus nari alu kata-kata sekalak anak si nggo idilo Dibata minggu si lewat. Kai si ni katakenna? Nina “Erkiteken Yesus nggo ngenanami kiniseran man gunangku i kayu persilang, emaka simesuingku gundari bene nge pagi ....”. Contoh sibagenda, tuhu-tuhu erbahansa teertarik ntah pe banci memukau perpulungen, terlebih adi anak e itandai perpulungen.

D. Nehken Kata Dibata
(A) Ibas nehken Kata Dibata, perlu kal piga-piga hal siperdiateken eme:

• Sora. Sora eme sarana si seh kal pentingna ibas nehken Kata Dibata. Emaka sora arus cukup terang, jelas terbegi kalak si kundul arah pudi, ervariasi katawari lembut ras katawari megang (dinamika intonasina), bagepe pedas ras meletna (tempo), la ngusih kalak ntah pe iban-ban.
• Penampilen. I samping sora, penampilen pe la kalah pentingna. Penampilen si nimaksud eme:
  

  (a) Sikap. Sikapta ibas nehken khotbah arus teridah percaya diri, ertina la kita mbiar, ntah mela-mela, ntah ragu-ragu. Sikap percaya diri banci sicidahken arah ayo si cerah, la ragu, tenang ras bebas, la kaku. Geraken kula bagi semalna kalak ngerana i mimbar ula kaku, janah geraken si banci nganggu suasana perlu i hidari eme geraken tan si la berubah-rubah, misalna si tiap melasken kata duana tanna iangkat, bagepe mengangguk-anggukken takal ku kawes ras ku kemuhen bagi robot.

  (b) Penatap mata. Penatap mata itujuken man si megi-megi secara wajar. Ertina la man sekalak jelma, ntah sada jurusen, bagepe ntah kudatas ntah ku teruh, rsd. Perlu si inget alu penatap matanya secara wajar ku perpulungen, perpulungen e merasaken ikut terlibat, ras iperdiateken.

  (c) Tambah sie, secara umum penampilen i lebe-lebe perpulungen arus sopan, paken si metungguh ras rapi, gelah arah penampilenta teridah maka dahin nehken Kata Dibata e eme dahin si “mehaga”, dahin “badia”.

• Waktu. Pengkhotbah pe arus mperdiateken waktu/dekahna nehken Kata Dibata. Nina Pdt EP Ginting ibas bukuna “Khotbah dan Pengkhotbah”, simehulina sikitar 15 – 35 menit.

Pandaan, 1 September 2005
Pdt.S.Brahmana,S.Th

Artikel lain yang terkait: