Suplemen Bimbingen Perpulungen Jabu-jabu, Minggu 24-30 Juli 2011

Ogen : 1 Korinti 2:6-16.
Tema : Gereja Si Dewasa.

(1) Perpulungen Korinti eme perpulungen si ipanteki Paulus[1]. Kenca Paulus lawes nadingken perpulungen enda, erbage-bage persoalen turah itengah-tengah perpulungen siperlu ipehuli. Persoalen-persoalen e eme ija ngawan perpulungen nggeluh denga secara biak doni (1 Kor.3:1-3), menyembah berhala (2 Kor.6:17), perpecahen/kelompok-kelompok (1 Kor.1:10-13; 11:17-22), toleransi nandangi dosa “perzinahen” ras kejahaten seksual (1 Kor.5:1-13; 6:12-120), rsd.

(2) Ibas upaya pehuli perpulungen e, Paulus erbahan suratna 1 ras 2 Korinti. Mbue hal isehken Paulus arah suratna e sehubungen ras doktrin/ajaren sibenar ras sikap nggeluh sipayo, baik secara pribadi/perorangan bagepe perpulungen.

(3) Perikopta bahan Pjj Minggu enda eme respons Paulus si pe empatken sehubungen ras kepentaren/hikmat si erbahansa perpulungen Korinti erpengakap berita salib eme sada kebodohen. Sipemena eme 1 Korinti 1:18-25, ije itekanken Paulus maka berita kerna kematen Kristus i kayu persilang jadi kebodohen man kalak si nuju ku kebenen. Sipeduaken: 1 Korinti 1:26-31, ija mayoritas perpulungen Korinti pe dube situhuna termasuk kalak bodoh menurut ukuren doni. Sipeteluken: 1 Korinti 2:1-5, Paulus meritaken Injil labo alu erpalasken hikmat manusia. Sipemparken eme 1 Korinti 2:6-14, Ija Paulus menegasken maka labo la iberitakenna Hikmat e (kepintaren e), saja labo seri ras hikmat ntah kepentaren doni bagi sinipikirken perpulungen.

(4) Hikmat ntah kepentaren siiberitaken Paulus eme ibas Dibata nari labo ibas doni ntah penguasa doni enda. Hikmat ntah Kepentaren e eme Kristus si enggo isalibken ras si enggo keke mulihi ibas simate nari (ayat 8, bd.1 Kor.1:24,25,30). Hal enda me si jadi masalah ibas piga-piga anggota perpulungen erkiteken hikmat ntah kepentaren siiberitaken Paulus e ipahami sada kebodohen (1 Kor.1:18,23), eme sebabna ibas ayat 6 mis itambahi Paulus maka Salib Kristus eme kepentaren man kalak si enggo dewasa (Yun: teleioi) kinitekenna.

(5) Si enggo dewasa kinitekenna, sinimaksud Paulus erpalasken pemakaian kata “dewasa” ibas surat-suratna: 1 Korinti 14:20; Efesus 4:13; Heber 5:14 berarti kalak si enggo dewasa ibas Kristus ntah pe kalak sienggo bertumbuh ibas pengajaren Kristen. Ntah pe alu kata sideban kalak sienggo lit ibas ia pemeteh kerna rahasia Injil, ras tek ia kerna sie.

(6) Lit 4 ciri kepentaren Dibata (Salib):

1. Terbuni/Rahasia (ayat 7a). Rahasia berarti “kepentaren Dibata e” la terantusi manusia adi make akalna ntah kepentarenna, kecuali Dibata arah kesah Sibadia peangkakenca.
2. Terligen/Tersembunyi (ayat 7b). Engkai maka bage? Banci sibandingken pertoton Tuhan Yesus waktu itolak kalak Yahudi Ia ibas Matius 11:25.
3. Enggo itetapken/isediakan Dibata guna kemulianta ope doni enda ijadiken (ayat 7c). Arah kata enda ate Paulus mpersingeti perpulungen Korinti segelah lit konsep si payo kerna kemulian manusia. Kemulian manusia situhu-tuhu eme adi tek nandangi Salib Kristus. Amin gia banci saja doni enda erpengakap tidakenta e sada kebodohen, tapi tek kita, adi kita tek nandangi Salib Kristus maka kita pasti imuliaken ras Kristus ibas akhir jaman (Rom 8:17, 29-30; 1Tes 2:12; 2Tes 1:10).
4. Penguasa doni enda la meteh kepentaren e (ayat 8). Engkai maka bage? Erkiteken kepentaren e terligen/ibuniken Dibata (ayat 7) ras Kesah Sibadia la lit ibas pusuhna (ayat 10, 14). Tambah si e silang-lang akapna sebab penguasa e enggeluh erpalasken biak doni, make kepintaren doni emaka isalibklenna Yesus.

(7) Thema Pjj “Gereja Sidewasa”.
Ope terdauhen kita ngerana kerna Gereja Sidewasa, kuakap mehuli sinin pendapat Stephen Covey kerna kedewasan manusia ibas teori si ibanna gelarna ‘Maturity Continuum’. Menurut Covey kedewasan manusia lit 3 tahap eme (1) Dependent, (2) Independent, (3) Interdependent. Kalak si lit ibas tahap si pemena biasana cendrung nalahken kalak sideban. Kata si usur ipakena eme “kam/Engko” (“perban kam/engko nge…”). Kalak si lit ibas tahab sipeduaken kecendrungenna la nai nalahken kalak tapi nalahken dirina. Kata si usur pakena eme “aku/saya” (“aku labo ngasup ngelakokenca”). Tapi adi kalak si lit ibas tahap sipeteluken, kata si usur ipakena “kita”. Alu kata sideban kalak si lit ibas tahap sipeteluken enda enggo mikirken kepentingen ras-ras/bersama, labo nari mikirken dirina saja. Enda adi tanda kalak si enggo dewasa menurut Stephen Covey. Uga sinimaksud “Gereja Sidewasa”? Erpalasken kai siisingetken ibas poin 5 berarti perpulungen si enggo bertumbuh ras nggeluh ibas pengajaren krinten sipayo, eme kalak sienggo lit ibas ia pemeteh kerna rahasia Injil, ras tek ia kerna sie. Enda banci ijabarken:

1. Ngaloken Kepentaren Dibata eme Salib Kritus (Cross), labo kepentaren doni si menganggap salib eme kebodohen (bd. 1 Korinti 1:18, 21, 23). Eme si isingetken Paulus ibas ayat 7. Kepentaren si niberitaken Paulus eme Yesus Kristus si enggo mate isalibken (bd.Kolose 2:2; 4:3). Endame rahasia sinimaksud Paulus guna iberitakenna (bd.1 Kor.4:1). Emaka kerina aktifitas ras kiniteken gereja erpusat ku bas salib.
2. Lit ibassa Kesah Sibadia (ayat 12). Tandana eme ngangkai kerina pemere Dibata. Pemere Dibata simbelinna eme keselamaten. Alu bage katawari pe ermeriah ukur (Filipi 4:4) ras ngataken bujur (Kolose 2:7; 3:15, 17).
3. Nggeluh ibas kiniersadan Gereja (Unity). Gereja Tuhan eme kula ni Kristus, lit ibas kiniersadan. Emaka Gereja Sidewasa teridah pe ibas sikeleng-kelengen, saling peduli, sisampat-sampaten ras saling mpegegehi.
4. Enggeluh ibas pelayanen (band. 1 Petrus 2:9). Gereja sidewasa teridah pe arah pelayanen sinilakokenna, si la saja terpokus ku internal anggota tapi pe external (kerina jelma).
5. Mandiri/Njayo, ibas bidang Teologi, daya dan Dana.

Jatiwaringin, 22 Juli 2011
Pdt.S.Brahmana
--------------------------

[1] Bersama dengan Priskila dan Akwila (1Kor 16:19) dan rombongan rasulinya sendiri (Kis 18:5), Paulus mendirikan jemaat Korintus itu selama delapan belas bulan pelayanannya di Korintus pada masa perjalanan misinya yang kedua (Kis 18:1-17).

Artikel lain yang terkait: