Khotbah Kejadian 50:15-21, Minggu 17 Juli 2011 (Bahasa karo)

Introitus :
Adi lit kalak erbahan jahat man bandu, ola balas alu kejahaten. Bahanlah si mehuli rikutken pengakap jelma si nterem (Roma 12:17)

Bacaan : Kisah Para Rasul 19:1-7; Khotbah: Kejadian 50:15-21

Thema :
Kesah Sibadia Mpengasup kita guna Ngalemi

(1) Kata Dibata siman oratenta Minggu enda eme Kata Dibata si enggo megati sioge, sibegiken pe penjelasen, apakah e ibas PA, PJJ, bagepe khotbah Minggu. Payo, arah sada perikop banci mbue sidat pengajaren. Arah bagin ntah hal siapai isehken penekanen kata Dibata e. Minggu enda kita ibabai kubas penekanen uga Yusuf merespons kebiaren senina-seninana keca bapana Yakub enggo mate. Kebiaren seninana eme Jusuf mbalas kejahaten sienggo ilakoken ndube eme ersura-sura munuh Yusuf, tapi kedungenna ndayaken Yusuf jadi budak man kalak Ismael. Perbahanen enda tentu sada perbahanen sijahat kal. Uga Yusuf menyikapi kebiaren senina-seninana? Endame si itekanken ibas khotbahta enda.

(2) Kai sinilakoken Yusuf nandangi senina-seninana kenca bapana, Yakub mate eme ternyata la saja Yusuf la mbalas dendam, tapi erjanji mpekena-kena sininana ras anak-anakna. Engkai maka bage sikaf Yusuf? Lit 3 hal banci sipelajari eme:

• Pengakun tulus senina-seninana mindo pengalemi salah. Lit kuasa penyesalen ras pertobaten si icidahken arah perbahanen (ayat 15-18)
• Pemahamen ntah penggejapen maka labo lit hakna gancih Dibata menghukum kalak (ayat 19, bd.Roma 12:19).
• Penggejapen kesuksesenna, banci ia jadi penguasa Mesir eme erkiteken Dibata. Yusuf rukur secara positif, maka kai siibahan senina-seninana ndube eme dalan-dalanna la saja Dibata peganjangken Yusuf jadi penguasa Mesir, tapi lebih ndauh lit rencana Dibata ngasuhi nterem jelma arah Yusuf.

(3) Kai sinilakoken Yusuf nandangi senina-seninana ibas perikopta enda, siakui sada hal simehuli singena ateta, tapi ndalankenca labo nukah. Ngalemi salah kalak ningen, melaskenca ngenca sukah tapi ndealankenca mersera. Endame si megati terjadi. Emaka labo mamang ateta adi lit nge siteh ersenina ia, ntah erturang entah kalimbubu la siperiahen. Silebih ironis, lit sapih-sapih nora sierdahin gereja la siperkuanen. Lebih parah ka, lit pertua/diaken la sibage ras la enggit idameken. Uga nge siakap kerna sie? Jababna enggo jelas e la payo. Ras arus bertobat, adi lang bene nari nge kita, sabab kata Dibata ibas Matius 6:14-15 jelas kal, ije tersurat:“Adi ialemindu salah kalak, salahndu pe ialemi Bapandu si i Surga ka nge. Tapi adi la ialemindu salah kalak, salahndu pe la ialemi Bapandu”. Kerna sienda banci pe sibandingken kai si ituriken ibas Mat 18:21-35. Ije ituriken lit sekalak juak-juak rutang 10 ribu talenta la nari ia ngasup nggalarisa man raja, emaka mekuah ate raja ras mutihken utangna. Tentu meriah akap juak-juak e. Tapi waktu mulih kurumah jumpa ia aras temanna si rutang man bana 100 dinar ngenca (1 talenta = 6000 dinar, 1 dinar eme upah erdahin 1 wari)[1]. Kai sinilakokenna, itamakenna temanna e kubas penjara erkiteken lenga ia ngasup nggalari utangna si 100 dinar e. Megi perbahanen juak-juak e, nembeh ate raja, idilo me ia. Nina raja e, “'Kam kalak jahat! Erkiteken pemindonndu, utangndu si bage buena enggo kusasapken. Kam pe aturna mekuah atendu temanndu sapih juak-juak bagi mekuah ateku kam.' Ibas ayat 34 “Merawa-rawa kal raja e, jenari itamakenna juak-juak e ku bas penjara seh igalarina kerina utangna."

(4) Tentu kita la ateta bagi juak-juak e. Emaka arah khotbah Minggu enda kita iajuk segelah gayata nggeluh eme mengampuni. Memang gaya nggeluh bage la nukah erkiteken dosa sipernah ncerawisi manusia, si erbahansa hawa nafsu mementingken diri/egois ngkuasai manusia, ras salah sada tampilenna eme mesera ngalemi salah kalak. Emaka ibas dirina sendiri manusia labo ngasup meneken sifat e, kecualiu lit kuasa diluar diri manusia si pengasup meneken ntah meminimalisasi pengaruh e. Kuasa e eme Kesah Sibadia. Emaka themata minggu enda menekanken si e “Kesah Sibadia mpengasup kita guna ngalemi”. Ula balas kejahaten alu kejahaten, tapi bahanlah mehuli rikutken pengakap jelma sinterem ningen e, adi la kin erkiteken kuasa kesah Sibadia labo tuhu kita ngasup ndalankenca.

Lit 3 alasen engkai maka kita arus ngalemi salah kalak:

1. Erkiteken Dibata enggo ngalemi salah dosanta (Mat 18:21-35). Penggejapen enda arus lebe lit ibas kita maka kita ngasup ngalemi salah kalak. Engkai maka mesera siakap ngalemi salah kalak? Erkiteken la sibadingken “utang-utang” (dosa/kesalahen) si enggo rusur sibahan man Tuhan.
2. Alu sialemi salah kalak berarti enggo sidalanken pedah Dibata, bagepe kita enggo ngagui kerina beban-beban eme sakit hati, kebencian, kesedihen, rsd bagi isingetken ibas Heber 12:1, berarti kita enggo pasti reh sehatna sabab salang pusuh ukurta. Inget nina kata Dibata: “Hati yang gembira adalah obat yang manjur, tetapi semangat yang patah mengeringkan tulang.” (Amsal 17:22).
3. Ngalemi eme syarat pertotonta ibegi Dibata, ngaloken mujizar, Kiniteken (Matius 9:1-8).
   
   Adi sioge ibas Matius 9:1-8, tujun kalak lumpuh e ras empat kalak temanna reh ku Tuhan Yesus eme gelah ngaloken kesembuhen, labo pengampunan. Tapi engkai maka nina Tuhan Yesus "Tetapkenlah ukurndu, o anakKu! Dosandu enggo ialemi."? Kepeken guna kesembuhen, pemena dosa arus lebe ialemi.

Tambah sie arus ka si inget:

1. Amin ngalemi salah kalak labo sada hal membanggaken man doni enda, tapi man kalak sierkiniteken la bage, man banta e sada kebanggan.
2. Kejahaten siibalas alu kejahaten labo menyelesaikan masalah, tapi sebalikna kejahaten reh ningkatna.
3. Adi kita pe mesikel ntah metedeh gelah ialemi kalak salahta, tentuna bege me pe kalak sideban (Lukas 6:31, Mat. 7:12).
4. Penggejapenta enggo ipimpin, enggo ipasu-pasu Dibata erbahansa kita la dendam man kalak sipernah menjolimi ntah erbahan jahat man banta, sebalikna ngasup kita ngalemi salahna. Eme si ilakoken Yusuf ibas perikop siman renungenta. Amin

Jatiwaringin, 17 Juli 2011
Pdt.S.Brahmana

-------------------------------------------

[1] 1 Talenta = sebesar 6000 dinar (1 dinar adalah upah harian), jadi untuk mengumpulkan 1 talenta maka seseorang arus mengumpulkannya selama 16, 43 tahun. Jikalau 10 ribu talenta berarti harus bekerja 164.383 tahun.

Artikel lain yang terkait: