Khotbah Lkas 15:11b-32, Minggu 10 Juli 2011 (Bs.Karo)

Introitas :
I bas kiniseranku nari kulebuh Kam o TUHAN janah ialoiNdu aku. I bas doni kematen si mbagesna nari nderkuh aku mindo penampat, e maka ibegikenNdu aku (Yunus 2 : 2).

Pembacaan : Mazmur 107 : 1-22; Khotbah: Lukas 15:11b-32

Thema :
"Kembalilah, Allah Senantiasa menantikan engkau" (Mulihlah! Dibata enggo sikap ngalo-ngalo kam).

Bena-bena kiniseran eme la patuh man Dibata. Hawa ras Adam la patuh nandangi pedah Dibata eme arah man buah kayu sinilarang Dibata emaka kena ukumen Ia. Nina Dibata man diberu e, "Kutambahi kiniseranndu sanga mehuli kulandu. Mesui akapndu sanga mupus. Aminna bage pe metedeh atendu rusur man perbulangenndu, tapi perbulangenndu ngkuasai kam." Nina Dibata kempak dilaki, "Perban ibegikenndu ndeharandu, janah ipanndu buah batang kayu si Kularang e, e maka kena sumpah taneh enda erkiteken kam. Terpaksa kam latih erdahin ngusahaisa kidekah geluhndu, gelah banci iberekenna cukup nakanndu. Bagem seh paksa genduari pe, kalak si lapatuh man Dibata la banci lang ngenanami kiniseran. Kerna si enda isingetken Pemazmur pe arah ogenta ibas ayat 9 ras 10 “Lit ia tading i bas kegelapen, igari dingen ipenjaraken, erkiteken ilawanna perentah Dibata, erkiteken itulakna ajarenNa. E maka labuh ia erkiteken dahin si mberat, guling ia, la lit si nampatisa”. Payo, lit nge siidah kalak sila patuh man Dibata tempa senang geluhna, tapi e kentisik waktu nge ngenca. Timailah adi la jera “akapinang”. Ibas Pustaka Sibadia pe mbue nge contohna, misalna Nabi Yuna. La ia patuh nandangi perintah Dibata, kai jadina? Inanamina kiniseran 3 wari 3 berngi ibeltek nurung. Bagepe, bahan Khotbahta Minggu enda, Lukas 15:11b-32, ija ituriken anak singuda si ngikuti sura-sura pusuhna, seh maka lanai ia mehamat man bapana. Nggeluh denga pe bapana, Ipindona ntah idesakna segelah bapana e erbahan pembagin erta silit[1], jenari lawes ia nadingken bapana ku kuta sindauh. Ije isiasiakenna duitna e. Adi sioge ibas ayat 30 ituriken maka erta sinialoken anak singuda e ipoya-poyakenna ras diberu perdenggal. Tuhu-tuhu anak singuda enda enggo ersalah. Akibatna kai? Kiniseran! Kiniseran kai? Adi nabi Yuna kiniseranna eme 3 wari 3 berngi I beltek nurung, banci sibayangken uga kiniseran Yuna. Adi kiniseran anak singuda enda, isingetken ibas ayat 14-16, la saja kelihen tapi keadanna pe bagi sekalak budak. Tuhu-tuhu sada “kehinan”, terlebih man kalak Yahudi si mengharamken babi, jadi sierdahin mere man babi, tuhu-tuhu keadan si seh kal hinana.

Kita uga sipulung enda, enggo me kita patuh man Dibata? Payo patuh pe kita man Dibata banci saja sinanami kiniseran, tapi adi erkiteken patuh kita man Dibata ngenanami kinisera, secara kiniteken meriahlah siakap. Bagi nila rasul Paulus ibas 2 Tesalonika 1:10 “janah man bandu si ngenanami kiniseran e, ibereken Dibata kemalemen ate…! Tapi uga adi erkiteken la patuh maka ngenanami kiniseran? Enggo kita mberat, maksudna eme ibas doni enda pe mesui ateta, janah reh suina ka ateta adi enggo nadingken doni enda, sebab enggo isikapken inganta neraka. Adi bage kai nge arus siban? Erlajar kita arah kata Dibata Minggu enda.

1. Ibas Intoritus, Juna 2:2 nina “I bas kiniseranku nari kulebuh Kam o TUHAN janah ialoiNdu aku. I bas doni kematen si mbagesna nari nderkuh aku mindo penampat, e maka ibegikenNdu aku”. Lit ije kata “kulebuh” ras nderkuh”. Kata enda nuduhken lit penyesalen ras pengendesen diri. Jadi adi paksa enda lit kiniseranta erkiteken kita la patuh man Dibata, bahanlah bagi Juna enda. Menyesal ia, jenari iendeskenna dirina. Janah adi sioge seterusna turi-turin Juna enda, maka kedungenna ipulahi Dibata ia.
2. Bagepe ibas kata Dibata sijadi bahan khotbah Minggu enda. Ibas ayat 17-20 ituriken (1) rukur ia. Berarti turah kesadaren jenari ievaluasina dirina; (2) Isadarina ia enggo erdosa, janah dosana e isadarina seh beratna erbahansa lanai ia metunggung igelari anak bapana; (3) berkat ia. Ertina kesadaren ras penyesalen arus iikuti tindaken. Kai siterjadi? Bapana ngalo-ngalo ia alu meriah ukur. Ternyata respon bapana e lebih asangken siterukurina ndube. Arapen anak enda sederhan saja eme pulah ia ibas kiniseran kelihen.

Emaka ntah uga gia keadanta genduari, ntah ibas kiniseran si mesangat gia, ula mbiar ntah sangsi, Dibata si sembah kita ibas Yesus Kristus ngasup kap mulahi kita, ras nggit kap ngalemi salah dosanta. Bageme gambaren Dibata arah sosok bapa ibas perumpaman Lukas 15:11-32 kata Dibata siman renungenta ibas Minggu enda. Sipenting gundai eme:

1. Bagi kai nina themata Minggu enda: Mulihlah! Dibata nggo sikap ngalo-ngalo kam. Mulihlah banci iertiken JERAlLAH. Jeralah adi kin sisadari kita enggo lanai patuh. JERA adi ipegedang berarti: Jenda Nai Robah Aku.
2. Komitmen Jera e idalanken, ilakoken. Anak singuda ibas bahan khotbahta, labo banci ia pulah ibas kiniseranna nari adi la ilakokenna/idalankenna tekadna e, eme “berkat ia ndahi bapana” (ayat 20).

Jadi bagem man banta kerina perpulungen. Ibas Minggu enda lit ka acarata khusus eme ngalo-ngalo Pdt.Abdi Edinta Sebayang ras serah teraima pelayanen ras Pdt.M.K.Sinuhaji. Kerehen pendeta enda tentuna segelah perpelungen arah pelayanen pendeta enda tetap megegeh ras patuh nandangi kata Dibata. Alu bage meriah dingin malem ateta kerina. Sebab ulih kepatuhenta eme Dibata simasu-masu kita alu mereken kerina simehuli siiperluken kita seh maka meriah dingen malem ateta tetap. Amin.

Pondok Gede, 10 Juli 2011
Pdt.S.Brahmana
--------------------------------------------------

[1] Ibas buku Pemahamen Alkitab setiap hari Lukas sinikarang William Barclay, ibas halamen 299 nina Barclay “permintaan anak bungsu itu terkandung kekejaman tertentu yang tanpa perasaan”. Sebab di bawah hukum Yahudi seorang bapa tidaklah bebas membagi-bagikan hartanya kapan saja ia suka. Jadi pembagian harta sebelum bapanya mati adalah sesuatu yang tidak lazim.

Artikel lain yang terkait: