Introitus:
“O Bapa, ertoto Aku man banNdu gelah ersada min ia kerina. Ersadalah min ia ras Kita, bagi Kam ersada ras Aku janah Aku ersada ras Kam. Ersada min ia gelah tek doni enda maka Kam me sinuruh Aku”
Ogen: Lukas 10 : 1-9; Khotbah : Johanes 17 : 18-26
Tema: “Jesus Kristus Eme Palas Kiniersadaan Solidaritas”
Kata Perlebe
Umumna manusia i doni enda merhat kel iperdiateken kerna kegeluhenna, erkiteken si e kerina manusia ersura-sura ndatkenca. Cara-cara tiap manusia guna tersehi siniarapkenna berbeda-beda. Tapi situhuna, kerina si iperjuangken manusia e mekatep bersifat kedagingen entah pe duniawi, berbeda kerna kai tujun Yesus reh ku doni enda, eme guna mperdiateken ras nelamatken manusia. Biasana manusia berusaha gelah dirina saja senang, tapi Yesus reh ku doni enda gelah manusia senang. Adi sinehen arah dampar si enda, ibabai Yesus manusia gelah ola dirina saja iperdiatekenna, tapi pe nggit ras harus mperdiateken kalak sideban. Enggo me silakoken perbahanen si solider nandangi kerina manusia, terutama warga GBKP? Adi enggo, seh ija? Adi lenga, uga siban? Tahun 2012 enda si jadi tema perayaken GBKP secara sinodal, e me kerna peningkaten solidaritas internal GBKP. Guna mewujudken tema enda, maka Pekan Penatalayanen wari/berngi si pepituken enda ibabai kita gelah tetap solider nandangi kerina manusia khususna warga GBKP, janah Yesus Kristus jadi palas kiniersadaan solidaritas i tengah-tengah kegeluhenta.
Isi (Johanes 17 : 18-26)
I bas konteks enda icidahken Yesus kerna tujun si ate ipesehna man ajar-ajarna kerna kai si harus ibahanna i tengah-tengah kegeluhenna i doni. Si nimaksudken Yesus e me gelah kerina ajar-ajar tetap ersada ras patuh bagi Ia patuh ras ersada ras Dibata sinuruh Ia. Kiniersadaan si nimaksudken Yesus e me gelah tetap ndalanken ras mengutamaken kai si ngena ate Dibata. Tapi kinatana keberadaan doni enda labo menukah ngalokensa erkiteken doni enda labo nandai kai si isuraken Dibata, sebab doni enda enggo ndabuh ku bas dosa. Amin bage gia, ajar-ajar si enggo nandai ras ngaloken keleng ate Yesus harus berani tampil beda ras doni enda. Em gunana ajar-ajar isuruh guna mabai kerina manusia gelah banci ngaloken kai si jadi sura-sura Dibata, e me ngkelengi Tuhan Dibata ras ngkelengi teman manusia. Perjuangan si ilakoken ajar-ajar pasti mbue tantangen si nihadapina, guna menghadapi tantangen e ajar-ajar harus tetap ersada ras si nuruh ia (Dibata). Tanpa ersada ras sinuruh ia, labo ia ngasup ndalankensa (bnd. Joh. 15:5). Sebab Yesus sendiri pe maka ngasup reh ku doni enda erkiteken Ia ersada ras Bapa si nuruh Ia. I bas ndalanken kerina misi gelah seh bage si niarapken, tetaplah njemak tujun utama, e me gelar Tuhan tetap ipermuliaken ras keleng ate Yesus tetap icidahken. Alu bage, kai si niarapken Yesus man ajar-ajarNa e ka nge si niarapken Yesus man banta kerina manusia selaku ajar-ajarNa. Kerina kita si enggo ngaku tek man Yesus harus tetap ndalanken perintahNa enda, e me menjadi pelaku-pelaku kiniersadaan ras kekelengen. Ndalanken kiniersadaan labo berarti kerina harus seri, tapi si nimaksudken gelah ersada tetap i bas Yesus, sebab kerina manusia erbage-bage talenta si nibereken Dibata man banta. Tapi si penting, kita tetap nginget maka kai si ibereken Dibata man banta tetap sipakeken guna ncidahken kekelengen. Alu bage, meriahlah siakap adi temanta ermeriah ukur, sedihlah siakap adi temanta sangana erceda ate, ula sebalikna bagi lit istilah SMS (Susah Melihat Senang atau Senang Melihat Susah). Jadi marilah kita kerina tetap njemak kai si bahan Yesus si mediate ras kepate nandangi kita manusia si enggo erdosa, i ja Yesus reh ku doni enda labo membeda-bedaken kerina manusia, baik arah suku bangsa, ras, adat istiadat bagepe status sosial, pendidiken, jabaten ras sidebanna.
Aplikasi
Arah pelayanen Yesus banci kita erlajar gelah tetap ngusih kai si bahanNa. I ja Yesus solider nandangi kerina manusia ras doni enda bagepe kita gelah solider nandangi kerina manusia alu tetap erpalasken kekelengen si rehna i bas Yesus Kristus nari. Sadar kita maka labo lit manusia si sempurna sebab manusia dem alu keterbatasen. I bas si enda kita perlu berbagi alu tetap ersada ras Kristus, janah kai si bahan kita gelah Dibata tetap ipermuliaken. Arah ogennta Lukas 10 : 1 - 9 icidahken uga peran ajar-ajar i bas ndalanken printah Yesus maka tetap kerehenna mereken dame man kalak si ijumpaina. Bagepe kita setiap kai si ilakoken baik arah perukuren, pengerana ras perbahanen mereken dame ras kemalemen ate man kalak sideban i bas kerina dampar geluhta. Guna banci ndalanken si e kerina, la banci lang tetap kita mindo gegeh man Dibata, sebab gegehta terbatas. Sue ras introitusta iajuk gelah tetap kita ertoto selaku senjata i bas ndalanken kerina perbahanen-perbahanen si mehuli (bnd. Jakub 4: 2b). Rikutken temata, “Jesus Kristus Eme Palas Kiniersadan Solidaritas” ncidahken ula sipakeken gegehta lako erbahan si mehuli, tapi pakelah gegeh kuasa Kesah Si Badia. Sebab adi sipake gegeh kesahta, la banci lang kesah-kesah me kita (latih siakap). Erdan-danken si e, tetaplah kita kerina erlumba ncidahken kiniersadan ras erbahan si mehuli si tetap alu keleng ate si erpalasken Yesus Kristus gelah kegeluhenta dem alu kedamen segedang-gedang geluhta. Bagi sada pantun, nina :
La terpilasi ulina Pancasila
Si ngerakut kita gelah sikeleng-kelengen
Si ernalem man Yesus geluhna la sia-sia
Jumpasa dame bagepe ketenangen
Pdt. Abdi E. Sebayang M.Th
GBKP Depok-LA
Catatan Sermon:
1. Pertoton Tuhan Yesus man ajar-ajar ibas konteks Solidaritas eme SMS (Senang melihat orang senang, dan susah melihat orang susah).
2. Sehubungen ras ogen, dua-dua kalak berkat ertina segelah sada ras sidebanna saling ersolidaritas, jadi contoh nggeluh ersolider sada ras sidebanna. Jenari “ola baba dompet, gajut-gajut...rst...banci ipahami maka ibas ajar-ajar ngelakoken perintah Tuhan, ibas kita melayani, turah pe nandangi kalak si ijumpai ntah ingan kesilang solidaritas man ajar-ajar, man banta, ibas konteks enda eme ibas bentuk penampat kebutuhen nggeluh ajar-ajar.
0 komentar:
Post a Comment