Sermon Pjj Yohanes 13:34-35, tanggal 12-18 Februari 2012

Ogen : Yohanes 13:34-35

Thema: “PERAYAKEN NGGELUH”

Tujun:

1. Gelah ngawan Perpulungen erlajar ibas nggeluh sikeleng-kelengen erpalasken kata Dibata ibas jabu, gereja ras masyarakat.
2. Gelah ngawan perpulungen ndalanken kekelengen alu la pekulah-kulah.

Catatan Sermon

1. Kai nge perayaken nggeluhta? Jawaben penungkunen enda penting ras mpengaruhi uga kin harusna kita ndalani kegeluhen enda.
2. Kentisik nari ngenca Aku ras kam (ayat 33)[1]. Isadari Yesus maka lanai ia ndekah ibas doni enda. Iteh Yesus maka lit limitna nggeluh enda. Nggedang ntah nggendek geluhta Dibata ngenca metehsa. Saja sipasti lit limitna. Adi bage kai nge arus siban? Adi Yesus, idahikenna dahin siisuruh BapaNa alu mehuli. Ia fokus nandangi penuruh BapaNa, ras setia she mate ikayu persilang. Jadi perayaken geluh Yesus ibas doni enda jelas eme ngelakoken dahin si iendesken BapaNa man baNa erpalasken kekelengen agave.
3. Perintah simbaru sinimaksudken labo ibas erti perintah enda lenga pernah lit ntah la lit ibas Padan Sindekah, tapi ibas erti perintah si mbaru enda eme “cinta kasih” (kekelengen) si istimewa, ntah pe lebih sempurna asangken sinituntut ibas Padan Sindekah, erkiteken: (a) lebih ersifat persaudaraan mesra, (b) meliputi kerina bangsa, (c) luhur tanpa ngarapken balasen, (d) meneladani kekelengen si icidahken Yesus eme kekelengen agave man kerina jelma la erdobahen.
4. Perintah simbaru enda si lang-langna lit dat ulihna dua. Sipemena, ndalanken perintah simbaru enda berarti kita nggo ngelakoken perintah Tuhan, bagi Yesus nggo ngelakoken perintah bapaNa; sipeduaken, jadi kesaksin man doni enda maka payo kita me ajar-ajar Yesus.
5. Mbue kita jumpa kalak kristen, lit deba guna ncidahken ia kalak kristen pakena salib, babana Alkitab, ngaku kalak kristen. Deba usurka ia ngerana kerna kata Dibata, membela kalak kristen, rsd. Tapi arah kata Dibata siniorati kita ngingetken maka payo ntah lang kita kalak kristen ukurenna eme ngelakoken printah simbaru sinimaksud Yesus eme “sikeleng-kelengen”, bagi Yesus enggo ngkelengi kita.
6. Tantangen sikeleng-kelengen bagi si cidahken Yesus eme (a) kecendrungen manusia kurang nggit erkorban terlebih nandangi si labo ibas kelompokna, keluargana, temanna, rsd. (b) egoisme, (c) filosofi endi enta.
7. Tips ngasup ndalanken sikeleng-kelengen:
   
   (a) Kita labo ngasup sikeleng-kelengen adi sipenalem gegehta, emaka endesken dirinta man Dibata, penalem Kesah Sibadia erdahin ibas kita, (b) Inget maka kita pe enggo ikelenge, emaka kita pe arus sikeleng-kelengen, (c) Lit upah ibas ndalanken perintah simbaru e, eme kita nggo ndalanken pedah Dibata. Janah kalak si ndalanken pedah Dibata ipasu-pasu Dibata kita (oge: Mazmur 1:1-3; 128:1-6, rst), terlebih ngaloken keselamaten/kegeluhen si rasalalap (Bd.Markus 13:13, Roma 6:22, rst), (d) Perayakenta eme ku surga rumah Bapa ingan kesenangen e.

Pdt.S.Brahmana

-------------------------------
[1] Dia mulai menjelaskan kepada mereka mengenai pengkhianatan-Nya, kematian-Nya, dan kenaikan-Nya dengan kata-kata yang lemah lembut. Dalam pasal 7:34 Dia sudah berkata kepada orang-orang Yahudi, "Kamu akan mencari Aku, tetapi tidak akan bertemu dengan Aku, sebab kamu tidak dapat datang ke tempat di mana Aku berada (Yohanes 8:21). Ternyata hal itu berlaku juga bagi mereka, dan sudah tiba saatnya mereka juga harus diberitahu.

Dia tidak menguraikan istilah tempat. Istilah itu mungkin merujuk pada kematian-Nya di salib, ataupun pada kenaikan-Nya ke sorga.

Artikel lain yang terkait: