Suplemen Bimbingen Pjj tanggal 4-10 Maret 2012, Matius 25:15-30

Ogen: Matius 25:15-30

Thema:

Ngelai alu kiniteken si enggo ialoken ibas Dibata nari

Tujun:

1. Gelah Ngawan ni perpulungen meteh kai sienggo ialokenna ibas Dibata nari arus ielaken
2. Gelah ngawan niperpulungen patuh ras setia ngaloken sienggo ibereken Dibata man gereja ras perpulungen.

Catatan Sermon

1. Judul kata Dibata siman oratenta, Matius 25:15-30 eme Perumpaman kerna telu kalak juak-juak. La iban perumpaman empat kalak juak-juak, lima kalak ras seterusna. Engkai? Sabab sinitekanken arah perumpaman enda eme kerna “respons ibas nikapi tanggungjawab sinibereken Dibata”. Jadi telu kalak enggo mewakili banci ngangkai pesan arah perumpaman enda.
2. Kerajan Surga ikomparasiken ntah iperbandingken ras sekalak tuan siberkat atena ku negeri sindauh. Erkiteken si e idilona juak-juakna, jenari iberekenna erta-ertana gelah ipokokken juak-juak e, masing-masing 5, 2 ras 1 talenta.
3. Jumlah erta si ibereken guna ipokokken[1] la seri, masing 5, 2 ras 1 talenta. Engkai maka bage? Kesanna me la adil? Kalimat kunci guna mereken jawaben kerna sienda eme kata “sekalak-sekalak iberekenna rikutken kengasupen juak-juak e”. Enda nuduhken maka itandai tuan e kengasupen masing-masing juak-juakna e. Alu kata sideban jumlah talenta si nibereken eme manifestasi kapasitas juak-juak ibas ngelola ntah mokokken erta e. Jadi labo lit unsur ketidak adilan ntah pilih kasih, tapi sebalikna banci pe ipahami perbedan e eme erkiteken keleng ate.[2]
4. Kata talenta biasa iertiken eme “bakat alami”. Tapi Talenta sinimaksud ijenda eme “mata uang” si menggambarken jumlah sen. 1 talenta ibas paksa e seri ras 6 ribu dinar[3]. 1 dinar seri ras upah minimum erdahin sada wari[4]. Adi gundari upah erdahin Rp.50.000/wari, sada talenta berarti Rp. 300.000.000. Alu bage 1 talenta eme jumlah sen si la sitik guna memulai sada usaha.
5. Teluna juak-juak enda ikelompokken jadi dua, eme juak-juak situtus ras juak-juak sijahat. Juak-juak si ngaloken 5 ras 2 talenta janah arah usaha sinilakokenna datna untung 5 ras 2 talenta ka, amin gia secara jumlah nominal la seri tapi duana ikelompokken selaku juak-juak situtus, sebalikna juak-juak si ngaloken 1 talenta ikataken juak-juak si jahat[5]. Pengelompoken enda iban erpalasken respon ibas menyikapi talenta siibereken tuan e. Jadi kepeken si jadi penekanen ijenda eme labo soal mbue ntah sitek talenta si ibereken, tapi soal uga ngergaken ras ndalanken kepercayan siibereken e alu tutus.
6. Arah perumpaman enda si lang-langna lit 3 hal sibanci sipelajari:
   
   1. a. Kerina si lit ibas kita pemere Tuhan kap ras kedungenna arus ka ipertanggungjawabken kerina e man Tuhan.
   2. Sekalak-sekalak kita ibereken tugas ras tanggung ntah peranan penting si berbeda. Emaka ula sipersoalken kerna si e ntah sibanding-bandingken seh maka kecewa kita perban talenta si ibereken man banta lebih sitik ntah la bagi ukur, tapi kai pe pemere e si syukuri jenari sidalankenlah alu tutus tanggungjawab siibereken e. Sitik ras mbue labo e nuduhken kita berbeda ilebe-lebe Dibata. Arah kata Dibata enda labo kepe si mbue e lebih ipehaga Tuhan. Perdiateken apresiasi si ibereken tuan e nandangi juak-juak siiberena 5 ras 2 talenta ibas ayat 21 ras 23.
   3. Lit upah nandangi kalak si setia ras si jahat. Si setia bengket ku rumah Bapa I surga, ras si jahat isampetken ku bas ingan si gelap, je tangis me ia dingen mesui kal atena (neraka).
7. Mari si pegermetken piga talenta siibereken Dibata man banta, jenari enggo me sisyukuri ras sipakeken (ikembangken) alu payo ras dem tanggungjawab talenta e? Inget maka ibas paksana kerina pemere e sipertanggungjawabken I lebe-lebe Dibata.

Jatiwaringin/Pd.Gede, 2 Maret 2012

Pdt.S.Brahmana

-----------------------------------------------

[1] Talenta si ibereken e labo ibere bage-bage saja tapi ipercayaken guna ipokokken, berarti lit pertanggungjawaben.

[2] Banci ianalogiken ras tugas ngangkat barang-barang. Selaku orang tua labo sisuruh anakta umur 6 tahun ngangkat barang siberatna 30 ntah 50 Kg, tapi si suruh anakta sideban si enggo galang, misalna si enggo permata ntah remaja. Engkai maka bage? Sabab sitandai anakta, siteh gegehna sinuduhken keleng ateta.

[3] Drs.J.J.de Heer, Tafsiran Alkitab Injil Matius. Jakarta: BPK Gunung Mulia, 1994, hal.368

[4] Bd.Matius 20:2

[5] Ikataken jahat erkiteken la ndalanken tanggungjawab si nisehken alu tutus ras setia. Alasen juak-juak si la ndalankenca ikataken ibas ayat 24-25.

Artikel lain yang terkait: