Suplemen Bimbingen Pjj tanggal 29 April-5 Mei 2012

Ogen    : Kuan-kuanen 27:17; Efesus 4:25-32

Thema  : Erlajar Segedang Geluh

Cataten:

(1) Ibas kinata kegeluhen manusia nai nari sen gundari maka kalak sierpemeteh lebih ihamati asangken si la erpemeteh. Reh buena pemeteh sekalak jelma si erguna nandangi jelma sinterem reh belinna kehamaten ntah penghargan ibereken man bana (malang, mehamat kalak man bana). Tambah si e, khususna ibas jamanta genduari kalak si la terus erlajar (mengupdate) diri la banci lang ugapa pe ia ketadingen, ras e merugiken diri sendiri. Katakenlah sekalak guru, adi la ia terus erlajar ras erlajar sementara kemajun ilmu pengetahuan terus berkembang banci itokohi murid siniajarna e ia, sabab ibas jaman teknologi informasi si luar biasa genduari la saja isekolah murid e banci erlajar, tapi arah nbaca mbue buku bagepe arah menggunaken internet.

(2) Ngerana kerna erlajar, bagi enggo isingetken pe maka labo kepe secara formal [1] saja tapi pe secara informal[2] ras non formal[3]. Alu bage dage, ise atena tetap eksis la banci lang arus erlajar terus ras terus erlajar. Kuakap endame makna si melekat arah istilah “Long life education”.

(3) Mbue manfaat erlajar, antara lin”:

1. Arah erlajar sidatken hal simbaru si lenga siteh ope sie
2. Kalak si terus erlajar kualitas geluhna pasti meningkat ras kegeluhenna reh gunana nandangi jelma sinterem.
3. Reh ngasupna ndarami solusi ibas permasalahen sinihadapi, terlebih adi nggit ia erlajar arah pengalamen si enggo pernah ihadapina ndube bagepe pengalamen kalak sideban.
4. Arah erlajar nge maka kita banci memanfaatken kerina potensi si lit isekelewetta guna tama guna man banta ras jelma sinterem.

(4) Kitab kuan-kuanen menekanken uga maka nggeluh alu pentar/berhikmat. Lit dua cara eme (1) erkemalangen man Dibata[4]; (2) erlajar. Ibas erlajar enda, khusus pasal 27:17 itekanken maka kita arus kepe saling erlajar. Kuakap ije enggo termasuk erlajar formal, informal ras non formal. “Desken waja petelap waja, bageme manusia erlajar sapih-sapih ia”. Guna kai? Adi waja kin, maka ia jadi reh gunana. Fungsina reh buena. Kenca enggo entelap banci igunaken ngerabi, nektek batang kayu, rsd. Bagem pe manusia ibas ia erlajar sapih-sapih ia reh buena pemetehna reh buena banci ibanna guna kiniulinna bagepe kalak sideban.

(5) Ogenta arah Efesus 4:25-32 itamaken LAI ibas bingkai judul “Kegeluhen si mbaru ibas Kristus”. Adi sioge mulai ibas ayat 17, ije itekanken Paulus kal maka kalak si enggo erlajar (enggo iajari, ayat 20) kerna si mehuli si lit ibas Kristus (enggo jadi ajar-ajar Kristus) seharusna lanai nggeluh bagi sienggona eme nggeluh: erbual, merawa, nangko, melasken kata si la erturi-turin, cian ate, perampus, pernembeh, siisak-isaken, cekurak, erelem-elem, tapi sebalikna eme nggeluh erpalasken nggeluh simbaru ibas Kristus, eme kebaliken kerina si enggo isingetken ndai

(6) Uga, me enggo kita enggeluh erpalasken nggeluh si mbaru ibas Kristus? Adi lenga mari kita nggit terus erlajar ras iajarken, jenari sipindo gegeh ibas Dibata nari gelah Kesah Sibadia nampati kita nggeluh sikeleng-kelengen ras sialem-alemen salah bagi Dibata enggo ngalemi salahta ibas Kristus.

(7) Inget! Erlajar kerna kata Dibata la kap ertamat-tamat sabab Kata Dibata e tetap up to date man banta, sue ras keadanta sekalak-sekalak, bagepe erlajar kerna kegeluhen enda arus kepe kita terus erlajar ras erlajar terus. Waktu kita jadi anak-anak denga, kita erlajar ugakin selaku anak-anak semehuli, bagepe kenca enggo anak perana singuda-nguda, jenari jadi orang tua ras enggo metua harus kepe kita terus erlajar adi kin ateta tetap eksis. Tambah si e lit penelitian ngatakensa maka kalak si erlajar terus berarti otakna terus erdahin/bekerja janah enda erbahansa kalak la nukah pikun[5].

Jatiwaringin Raya-Pondok Gede, 29 April 2012

Pdt.S.Brahmana

---

[1] Pendidikan jalur formal kegiatan yang sistematis, berstruktur, bertingkat dimulai dari sekolah dasar sampai perguruan tinggi dan yang setaraf dengannya; termasuk didalamnya adalah kegiatan studi yang berorientasi akademis dan umum, program spesialisasi, dan latihan profesional yang dilaksanakan dalam waktu yang terus menerus.  Pendidikan formal adalah jalur pendidikan yang terstruktur dan berjenjang yang terdiri atas pendidikan dasar, pendidikan menengah dan pendidikan tinggi.

[2] Pendidikan informal adalah jalur pendidikan keluarga dan lingkungan. Pendidikan diselenggarakan dengan memberi keteladanan, membangun kemauan, dan mengembangkan kreativitas peserta didik dalam proses pembelajaran (Undang Undang No 20 tahun 2003 Pasal 1 Ayat (11) dan Ayat (13).

[3] Pendidikan non formal adalah jalur pendidikan di luar pendidikan formal yang dapat dilaksanakan secara terstruktur dan berjenjang. Pendidikan nonformal meliputi pendidikan kecakapan hidup, pendidikan anak usia dini, pendidikan kepemudaan, pendidikan pemberdayaan perempuan, pendidikan keaksaraan, pendidikan keterampilan dan pelatihan kerja, dll. Ntah pe alu kata sideban erlajar non formal eme arah erlajar sendiri mengacu kubas pengalamen sendiri bagepe kalak sideban, ras pe banci arah ngikuti pelatihen-pelatihen.

[4] Kuan-kuan 1:7, 9:10; Job 28:28; Mazmur 111:10

[5] Warta Kota Live.com. Usia Boleh Tua, Tapi Tidak Pikun. Akses tgl.29 April 2012 (http://www.wartakota.co.id/mobile/detil/47833).

Artikel lain yang terkait: