Suplemen Perpulungen Jabu-jabu (Pjj), 8-14 April 2012

Nas : 1 Yohanes 4:7-12

Thema :

KELENG ATE DIBATA NJEMBA RAS NGARAK-NGARAK PELAYANEN GBKP

Catatan:

1. Kekelengen eme sada aspek si penting kal ibas kegeluhen kalak sitek. Adi sioge Galatia 5:22-33 ije isingetken maka kekelengen eme aspek Ulih Kesah Sibadia, bagepe ibas 1 Yohanes 2:29; 3:9-10; 5:1 bukti nggeluh simbaru/kelahiran baru. Kekelengen e la banci statis, tapi arus ikembangken. Eme sababna ibas nasta Yohanes mereken nasehat segelah kita sikeleng-kelenge, saling memperdiateken ras rusaha segelah radu ras jore/sejahtera. Ijenda Yohanes la ngerana kerna itikad simehuli, tapi soal keputusen ras sikap nampati kalak sideban (1Yoh 3:16-18; bd. Luk 6:31). Yohanes mendorong kita gelah ncidahken kekelengen erkiteken 3 alasen:
   1. Kekelengen eme sifat Dibata (ayat 1Yoh 4:7-9), si icidahkenNa arah mereken anakNa man banta (ayat 1Yoh 4:9,10). Emaka selaku kita anak Dibata kita pe arusna nggeluh sue ras sifat Dibata (ayat 1Yoh 4:7).
   2. Erkiteken Dibata engkelengi kita, maka kita si enggo nggejapken keklengen, pengalemi ras penampatNa wajib nampati/engkelengi kalak sideban, amin gia guna sie kita harus berkorban secara pribadi.
   3. Adi kita sikeleng-kelengen, Dibata ringan itengah-tengahta, janah kekelengenNa jadi serta itengah-tengahta (ayat 1Yoh 4:12).
2. Kekelengen pe desken kaca mata guna ngenehen, nandai, ntah pe gejapken maka Dibata lit ibas kita, lit itengah-tengahta. Enda me sinitekanken Yohanes ibs ayat 8 ras 12.
3. Tahun enda proritas program GBKP eme “Peningkatan Solidaritas Internal GBKP”. Arah proritas program enda labo berarti solidaritas internal GBKP sidekah enda la lit. Enggo me lit ras nuate itingkatken. Labo saja soal kuantitas tapi kualitas. Guna sie pemahamenta selaku anak-anak Dibata tuhu menentuken peningkaten e. Bagi si isingetken Yohanes ibas nasta, payo nge kita anak-anak Dibata ntah lang teruji arah apakah kita sikeleng-kelengen ntah lang.
4. Lit singatakenca maka ibas GBKP la lit Kesah Sibadia/ Roh Kudus. Payo kin e? Kerna sienda la perlu siperdebatken. Si jelas ibas bulan April, tepatna 18 April 2012 GBKP mperingeti 122 tahun sehna Berita Simeriah man kalak Karo. Ras menurut data statistik tahun ku tahun GBKP terus nge bertumbuh. Menurut data statistik tahun 2011, keberadan GBKP genduari eme (Laporan Umum Moderamen GBKP ku Sidang Kerja Sinode & Program ras Keuangan, hal.2, 13):

NO	ITEM	TAHUN 2011
1	Klasis	22
2	Runggun	493
3	Perminggun	842
4	Perpulungen Jabu-Jabu (Pjj)	2.532
5	Kepala Keluarga (KK)	84.067
6	Anggota	285.087
7	Pertua/Diaken	8.864
8	Gedung Gereja	804
9	Gedung KA-KR	158
10	Rumah Pendeta	250
11	Gedung TK	45
12	Serba Guna	27
13	Personalia	410
	a. Pendeta aktif=240 Kalak
	b. Pendeta Pensiun=48 Kalak
	c. Vikaris=79 Kalak
	d. Pegawai=43 Kalak

Arah data enda tek kita maka kerina enda jadi erkiteken pendahin Kesah Sibadia. Siaminken maka kerina enda banci jadi erkiteken keleng ate Dibata si enggo jemba ras ngarak-ngarak pelayanen gerejaNa, sabab Ia kap si empuna GBKP enda. Emaka kasakai kalak sitek, warga gereja, mari sidahiken pendilo Dibata eme salah sada sikeleng-kelengen. Sicidahken arah ersolidaritas sada ras sidebanna. Selamat mperingeti 122 tahun Sehna Berita Simeriah ku Kalak Karo.

Pondok Gede, 8 April 2012

Pdt.S.Brahmana

Artikel lain yang terkait: