Suplemen Bimbingen Pjj tanggal 17-23 Juni 2012, Matius 6:5-13

Ogen : Matius 6:5-13

Thema : NGEREMBAKKEN DIRI RAS DIBATA ARA PERTOTON

Catatan:

(1) Ibas Pjj Minggu enda mulihi kita ipersingeti arah kata Dibata siman oratenta, Matius 6:5-13 eme uga kin arusna kita ertoto. Engkai maka khusus kerna ertoto isoroti Yesus ras mereken contoh uga kin kita arusna ertoto? Enda nuduhken uga pentingna kegeluhen ertoto nandangi kalak sitek.

(2) Piga-piga hal isingetken Yesus uga kin arusna ertoto.

1. Ertoto arus alu kesadaren, ketulusen, situhuna labo iban-ban segelah ipujiken kalak (pekulah-kulah). Perlu siteh maka pertoton ibegiken Tuhan labo soal perban mejile kata-katana tapi erkiteken ertoto erpalasken kiniteken.
   
2. Perlu lit ingan khusus. Anak-anak Tuhan simehulina lit ingan sibanci ia ngenca sisada ras Tuhan. Maksudna eme segelah banci kita ertoto secara teratur ras banci dekah bagi sinilakoken Yesus ibas Mat 14:23; Mr 1:35; Luk 4:42; 5:16; 6:12. Ertoto ibas ingan tersembunyi, si khusus (Mis.ibas kamar) penting ilakoken:
   
1. Erpagi-pagi ngendesken diri man Dibata
   
2. Berngi guna ngataken bujur erkiteken kiniulin Dibata
   
3. Ibas paksa Kesah Sibadia nuruh kita ertoto
   
3. Arah contoh Pertoton Tuhan, ate Yesus segelah sieteh kai-kai saja kin sipenting jadi poko ntah isi pertotonta. Lit 6 pokok/isi pertoton si nisingetken Yesus eme: Telu sipemena eme sehubungen ras kebadian ras sura-sura (keinginen) Dibata; telu siterakhir eme sehubungen ras kebutuhen si tep-tep wari. Kai si enem e? 1) O Bapa kami si ni Surga. GelarNdu ipebadia min; 2) Reh min KinirajanNdu; 3) Sehlah min peratenNdu, i bas doni enda bagi ni Surga 4) Bereken min man kami nakan cukup i bas wari si sendah enda. 5) Alemi min salah kami bagi nialemi kami salah kalak kempak kami. 6) Ola min kami ibaba Kam kubas percuban, tapi olangilah kami idur si ilat nari. [Sabap Kam kap si mada Kinirajan, ras kuasa, ras kemulian si ndekah-ndekahna. Amin.] Arah si enda lit 3 pokok Intina eme:
   
1. Penyembahen man Bapa I Surga
   
2. Pemindon man Bapa I Surga
   
3. Pengendesen diri man Bapa I Surga
   
4. Arus siinget maka ibas kita ertoto melibatken Bapa Si Nisurga, ertina:
   
1. Selaku Bapa, Dibata engkelengi kita, mpeduliken kita ras meriah ukurNa ngaloken persadan ras keakrabenta ras Ia. Enda me pe sebabna maka kita terus ertoto man Dibata amin gia ope kita ertoto leben enggo itehna.
   
2. Dibata selaku Bapa, labo bagi papa-bapa doni enda si kadang mpediat anakna erbahan salah. Dibata si badia e menentang alu keras setiap perbahanen dosa. Gelarna arus ipebadiaken.
   
3. Selaku bapa sorgawi, Ia ngasup mereken kerina siiperluken kita (mereken pasu-psuna), tapi pe menghukum adi kita salah, mereken ntah lang, bertindak adil ntah murah hati. Ibas si enda arus sieteh, maka cara Dibata ibas menanggapi kita selaku anak-anakna tergantung kubas kiniteken ras kepatuhenta man baNa.
   

(3) Enggo ndai isingetken engai maka kita arus ertoto eme perbahan e ngena ate Dibata sinuduhken maka kita anak-anak Dibata ras Ia Bapanta. Alu bage dage ertoto berarti tandana lit hubungenta ras Dibata. Hubungen e la sekedar hubungen, tapi hubungen si akrap. Alu bage dage banci ipahami maka ertoto eme ngerembakken dirinta ras Dibata.

(4) Labo saja soal ngerembakken diri ras Dibata arah pertoton, tapi ertoto pe desken erkesah. Kalak si lanai ertoto berarti lanai erkesah. Kalak si la erkesah berarti mate. Emaka megati sibegi kata enda: “Doa adalah nafas bagi orang Kristen”. Emaka ula mamang ateta, adi ibas lingkungenta mbue kalak ndalani kegeluhenna la ibas dalan simehuli, sabab pikiren sehatna, hati nuranina, moralitasna enggo mate.

(5) Tambah sie, ertoto pe sada pelayanen, sabab ibas ertoto la kap saja dirinta ngenca sitotoken tapi pe keluarganya, tetanggata, teman-temanta, bangsa ras negaranta. Ikataken pelayanen sabab mbelin kap ulih ertoto, terlebih bagi si nikataken ibas Yakubus 5:6b “Doa orang yang benar, bila dengan yakin didoakan, sangat besar kuasanya”. Saja ngenca tugas enda kurang denga sipahami selaku pelayanen sisignifikan erkiteken la pupuler, kurang dat pujin, rst. Berbeda ras pelayanen khotbah, pelayanen ertoto kurang erbahansa sekalak e itandai, terkenal, rsd. Padahal, pendeta ntah Evanglis si erbahan KKR, maka ia megegeh ras mbelin kuasana teridah arah tanda mujizat kesembuhen eme erkiteken ipudina nterem sinotokensa. Emaka kuakap, engkai maka kurang animo ngawan perpulungen ngikuti kegiaten-kegiaten gereja, khususna kebaktin Minggu hanya 30-50% ngenca, salah sada eme erkiteken pelayanen ertoto kurang nterem siterbeban ras ngelakokenca.

(6) Kedungenna, payo adi la kin kita rembak ras Dibata, adi la kin kita ersada ras Dibata, bagi si nikataken Yesus ibas Yohanes 15:5, labo kita ngasup erbahan kai pe emaka mari sirembakken dirinta ras Dibata. Carana si sehkal sederhanana tapi menentuken eme arah ertoto. Amin.

Pdt.S.Brahmana

Artikel lain yang terkait: