Suplemen Bimbingen Pjj 8-14 Juli 2012, Perbahanen Rasul 13:44-48

Ogen : Perbahanen Rasul 13”44-48
Thema : KINIERSADAN IBAS NGELAI

Catatan

1. Erpalasken 1 Petrus 2:9, kerina kalak sitek eme igelari bangs pilihen, imam-imam raja, bangsa sikerajangen Dibata, anak-anak Dibata sinipilih guna meritaken perbahanen-perbahanen Dibata simbelin. Engkai? Sabab Dibata enggo ndilo kita ndarat ibas si gelap nari ku bas terangNa si lanai kal lang-lang ulina[1]. Kai ertina enda? Ertina eme nguda ntah metua, dilaki ntah diberu seri kap ilebe-lebe Dibata. Alu bage kerina kap kita bangsa pilihen, kerina kap kita imam-imam raja. Emaka ula kita latah ngataken adi mamre e eme imam. Pernanden ntah moria labo imam.
2. Selaku bangsa sekerajangen Dibata arusna lit nilai lebihna. Bagi Regina inobatken jadi Indonesia Idol tahun 2012 ngalahken Sean ibas tanggal 7 Juli 2012, tentu labo kebetulen tapi erkiteken kualitas si icidahkenna. Lit nilai lebihna. Bagem arusna anak-anak Dibata. Kita enggo igelari bangsa pilihen, kai nge ndia nilai lebihta? Labo lit kai pe, sabab kita banci terpilih erkiteken “anugrah” eme erkiteken hak veto Dibata ibas Yesus Kristus isehkenna man banta. Adi bage uga arusna sikapta?[2]
3. Themata, “Kiniersadan ibas Ngelai”. Lit dua kata penting ijenda eme “kiniersadan” ras “ngelai”. Ngelai sinimaksud tentu labo saja ibas erti ngelai bagi ibas kerja-kerja eme anak beru nikapken pangan ras ngelaisa temua sireh, tapi ngelai ibas erti nehken berita simeriah, nehken kekelengen, nehken kerina simehuli man teman manusia. Ngelai Dibata berarti ngelakoken kai singena ate Dibata ibas geluhta. Paulus ras Barnabas ibas kata Dibata siman oratenta ngelai Dibata arah nehken berita simeriah man kalak Antiokia I Pesidi. Ielaina jelma sinterem alu mereken kata Dibata, janah ibas ayat 48 ituriken maka meriah ukur kalak si lenga nandai Dibata jenari ipujina Tuhan erkiteken kataNa. Ertina arah “pelayanen” (ngelai) si isehken Palus ras Barnbas erbahansa nterem kalak jadi tek.
4. Kai rahasia keberhasilen Paulus ras Barnabas ibas ngelai/melayani seh maka enterem kalak tek? Sipemena: Paulus ras Barnabas meteh maka tugasna eme ngelai, janah sie idahikenna alu tutus; Sipeduaken, tehna kai siman elan eme perbahanen-perbahanen Dibata simbelin. Perhatiken ayat 46-47, ije ituriken maka Paulus ras Barnabas meteh engkai maka man kalak si labo kalak Yahudi pe iberitaken kata Dibata. Berarti ibas ngelai kita arus meteh secara mbages kerna kata Dibata e; sipeteluken, Paulus ras Barnabas kompak (lit kiniersadan) ibas ia ngelai (melayani) e. Enda me sababna maka ibas Yohanes 17:21 Yesus ertoto segelah murid-muridNa bagepe kerina kalak si enggo tek man baNa “ersada”.
5. Bagi endai enggo isingetken maka kita kerina selaku bangsa pilihen idilo guna ngelai eme ngelai ras-ras segelah doni enda tek man Yesus Kristus selalu Tuhan ras Juruslamat. Ngelai ras-ras maksudna naksiken perbahanen-perbahanen Dibata simbelin baik arah mgerana ntah pe arah perbahanen alu la sipandang punjuten, apai ka sician-cianen bagi sinilakoken kalak Yahudi nandangi Paulus ras Barnabas ibas ayat 45.
6. Adi sinen sejarah gereja, si megati terjadi ibas ndahiken pelayanen selaku kalak si enggo tek eme la ersada ntah pe kurang lit kiniersadan ibas ndahiken tugas ngelai e. PGI si terbentuk ibas tanggal 25 Mei 1950 situhuna eme segelah gereja-gereja banci ersadana ntah reh ersadana ibas ndahiken pendilona ngelai e. Harapen alu enda she genduari terus jadi perjuangen. Bagepe internal setiap gereja, termasuk GBKP masalah kiniersadan enda tetap denga nge jadi pertoton ras perjuangen eme sababna thema Pjj berngi enda kita ibabai encakapken kiniersadan ibas ngelai. Kuakap she nge matata natap maka lit gereja terpaksa mekar erkiteken masalah la nai lit kiniersadan, bagepe lit nge pandita terpaksa pindah ibas sada runggun nari erkiteken lanai lit kiniersadan khususna antara pendeta ras pertua-diaken. Bagepe lit kange sapih-sapih serayan lanai siperiahen erkiteken lanai lit kiniersadan ibas ia pekepar erkiteken beda pendapat, sigeluten, rsd. Situhuna engkai maka banci la nai lit kiniersadan? Banci mbue jababna, tapi menurut penggejapenku antara lain eme erkiteken: (1) pelayanen sinilakoken enggo bergeser tujunna lanai guna kemulian Dibata tapi pujin ras harga diri (egonta); (2) visinta lanai jelas. Kuakap adi jelas visinta eme segelah banci atan bengket ku rumah Bapa I Surga si pala-palai enggeluh sue kata Dibata eme jadi sira ras terang[3]; (3) Lanai tutus ntah kurang tutus ngoge Kata Dibata ras ertoto. Dua hal enda she kal pentingna. Kata Dibata eme nakan pertendin maka kita tetap megegeh desken pangan, ertoto eme desken kesah, ise lanai erkesah masti lemas ras kedungenna mate.
7. Emaka selaku kita payo bangsa pilihen, anak-anak Dibata, ntah pe imam-imam raja e mari sicidahken arah kegeluhenta eme kiniersadanta ngelai ras-ras. Kelebihen ntah keberhasilen temanta ibas ngelai e siakap keberhasilenta ras-ras selaku keluarga anak-ana Dibata labo sebalikna cian ateta. Emaka si ibere mbue kengasupen ibas ngelai la ka ia sombong ntah pandang enteng man kalak si kenasupenna ngelai biasa-biasa saja, bagepe si kengasupenna biasa-biasa saja e la ka merasa la meherga jenari minder she maka lanai semangat ngelai, tapi sebalikna kitik gia kengasupen ngelai tetap semangat ia muat bagin sabab si ibereken mbue ntah sisitek ulihna eme bagi si isingetken ibas Matius 25:21 “Baik sekali perbuatanmu itu, hai hambaku yang baik dan setia; engkau telah setia dalam perkara kecil, aku akan memberikan kepadamu tanggung jawab dalam perkara yang besar. Masuklah dan turutlah dalam kebahagiaan tuanmu” (Bd.ayat 23).

Pdt.S.Brahmana

---------------------------
[1] Keluaran 19:5-6; Jesaya 43:20,21; Ulangan 4:20; 7:6; 14:2; Titus 2:14, Jesaya 9:2
[2] Kuakap siinget uga ibas lima besar Indonesia Idol, Sean arusna ndarat erkiteken ia ndatken dukungen SMS terendah. Tapi la ia sahun ndarat erkiteken juri nehken hak votingna man Sean. Hak voting e hanya banci sekali igunaken selama Indonesia Idon 2012 ras e igunaken man Sean. Uga respons Sean ndatken anugrah e? Tangis ia erkiteken terharu ras bersyukur. Tentu la e saja icidahkenna, tapi isikapina alu reh gigihna ia melatih diri gelah banci jadi yang terbaik. Ras terbukti amin gia la jadi nomor sada, tapi banci ia bengket ku grand final.
[3] Matius 5:13-16

Artikel lain yang terkait: