Suplemen Bimbingen PA Mamre tgl.8-14 Juli 2012, Kejadian 11:1-9

Ogen : Kejadin 11:1-9
Thema : ALAT-ALAT MODERN (HP, INTERNET, RSD)

Catatan:

1. Turi-turin Menara babel eme sada turi-turin si terkenal ibas padan si Ndekah. Ibas ayat 8 I je ituriken maka ikerapken Dibata manusia endai ku belang-belang doni. Tambah sie turi-turin enda pe megati ipake jadi contoh si nuduhken kiniganjangen ukur manusia si pang ngelawan sura-sura Dibata erpalasken kengasupen akal na budi ibas sienda “teknologi”.
2. Kai sijadi fokus arah perikop enda situhuna labo soal teknologi ibas dirina sendiri, tapi sijadi fokus eme arah teknologi e manusia nimbak sura-sura Dibata. Ibas Kejadin 1:28 ikataken “Ipasu-pasu Dibata manusia ndai, nina, "Ertuahlah kam jadi nterem, demi dingen taluken doni enda, kuasai kerina nurung, perik-perik i awang-awang, bage pe kerina rubia-rubia i daraten”, tapi ibas turi-turin menara Babel manusia erbahan rencana sebalikna “Nina ka kalak enda, "Sibahanlah sada kuta ras menara, tampukna seh ku langit, gelah arah e terberita gelarta, janah la kita merap i babo doni enda (ayat 4).
3. Bagepe kerna masalah bahasa sindube sada ngenca jenari ibahan Dibata erbage-bage e pe situhuna labo fokus utama. Sijadi fokus eme akibat adi sada ngenca bahasa siigunaken manusia banci reh nukahna akap manusia “bersekongkol” ntah pe “ersada ukur” ngelawan Dibata. Bagi nina Dibata ibas ayat 6 “Genduari kalak enda sada bangsa ras sada cakap; enda me bena-bena i bas kerina pendahinna. Lanai ndekahsa kuga pe beluh ia erbahan kai pe atena!”. Eme sebabna ibahan Dibata tindaken “mecah cakap manusia jadi melala segelah la siangkan sapih-sapih ia (ayat 7).
4. Banci saja kai si ikataken ibas ayat 7 eme upaya penulis kitab Kejadin guna merasionalisasiken engkai maka manusia merap I babo doni enda ras engkai maka lit mbue cakap manusia. Saja ngenca simenarik jadi diskusi ibas jamanta genduari eme alu kemajuan IPTEK (Ilmu Pengetahuan ras Teknologi) khususna teknoligi informasi ras komunikasi siterjadi genduari la lah e enggo erlawanen ras sura-sura Dibata?, sabab perkembangen si luar biasa majuna I bidang teknologi informasi ras komunikasi paksa enda “doni” ras “bahasa/cakap” manusia mulihi jadi “sada”.
5. Emaka genduari siperlu sidiskusiken eme uga kita nikapi perkembangen teknologi siterjadi paksa enda. Payo nge teknologi e erbahansa kita reh dauhna ras Dibata? Ntah sebalikna? Jenari ibas sisi sideban, uga nge jdina adi kegeluhen manusia tanpa perkembangen teknologi?
6. Setuju kita ntah lang, sejarah membuktiken maka kai pe ntah ise pe I doni enda la ngsup ngolangi perkembangen IPTEK. Sebalikna ise saja si rusaha pesirang dirina ras perkembangen IPTEK erbahansa ia ketadingen bagi katak iteruh sudu. Bagepe sebalikna, menggantungken kegeluhen ras masa depan nandangi IPTEK epe sada kebodohen. Engkai? Sabab sejarah pe membuktiken ternyata IPTEK labo sada-sadana solusi (the ultimate sulution) guna jabab ntah pe jalan keluar persoalen geluh manusia. Sebalikna IPTEK banci erbahansa reh buena ntah reh rumitna persoalen geluh manusia. Contohna, perkembangen teknologi nuklir, kedungenna ternyata e jadi ancamen si mengeriken nandangi kegeluhen manusia, bagepe perkembangen alat-alat perang si reh canggihna.
7. Sekali nari kemajun e labo terbendung, emaka sue ras thema siman cakapenta ibas PA Mamre enda eme alat-alat modern eme bagi Hand Phone, Internet, ras sidebanna ibas kelompok teknologi informasi ras komunikasi perlu sidiskusiken alu mbages. Nehen saja genduari, anak TK pe enggo lit pake HP, enggo erlajar komputer ras internet.
8. Adi bage uga nge kita nikapisa alat-alat modern e? Pertama lebe, arus lit pemahamenta maka alat-alat e iciptaken eme guna kiniulin manusia. Adi bage ula kita ersikaf alergi sabab secara sederhana saja telepon, terlebih hand phone mbelin kal gunana ibas kita ngiah-ngiahi temanta mamre segelah ikut muat bagin ibas PA mamre ntah kegiaten-kegiaten gereja sidebanna. Sipeduaken, ula salah gunaken, bagepe ula erbahansa sombong ntah meganjang rukur erkiteken erHP mahal. Inget alat e iciptaken guna kiniulin manusia. Emaka ula kari gara-gara ngikuti trand er HP rubati tengah jabu erkiteken gonta ganti HP alu merek terbaru ras aplikasi tercanggih, bagepe ula salah gunaken erbahan si la payo[1].
9. Kata Dibata siman oratenta eme nuriken giniganjangen rukur manusia ras ukumen si pereh Dibata. Situhuna labo salah lit kiniersadan, labo salah lit tujun reh majuna sabab sura-sura Dibata pe bagenge eme segelah manusia ersada ukur ras reh majuna, saja ngenca si salah eme kiniersadan e, usaha maju e erbahansa manusia reh urakna mengandalken Dibata ntah pe reh dauhna ras Dibata. Apai ka arah kengasupen makeken kamajun teklologi e reh suksesna ntah reh bayakna ia jenari jadi sombong. Enda me si la ngena ate Dibata. Kuakap eme sebab utama engkai maka Dibata bertindak engkerapken manusia segelah lanai sada bahasana. Tambah si e memang ibas Pustaka Sibadia mbue isingetken maka sitik pe la ngena ate Dibata kesombongen. “Itulak Dibata nge kalak si meganjang ukurna, tapi man kalak si meteruk ukurna iberekenNa lias ateNa.” (Jakub 4:6), bagepe ibas Kuan-kuan 16:5 “Nembeh ate TUHAN man kerina kalak si meganjang rukur, janah la ipelepasNa ia pulah i bas ukumen nari”. La saja nembeh (kekejian) ate Tuhan, tapi pe pereh kebenen ras guling (Kuan-kuan 16:18).
   
   
   Pdt.S.Brahmana

-----------------------------------
[1] Bagi ndai enggo isingektekn, alat-alat komunikasi enda banci berdampak positif janah bancika negatif, tergantung uga kita menyikapisa.
Dampak positifna secara umum eme:

• Informasi tersebar akurat ras pedas seh.
• Berkomunikasi jarak jauh alu waktu si seri ras praktis
• Banci ndarami ras ndatken informasi si ibutuhken kita erkiteken penyedia informasi mbagiken informasi e man man jelma sinterem/umum.
• Diskusi online. Masyarakat banci berdiskusi secara online ras ise saja idoni enda, jenari banci ka ngelakoken transaksi katawari pe ras ija pe kita ringan alu pedas secara online tanpa arus jumpa secara pisik.

Dampak Negatifna secara umum eme:

• Information Anxiety (Information Overload). Kelebihan informasi seh maka banci saja la nai kita ngasup memilah ntah pe memfilter/menyaring apai informasi si penting ras si la penting, alu bage banci erbahansa informasi e lanai terkontrol ras lanai terpastiken kebenarenna.
• Dehumanization. Banci pe erbahansa penghargan nandangi sekalak jelma selaku indevidu bene ntah pe reh urakna igantiken sederet angka.
• Lost of Privacy (Hilangnya Privasi). Ibas kegeluhenna manusia enggo buen make teknologi informasi ras komunikasi. Data-data pribadi mbue isusun ibas komputer ntah laptop. Emaka data-data pribadi e banci itangko ras isebarluasken (contohna Areal Paterpen), terlebih ibas menggunaken internet para haeker banci nangko datata alu la kita kebenen komputer ntah laptop.
• Digital Gap. Terjadi Kesenjangan nandangi kalak si gunaken IT ras si lang. Payo ibas jaman genduari kalak sisadar IT terus berkembang ras silang reh dauhna ketadingen.
• Possible Massive Unemployment (Kemungkinan besar-besaran Pengangguran). Penggunaan atau peng-implementasian TIK ibas kegeluhen si tep-tep wari erbahansa pe reh buena pengangguren.
• Impact on Globalization on Culture. Reh tipisna nilai-nilai budaya lokal erkiteken pengaruh globalisasi. Salah sada contoh sederhana eme reh kurangna kemampuan erbahasa daerah ibas anak-anakta.
  

Artikel lain yang terkait: