Suplemen Bimbingen Pjj tgl.1-7 Juli 2012, Yakobus/Jakub 1:2-8

Ogen : Jakub 1:2-8

Thema : “ARAH KINIGENGGENGEN NJADIKEN KITA SERTA”.

Catatan:

1. Secara umum isimpulken maka kitab enda itulis Jakub murid sinikelengi Yesus (senina tiri Yesus) sue ras gelar kitab enda kira-kira tahun 45-49 M. Ibas ayat 1 jelas man isi itujuken surat enda eme man anak-anak Dibata si merap itaneh perlajangen. Tole ibas pasal 2:19,21 lebih khusus ituriken maka surat enda situhuna ialamatken man kalak kristen Yahudi si tading I darat Palestina (perlajangen). Engkai maka merap marpar? Kenca kematen Stefanus penyiksan reh meningkatna eme sababna kalak Yahudi si enggo jadi kristen e nadingken Yerusalem.
2. Alu bage banci siangkai engkai maka bagin kata Dibata siman oratenta isehken Jakub kata-kata simereken semangat. Ibas jumpa la bagi ukur secara manusia eme erbage-bage pencuban nina Jakub “sangap min akapndu”. Hal enda memang nukah melaskenca tapi ndalankenca mesera, apai ka jadi gaya nggeluh. Kuakap adi suruh pilih, labo lit jelma milih jumpa la bagi ukur ntahpe ikenai erbage pencoban. Tapi Jakub ngasup nehken kata enda tentu labo dat-dat babah tapi erpalasken pengangkanna kerna erti nggeluh si enggo tek man Tuhan Yesus. Erpalasken sipaling meherga enggo sialoken erdandanken tek man Tuhan Yesus eme “pemere” keselamaten e pencoban e (1) labo kai pe adi ibandingken erga keselamaten e[1]; (2) tuhu jadi kesangapen erkiteken e sada bukti kita lanai sekerajangen doni enda[2];
   
3. Ujin apakah kita payo kalak sierkiniteken ntah lang ntah pe payo nge kita kalak kristen ntah lang[3]. 3. Adi siperdiateken kata siman oratenta enda, lit nge teluna si isingetken ndai, tapi penekanenna ku hal si peteluken eme gelah arah pencoban e kita reh “sertana” (dewasa ibas kai-kai pe, dingen la kekurangen).
   
4. Payo enda labo nukah. Guna she kubas pengakan “sangap min akapndu” perlu kepe hikmat (kepentaren). Hikmat sinimaksud ijenda eme kengasupen rohani ntah spiritualitasta ngenehen ras menilai kegeluhen ras krina siterjadi arah sudut pandangen Dibata labo pandangenta[4]. Sienda meliputi pilihen sitepat ras ibas ngelakoken kerina sibenar sue ras Kata Dibata bagepe pejemba Kesah Sibadia[5]. Uga carana ndatken ntah pe ngaloken hikmat e? Eme arah “tutus” ras “tuhu-tuhu” ertoto (ayat 5-7).
   
5. Usur isingetken kerna realita maka labo lit manusia si steril ibas si la bagi ukur ntah pe perbeben. Kerina jelma lit nge perbebenna, saja ngenca siberat-beraten. Kerna siberat-beraten enda pe la ka banci kita mereken kesimpulan siah menahang, sienda mberat ntah sebalikna. Sebab banci jadi perbeben si bage siakap manahang tapi man kalak sideban e enggo she kal akapna beratna. Jenari perbeben e banci turah ntah reh erkiteken pengelegita (salahta, kecerobohenta, dosanta), tapi pe banci ka e sada ujin nandangi kinitekenta. Pustaka Sibadia la pernah ngajarken maka perbeben ntah kesuliten ibas geluhta kerinana erkiteken Dibata la senang nandangi kita ntah pe kerna kelepakenta. Banci jadi bagi Ayub/Job, kesuliten ntah kiniseran e jadi tanda Dibata ngaku komitmenta man baNa (Job 1-2).
   
6. Emaka mari siubah carata ngenehen ras menilai perbeben ntah pe sila bagi ukur si lit ibas geluhta eme alu tropong ntah pe kacamata Kata Dibata. Alu bage pasti lanai kita jungut-jungut, lanai kita lolah, apai ka numpahi geluhta tapi tetap pertedista sabab tek kita Dibata ibas Yesus Kristus etia nandangi perpadanenna. Labo pediatna kita bene. Bagi ikataken ibas Roma 10:11 “Ise tek man baNa la kecewa”.
   
7. Tole perlu sieteh engkai maka Dibata mereken masalah ntah perbeben man manusia, lang situhuna ngasup kap Dibata erbahansa maka kedekah kita nggeluh I doni enda la lit masalah. Bagi enggo ndai ikataken segelah kita reh genggengna ras jadi serta. Saja ngenca isayangken mbue jelma gagal ngidah rencana Dibata arah masalah si reh kubas geluhta situhuna guna kiniulinta. Mbue jelma milih bertindak bodoh ras alergi ntah pe bersikap negatif nandangi masakah e.
   
8. Lit 5 cara Dibata menggunaken masalah-masalah siturah ibas geluhta guna kiniulinta[6]:
   
1. Tuhan makeken masalah guna MENGARAHKEN kita. Maun-maun Tuhan arus pegara api iteruhta gelah kita la kem (terus bergerak). Mekatep masalah sinihadapi kita erbahanca kita tetap fukus/terarah ras termotivasi guna ngerobah kegeluhenta ku lebih mehuli. Tole banci saja arah masalah e ate Tuhan menarik perhatinta man baNa.
   
2. Tuhan makeken masalah guna MENGUJI kita. Banci ianalogiken manusia desken teh celup, adi ateta meteh kai lit ibas, celupken ku bas lau melas. Bagem Dibata kadang nguji kesetianta arah erbage-bage sinihadapi kita (Bd.Jakub 1:2-3).
   
3. Tuhan makeken masalah guna MENGOREKSI kita. Lit pelajaren sibanci dat kita arah kiniseran ntah pe kegagalen sinialami kita. Paksa kita kitik enggo iajari orang tua segelah ula deher apai ka ncikep api. Tapi pelajaren e tuhu- tuhu payo siakap paksa tanta meseng. Maun-maun maka kita ngasup ngergai kesehaten, teman, bagepe perkade-kadenta ibas paksa kini enggo kebenen (bd.Masmur 119:71).
   
4. Tuhan makeken masalah guna MGELINDUNGI kita. Sada masalah si terjadi ibas geluhta banci jadi pasu-pasu adi arah masalah e kita pulah ibas bahaya nari. Lit sekalak kristen i PHK ibas dahinna nari erkiteken la ia nggit ngelakoken si isuruh bosna erkiteken la akapna payo (bertentangen ras kinitekenna). Ia jadi kalak pengangguren, tapi justru erkiteken si e ia terhindar ku masalah penangkapen ras masuk penjara sebab sada tahun kenca ia I PHK tindaken bosna e terbongkar ras masuk penjara. Payo bagi ikataken ibas Kejadin 50:20 “Memang kamu telah mereka-rekakan yang jahat terhadap aku, tetapi Allah telah mereka-rekakannya untuk kebaikan…"
   
5. Tuhan makeken masalah guna MENYEMPURNAKAN kita. Bagi sinikataken Jakub ibas kata Dibata siman oratenta, adi sitanggpi masalah ntah pencoban e alu pengidah si payo erpalasken kiniteken, masalah e banci membentuk kita reh dewasana ibas kiniteken. Perlu sieteh kepeken Dibata lebih mperdiateken karakterta asangken kenyamanenta. Inget, persadanta ras Dibata nge ngenca sibanci sibaba she rasa lalap. Roma 5:3-5 “Janah labo terjeng je saja, tapi megah pe siakap i bas kiniseranta, sabap sieteh maka arah kiniseran turah saber ate. I bas saber ateta e teridah maka kita enggo menang i bas pengujin, janah erkiteken kita enggo menang i bas pengujin, lit pengarapenta. Pengarapenta enda labo erbahanca kita kecewa, sabap Dibata enggo ncurcurken kekelengenNa ku bas pusuhta arah Kesah Si Badia”.
   

Pdt.S.Brahmana

------------------------------------

[1] Roma 8:18

[2] Bd.Yohanes 15:18-19

[3] Bd. Ayat 3 ibas cakap Indonesia: “Ujian terhadap imanmu”…

[4] Bd.Kuan-kuanen 1:2

[5] Roma 8:4-17 [6] Bd. Kai sinitulis ibas saat teduh, Rabu, 30 April, 2008, bage pe sumber sideban sibanci I akses ibas internet.

Artikel lain yang terkait: