Khotbah Matius 6:9a, Pekan Doa Wari 1 (Minggu, 23 September 2012)

Introitus :
Pertoton kalak si bujur ergegeh kal (Jakub 5 16 b)

Ogen : Jakub 5 : 13 – 20; Khotbah : Matius 6 : 9 a

Tema :
Ku ise nge kita ertoto ? (alamat doa )

Pokok pikiren :
1. Gelah ngawan ni perpulungen tuhu-tuhu ertoto man Dibata
2. Gelah kalak si tek nggeluh ibas kebujuren
3. Ibas Gerejanta langan semal ilakoken minyak urapan (bd.Jakub 5 : 14 )

Kata Perlebe

Enggo ka seh paksana ibas tahun enda kita mengketi Kebaktin Pekan Doa ibas tahun 2012 enda alu pengarapen gelah Ngawan ni perpulungen pe banci ras-ras muat bagin ngikuti Kebaktin Pekan Doa enda bagi si aturken Runggun Gereja ibas Runggunta masing-masing.. Arah Kebaktin Pekan Doa enda kita iajuk gelah ras meningkatken Spiritualitasta arah ketutusenta ertoto, bagepe meningkatken solidaritasta ibas kita ras-ras saling mendoakan ibas erbage-bage kecibal geluhta, jabu-jabunta ras geluh ni Perpulungen/Gerejanta, masyarakat bagepe negaranta. Sienda silakoken tanda kita mediate / Solider nandangi kegeluhen doni enda, alu pengarapen maka lit ulih pertoton kalak si tutus dingen si tek man Tuhan.

Bimbimgen

Arah perikope Ogenta ( Jakup 5 : 13 – 20 ) kita iajuk gelah kerina perbeben geluh/kiniseran, penakit ibaba kubas pertoton, sebab Tuhan nge si bertindak lako nampati kita ibas perbebenta si mberat, Tuhan megiken pertoton kalak si tek. Bagepe perlu pemulihan hubungen ras Tuhan alu ngakui kerina dosa-dosanta gelah ula e jadi abat ibas kita ngaloken jawaben ibas pertotonta, bagepe perlu saling mendoakan “ertotolah kam pekepar kerna teman….” Sebagai contoh kerna kalak si tutus ertoto, icontohkenna kerna nabi Elia ertoto ia gelah ula nusur udan,jenari lego telu setengah tahun dekahna, jenari ertoto ka ia mulihken emaka rehka udan ilangit nari. Enda nuduhken kerna kuasa doa si luar biasa terjadi ibahan Tuhan. Bagepe uga kita ertanggung jawab saling menggembalakan gelah ula papak, tapin saling mengingatkan guna nadingkean perbahanen si la ngena ate Tuhan.

Bahan Khotbah ; “ Dage bagenda nindulah ertoto ; O Bapa kami sini Surga…” (ayat 9a)

Pertoton merupaken penembahen man Dibata Bapa si ni Surga eme Bapa simada Kuasa i surga ras i doni bagepe Bapa si enggo ngkelengi ras nebusi Kita alu dareh anakna Yesus Kristus penebus dosanta. Ia pe Dibata si mediate man banta ibas kerina nkecibal geluhta.(band.” Pindolah tentu ngalo me kam,daramilah tentu idatndu,tuktuklah tentu italangi pintun man bandu.sabab ise mindo ngalo mekap, ise ndarami ndat me kap… “ (Matius 7 : 7-8)

Dibata Bapa ertina Ia Bapa si dem kekelengen bagi sekalak bapa nandangi anakna, tapi pe Ia sebagai Bapa si menuntut kepatuhen man banna eme alu makeken katana ibas geluh anak-anakNa Alu bage kita iajuk ibas kita ertoto, gelah si dahi Tuhan alu dem kehamaten, bagepe alu dem kiniteken maka Ia nge Dibata Simada kuasa ibas kerina kecibal geluhta ras I ape si megiken pertoton sinisehken man baNa

Ketaaten man Dibata (nggeluh alu bujur) enda pe perlu jadi kegeluhen perpulungen, sebab Dibata megiken pertoton anak-anakna si taat man bana si nggeluh alu bujur. (band. Kuan-kuanen 28 : 9 “ Adi la ikutkendu undang-undang Dibata megiken pertoton ndu pe mutah ateNa “)

Mari dage si tingkatken ketutusenta ertoto, ertoto guna geluh spiritualitasta, ertoto guna geluhta , jabunta, pelayanenta, kesehatenta, kegeluhen perpulungenta, senina turangta, Perbeben Gereja Tuhan idoni enda, bangsa ras Negaranta

Pdt. Esra Bukit
GBKP Cisalak Simalem

Artikel lain yang terkait: