Khotbah Matius 6:9b, Pekan Doa Wari II (Senin, 24 September 2012)

Intoritus :
Si lebuh lebuhen ia nina “Badia ,badia ,badi! TUHAN si mada kuasa badia kap! Doni Enda dem alu kemuliaNA.”

Ogen : Keluaren 29 : 42b – 46; Khotbah : Matius 6 : 9b

Thema :
GelarNDU Ipebadia Min

Kata Perlebe

Bahan pekan Doanta wari/berngi sipeduaken enda erthemaken “GelarNDU Ipebadia Min”.Arah thema enda , kita ibabai ngidah maka Dibata e Badia. Adi Dibata Badia , maka kita kalak sitek man bana pe harus ka Badia . Uga carana kita nuduhken nilai – nilai kebadian ibas kegeluhenta , la banci lang harus teridah arah pengerananta , tindakenta tep – tep wari terutama ibas kita ngikuti kebaktin . Engkai maka bage ?. Lit Syair lagu nina “Badia , Badia Tuhan sierkuasa , Dem me doni enda salu kemulianNa. Badia,Badia Tuhan bala surga,kam me kap Bapa si ermulia. Enda me lirik lagu ibas Kitab Ende - Enden GBKP No 163:1 siusur I endeken kita subuk ibas kebaktin wari MIinggu,PJJ,bage pe PA itengah – tengah persekutuan kategorial gerejanta GBKP enda. Adi siperdiateken bagepe sirenungken isi lirik lagu enda,maka teridah alu terang ras jelas pengakun kerna Kebadian (“Kekudusen”/”Santitas”) Dibata ibas tengah – tengah geluhta manusia bagepe isi doni enda kerina. Pengakun kerna kebadian Dibata e jadi erdandanken ibas diriNa Ia la ersalah ras la erdosa,bagepe Ia kang si ngerajai doni enda kerina.Emaka Ia ndilo kita (manusia) guna tetap ndalaken kebadianNa ibas kegeluhenta si tep-tep wari. Tapi megati ibas ndalani wari-wari kegeluhenta lanai nari kita njaga kebadian Dibata bagepe ndalanken bagi si ngena ateNa. Megati kebadian Dibata bagepe keselamaten si enggo iberekenNa e la si inget bagepe la sigejapken.Emaka gelah tetap si inget bagepe si gejapken pendiloNa bage pe kerna kebadianNa ibas tengah-tengah geluhta,si renungken arah Pekan Doanta wari/bergi si peduaken enda.

Uraian Nats Keluaren 9:42b-46

Ibas teks enda ncidahken kuga keharusen kalak Israel nehken persembahen man Dibata tep-tep wari,ilakoken dua kali sada wari eme pagi-pagi ras karaben.Persembahen e ilakoken sebage tanda kehamaten man Dibata, sebab Ia Dibata si Badia.Israel nuduhken kepatuhena nandangi perintah Dibata ija bangsa enda ngeloken kai si nggo isuruh Dibata.Arah nehken persembahen tutungen endame bangsa Israel enggo mpediateken gelar Dibata.

Ayat 43 enda ngataken maka arah persembahen si lakoken bangsa Israel I je reh Dibata.Arah rehna Dibata nuduhken maka ingan e pe arus Badia,sebab Dibata e Badia.Ije Dibata ringan guna mpeseh kai si harus ilakoken kalak Israel.Kemulian Dibata e rusur teridah arah bentuk “ Api” alu bage teridah maka Dibata la secara langsung encidahken ayoNa ntah pe rupaNa,erkiteken Ia Badia.

Ayat 44 enda nuduhken maka Dibata si berinisiatif guna erban sada batar-batar,ija batar-batar ingan persembahen e ibahaNa Badia.Alu bage labo banci mekarus ntah sembarangen kalak Israel nehken persembahen ku ingan batar-batar persembahen e.Sebab ingan e nggo ipebadiaken Dibata.

Ayat 45 & 46 ngataken maka Dibata tading /ringan ibas kalak Israel Enda nuduhken maka bangsa enda harus nginget maka Dibata si nggo nampati bangsa enda ndarat ibas Mesir nari.Janah bangsa enda harus patuh,setia man baNa.

Intoritus (Jesaya 6:3) mbabai kita gelah tetap njagai dirinta alu patuh ras setia man Dibata.Arah kepatuhenta e si encidahken sikap-sikap si mehuli ras tetap njaga kebadian Dibata ibas dirinta,adi kita ngaku kita anak-anak Dibata.

Matius 6:9b (GelarNdu Ipebadia min)

Secara sederhan lit dua pengertin kerna kebadian Dibata enda. Sipemena: Kebadian Dibata mereken pengertin ras pengangkan maka seh kel ndauhna jarak antar Dibata sebage si nepa kita (manusia) ras manusia bekas tinepaNa ( Ibas Padan Si Ndekah).

Sipeduake: Pengertin kerna kebadian Dibata mereken pemahamen maka kita (manusia) e maka tinepaNa si nggo ndabuh kubas dosa.Emaka erkiteken dosa,maka manusia perlu penampat kerna keselamaten. Manusia ibas dirina la ia ngasup nelamatken dirina ibas keberdosanna. Emaka Dibata enggo mereken keselamaten man manusia bagepe doni enda arah anakNa si Tonggal Jesus Keristus. Gelah manusia si nggo erdosa e banci ndatken keterkelinen (Johanes 3:16).

Ayat enda mabai kita gelah sadar,isekin kita ilebe-lebe Dibata si Badia e.Adi si akuken maka Dibata e Badia ras kita manusia perdosa,tentu perlu ije lit sikap si meteruk ukur ibas kita ndalankensa Pertoton Tuhan, sebab ayat enda bagin ibas Pertoton Tuhan si rusur sibelasken ibas kebatin.Kiniteruken ukurta erpalasken kita nggo ndabuh kubas dosa jadi harapenta gelah min sisadari maka erkiteken perkuah Ate Dibata maka banci kita jadi anak-anakNa.Alu bage kita singgo ialokenNa perlu kel sijaga ke’Badian Dibata e ibas dirinta.Erkiteken Dibata Badia kita pe harus ngasup ibas nimai kerehen Yesus peduakaliken tetaplah sijaga kegeluhenta bagi singena ateNa,eme pedauh sikap si pekulah-kulah ibas geluhta.

Pointer Aplikasi

1. Ibas mebelasken Pertoton Tuhan alu ngataken “ Gelarndu Ipebadia Min”. Sisadari lah alu tuhu-tuhu Dibata e Badia kap,emaka ola mekarus melaskensa.
2. Arah ke Badian Dibata e kita pe harus tetap meteruk ukur ngadap ku Dibata, sebab kita manusia perdosa.
   
3. Bangsa Israel nuduhken kehamaten man Dibata si Badai arah reh ku kemah si Badia maka kitape reh ku Rumah Pertoton (Gereja).
4. Bangsa Israel njaga kehadiren Dibata si Badia ibas inganna tading,kita pe perlu si jaga Gerejanta alu beribadah si payo (njaga sikap,pengeranan ras tindakenta ibas ibadah) janah Dibata tetap terpuji.
5. Dibata hadir ibas kegeluhen kalak Israel selaku pilehen Dibata,kita pe si hadirken lalap Dibata ibas kegeluhenta bage pe rumah tangganta.
6. Tetaplah ersikap kita jaga keBadiaan Dibata arah Totalitas kegeluhenta ibas nimai kerehen Yesus Peduakaliken gelah kitape ndatken kemulian ibas Dibata SI Badia nari.
   

GBKP Depok – LA
Pdt Abdi Edinta Sebayang

Artikel lain yang terkait: