Bahan : Pilipi 3:4-11
Thema : “Kiniteken Man Kristus Pengasup Kita Nulak Si La Ngena AteNa”
Tujun :
- Gelah ngawan perpulungen ndarami ras ngayaki perbahanen singena ate Dibata (ihubungken ras penjemaaten YKPC Alpha Omega)
- Gelah ngawan ni perpulungen tetap ersada ibas kiniteken man Kristus ibas kegeluhenna
3:4 Tentu saja aku pe banci nge ernalem man barang-barang si bage. Adi lit kalak erpengakap maka banci ia ernalem nandangi adat-adat si teridah, bancin aku erpengakap bage.
3:5 Aku isunatken asum umurku waluh wari. Aku tubuh selaku kalak Israel, suku Benyamin, janah kalak Heber asli me aku. Kerna ndalanken Undang-undang, kalak Parisi kap aku.
3:6 Janah perbahan tutusna ateku ndalanken Undang-undang e, kugasgasi pe gereja. Bicara sekalak jelma banci rembak ras Dibata arah ndalanken Undang-undang aku me si labo pernah ersalah.
3:7 Tapi kerina si nai kuakap untung, genduari kinirugin kuakap erkiteken Kristus.
3:8 Labo kerna si e saja, tapi kai pe kinirugin kuakap rimbangken si meherga e, e me penandai kerna Jesus Kristus Tuhanku. Erkiteken Kristus, enggo kuambekken kerinana, janah kupedirep si e kerina sampah-sampah, gelah banci kudat Kristus dingen.
3:9 Tuhu-tuhu ersada aku ras Ia. Lanai bo kuusahaken ngerembakken diringku man Dibata arah ndalanken Undang-undang. Tapi aku enggo rembak ras Dibata arah kinitekenku man Kristus. Dibata jine si enggo ngerembakken aku kempak diriNa erkiteken kinitekenku.
3:10 Sada ngenca sura-surangku e me gelah kutandai Kristus dingen kugejap kuasa kekekenNa janah ikut aku ngenanami kiniseranNa, dingen bali ras Ia i bas kematenNa,
3:11 alu pengarapen maka aku ipekeke Dibata i bas si mate nari ku kegeluhen.
Adi sirenungken bahan PJJ Minggu silewat : Ungkapen Yosua man pemimpin Israel : genduari pilihlah apai atendu isembahndu..... Tapi adi aku ras isi jabungku Tuhan saja nge sikusembah (Yosua 24:15). Sie nuduhken man banta kerna “hidup ini adalah pilihan”, termasuk ibassa kerna kiniteken ibereken man banta kebebasen memilih. Adi pilihenta erkiniteken man Dibata tentu siman ikuten eme kai sienggo itetapken Dibata kerna orat nggeluh kalak sierkiniteken man baNa.
Salah sada bagin perbahanen kalak sierkiniteken man Kristus eme ngasup nulak silangena ate Dibata (Tema). Ertina siman ikuten/dalanken eme peraten Tuhan sienggo itetapkenNa man banta arah Pustaka Sibadia. Jadi kemegahen kalak sierkiniteken eme ibas ia banci ndalanken sura-sura Dibata ibas geluhna labo ibas ia ngasup ndalanken sura-surana.
Erbage perbahanen si enggo ipetangkas Dibata man banta selaku anakNa, siperlu tetap sigelem eme ibas kita tetap ngasup ncidahken/nggeluhken kegeluhen sierkiniteken man Kristus, kai singena ate Kristus (Kekelengen....) labo kai siakap kita mehuli/ngena ateta.
Pilipi 3:4-11
Ibas bahan enda icidahken Paulus kerna kegeluhenna :
• Meriah iakap ibas persadan ras Tuhan (3:1)
• Metenget nandangi kalak sindalanken perbahanen jahat (3:2)
• La ernalem nandangi adat-adat siteridah (3:3)
• La ernalem nandangi undang-undang erkiteken Kristus (3:4-7)
• Kerina sila erguna iambengken, Kristus nge si utamana (kiniersadaan ras Kristus) (3:8-9)
• Sura-sura Paulus : Itandaina Kristus ras nggejap kuasa KekekenNa janah ikut ibas kiniseranNa alu pengarapen ikut ibas kekenNa ndatken kegeluhen (3:10-11)
Banci siidah pengertin Paulus si pang ngenanami erbage kiniseran guna tetap setia ersada ras Kristus. Bagepe erkiteken kinitekenNa man Kristus ngasup ia nulak sura-sura dagingna eme guna kemegahen dirina, guna kemalemen atena. Pengalamen geluhna ibas kepatuhen ndalanken undang-undang dingen ernalem man undang-undang e enggo iakapna jadi si la erguna. Pengalamen ersada ras Kristus nge siigejapkenna jadi situhu-tuhu seh maka pang ia nadingken kerinana guna Kristus, nadingken kesenangen diri jenari bengket kubas erbage kiniseran tapi ermegah ia erkiteken kiniersadanna ras Kristus.
Bagem ibas perdalanen geluh enda, melala hal siperlu sitengeti erkiteken kita anak Dibata. Labo perlu siikuti erbage tawaren simegati ncubaken menawarken erbage keriahen, kemegahen ras pe keuntungen man banta, siingetlah maka ibas Kristus nge maka sidatken kemalemen ate, kemenangen ras keselamaten. Gia banci erbage perbeben sinihadapi kita ibas erkiniteken man baNa,.... Tapi ermegahlah sebab ibas sie kita banci tetap ersada ras Kristus seh kubas kemenangenNa.
Perlu kape sisadari maka ibas erkiniteken man Kristus e lit lalap pengorbanen siharus sidalani termasuk ibas nimbak peraten dagingta/sura-suranta. Tapi sie kerina labo erbahanca surut kita nehken singena ate Dibata. Tupung sie sidalanken maka kai sila ngena ate Dibata enggo banci sitaluken ibas kegeluhen enda jenari kita jadi pemenang. Sie kerina banci jadi erkiteken kiniersadanta ras Kristus. “Kegeluhendu ibas Kristus erbahanca kam megegeh” (Pilipi 2:1)
Ibas bahan PJJ Minggu enda tole kita iingetken kerna peranta ibas ncidahken kekelengen nandangi kalak sideban simembutuhken, sebab enda pe jadi bagin kegeluhen kalak sierkiniteken. Ibas Gerejanta GBKP enggo ilitken sada wadah pelayanen man kalak simembutuhken (keterbatasen) (ABK ; Anak Berkebutuhan Khusus) eme arah litna YKPC Alpha Omega i Kabanjahe. Yayasen enda ibahan guna ncidahken peran gereja man kalak silit keterbatasenna sebagai wujud nyata peran gereja ibas Diakonia. Seh genduari lit kurang lebih 84 kalak siilayani ibas YKPC enda. Arah penjematen YKPC tahun enda kita tole iingetken kerna dukungenta nandangi anak-anak YKPC enda. Erbage bentuk penampat banci sisehken rikutken ukurta meriah erpalasken kinitekenta. Sebagai bentuk Solidaritas Internalta pe banci siaturken kai banci siban ibas nehken dukungen penampatta.
Pdt.Alexander Simanungkalit,S.Th
Pdt.Alexander Simanungkalit,S.Th
0 komentar:
Post a Comment