Bahan : Kuan-Kuanen 20:18; Jakup 4:13-17
Thema : “Pindolah Kepentaren Dibata Ibas Perencanaan Kegeluhen”
Tujun :
1. Gelah ngawan perpulungen erpenggurun kubas Kata Dibata kubas perencanaan geluhna
2. Gelah ngawan perpulungen meteruk ukur ibas ndalani wari kegeluhen
Manusia nggeluh tentu lit sura-sura/pengarapen nggeluhna. Sura-sura enda mempengaruhi kegeluhenna seh maka erbage cara ibahan segelah banci tersehi sura-sura enda. Segelah banci tersehi sura-sura/pengarapen enda tentu iperluken metode, cara entahpe strategi gelah ula kita jadi kalak si “gagal”. Erbage kategori lit ibas kegeluhen enda ibas ia merancang/nusun strategi ndalani kegeluhen. Lit alu ngandalken pemeteh/kepentarenna, lit ngandalken kinilitenna, rsd. Ibas PJJ sekalenda ipersingeti kita kubas sada perencanaan ndalani kegeluhen eme alu strategi/cara ersukuten/mengandalken Tuhan. Sie siperluken sebab ibas kita ersukuten man Tuhan Dibata sieteh maka Tuhan sinampati kita. Enda siimani erkiteken labo pernah sura-sura Tuhan/rancangen Tuhan man banta la mehuli entahpe kita jadi kalak si “gagal”, tapi sebalikna sura-sura Dibata eme segelah kita terkelin (rancangan damai sejahtera labo celaka).
Labo siangka kai sijadi ilebenta ibas kita ndalani tahun 2013 enda. Tapi arus siangka maka adikita tetap ersada ras Ia, maka jelas Ia tetap nampati kita.
Kuan-Kuanen 20:18
Arah kitab enda banci siidah pengertin penulis kubas pentingna peran Dibata ibas kita ndalani kegeluhen enda. Pindo lebe pedah iertiken maka lebe kita erpengendes rikut ras ersukuten man Tuhan Dibata. Ertina sigejap maka ulu kerina lit ibas Dibata. Pengakun enda mahan bana kita ipengaruhi kubas pengendesen diri man Tuhan (tanpa Tuhan kita tidak mampu sendiri).
Adi man uluna kita erpengendes tentu lalap nge kita isampatina seh kita lanai kekurangan. Pindo lebe pedah enda pe ngertiken pengertin penulis maka iadepen Dibata kita tetap arus ibas kiniteruken ukur. Ibas kita lebe mindo man baNa tentu lanai kita ngandalken dirinta. Adi sienda jadi senjata/perkakasta maka tupung ngalaken erbage situasi (erperang) banci sidatken kemenangen sebab enggo lit strategi simbisana kel eme pengaturken Dibata.
Jakup 4:13-17
Nats enda eme nats pengajaren kerna ndalanken kegeluhen alu mehuli ibas kegeluhen enda eme alu tetap ersukuten man Dibata dingen nggeluh mengandalken Dibata seh maka dem kiniteruken ukur. Isingetken penulis kerna ndalani kegeluhen tentu mbelin sura-sura seh maka erbage cara ilakoken segelah banci idatken sura-sura e. Banci jadi guna ndatken kemalemen ate, keriahen, rejeki/keuntungen, lawes kita ku sada ingan (merantau) guna nehi sura-sura “gelah reh jorena”. Sienda isingetken penulis kune enda jadi labo sieteh kai sijadi ibas kerina usaha nehi sura-suranta e, sipasti arus lit eme kuasa Tuhan nandangi kerinana emaka madin ipelebe eme pengakun kerna kuasa Dibata ibas kegeluhenta seh maka kerina siirencanaken kita ipasu-pasuNa jadi kemalemen ate man banta. Sienda pe mabai kita kubas perenungen : seh gia sura-suranta adi turah nge sinanggel ? Tentu labo enda siniarapken. Guna sie tentu lit kesempaten sipakeken alu mehuli alu perencanaan sipayo eme ngandalken Tuhan seh banci ulihna kai pe sidaten maba kemalemen ate man banta.
Arah nats PJJ enda mabai kita ngerenungken ndalani kegeluhenta ibas tahun 2013 enda. Labo sieteh kai sibakal jadi ibas kegeluhenta tahun 2013 enda. Tapi gia labo sieteh arus sieteh ngelakoken perencanaan sipayo ibas ndalani kegeluhen enda eme alu tetap mengandalken Tuhan. Arus siantusi maka melala rencana/sura-suranta bagepe pengarapenta ibas tahun enda subuk e kerna dirinta, keluarga/jabunta, entahpe gerejanta ras pe bangsanta, ibas kerina enda siinget Kuan-kuanen 16:1 : Manusia erbahan rencana tapi Tuhan nge sinetapkenca. Jadi perlu kita mindo gegeh, mindo kepentaren man Tuhan Dibata ibas kita ndalanken kegeluhen enda terlebih ibas nusun rencananta ibas kegeluhen enda. Termasuk ibassa eme kerna usaha-usaha sibakal ilakoken kita, perlu kel kita ersukuten man Tuhan seh maka usaha e maba kiniulin man banta.
Ibas erpengendes man Tuhan tentu labo cukup itotoken sekali saja jenari siakap enggo dung. Kalak si erpengendes man Tuhan tentu ibas ia mindo arus ilakoken secara terus menerus sebab ibas sienda pe iuji ketutusenta rikut ras kesetianta. Ibas ketutusen/kesetian enda me prosesna Tuhan nampati kita seh sidatken kemalemen ate e. Sebab ibas sienda kange iuji kerna kiniteruken ukurta nandangi Dibata
Ibas perdalanen geluh enda tentu lit nge lalap jadi bagi ukur entah la bagi ukur. Sipasti sieteh kuja kin tujun nggeluhta : eme sidatken kemalemen ate janah ibas sie Dibata empuna. Tentu siarahken kerina perdalanen geluhta e man Tuhan Dibata, pindo lalap gegeh ras kepentaren man baNa seh mejuah-juah kita ndalani kegeluhen enda.
Pdt.Elexander Simanungkalit
0 komentar:
Post a Comment