Suplemen Bimbingen Pjj 31 Maret - 06 April 2013, Yohanes 21:15-18

Bahan  : Johanes 21 : 15 – 18
Thema : “Permakanilah Biri-BiriKu”
Tujun :
 - Gelah ngawan perpulungen ngertiken maka Jesus ndilo kalak si tek jadi permakan.
- Gelah ngawan perpulungen ndalanken tugasna e me mpermakani biri-biri Tuhan (melayani).


Johanes 21 : 15 – 18
21:15 Kenca elah man, nungkun Jesus man Petrus nina, "O Simon anak Johanes, kelengen kin atendu Aku asangken ate kalak enda?" Erjabap Simon Petrus, "O Tuhan, ietehndu kap maka keleng ateku Kam." Nina Jesus man bana, "Permakanilah anak biri-biringKu."
21:16 Nungkun ka Jesus pedua kaliken man Petrus, "O Simon, anak Johanes, keleng kin atendu Aku?" Erjabap Simon Petrus, "Keleng Tuhan, ietehNdu kap maka keleng ateku Kam." Nina Jesus man Simon Petrus, "Permakanilah biri-biringKu."
21:17 Petelu kaliken nungkun Jesus man Simon Petrus nina, "O Simon, anak Johanes, keleng kin atendu Aku?" Getem kal pusuh Simon Petrus sabap telu kali enggo Jesus nungkun man bana, "Keleng kin atendu Aku?" E maka erjabap Simon Petrus, "O Tuhan, kai pe ietehNdu kap. IetehNdu pe maka keleng ateku Kam!" Nina Jesus man bana, "Permakanilah biri-biringKu.
21:18 Kukataken man bandu: Si tuhuna asum kam nguda denga, kam ngaturken dirindu gelah banci lawes ku ja atendu, tapi kenca kam metua, idudurkenndu tanndu janah kalak si deban ngiket kam, jenari ibabana kam ku ingan si la atendu bage."

Perlebe

Kita ngelai erkiteken Tuhan enggo leben ngelai kita, ibas Padan si Mbaru kata ngelai it erbage-bage pengertin, diakoneo: ngelai ibas erti pelayan meja guna tuan ntah majiken, singelakokenca igelari diakonos ras pendahinna e ikataken diakonia (oge. Lukas 17: 8), Douleo: menghamba siilakoken sekalak doulos (budak), Leitourgeo: erdahin guna kepentingen rakyat (kepentingan umum). Kalak singelakokenca, ikataken leitourgos ras pendahin e ikataken leitourgia. Latreuo ertina erdahin guna mendapatkan (latron/gaji) ntah upah. Arah pengertin ngelai enda maka kai pe siilakoken kita ibas dahin geluh enda nandangi dirinta pribadi ras kalak sideban enggo termasuk kita ngelai.

Johanes 21 : 15 – 18

Perikop PJJ nta ibas minggu enda ngerana kerna perjumpaan/percakapen Simon Petrus ras Tuhan Jesus kenca IA enggo keke ibas si mate nari. Adi si pergermetken isi ogenta si sendah enda, teks enda i rangkai alu kata-kata si mejile/indah. Jesus mereken kesempaten man Simon Petrus segelah banci mengakui/mengungkapken penyesalenna melalui kekelengen/kasih. Enda me sada contoh si mejile mengenai pemulihen hubungen/relasi kenca selama enda Petrus enggo ngelakoken dosa nandangi IA. Simon Petrus enggo telu kali mersoken Jesus tupung Jesus ibas kiniseraan kenca IA itangkap i Taman Getsemane. Emaka guna ngingetken si enda, Jesus pe mereken telu penungkunen kerna kekelengen man bana segelah e Petrus banci meng-evaluasi/intropeksi diri kerna komitmen pelayanenna ndube.

Peristiwa enda pe merupaken lanjuten tema kerna perumpamaan sekalak permakan biri-biri ibas bindu sepuluh. Adi siperdiateken, labo lit perbedaan ‘real’ ibas telu perentah Jesus: “Permakanilah biri-biri-Ku” (ay. 15, 16, 27). Fungsi Jahwe sebagai sekalak permakan ibas Eseskiel bindu 34 ijelasken alu tangkas bahwa Jesus – Permakan (Johanes 10) man Petrus-permakan (Joh 21). Perlu siperdiateken uga kerna peranan Petrus sebagai permakan si bujur ras mehuli si ikaitken alu kekelengen (ay.15-17) ras sada kesediaan (perumpamaan permakan biri-biri ibas bindu 10:11-18) si nggit mereken gegeh ras geluhna (ay. 18-19). Enda pe banci siperdiateken kerna uga Petrus mereken geluhna guna kemuliaan Tuhan, seperti Jesus. Kekelengen si la ersibar, eme hakekat kerna kekelengen Jesus man banta manusia.

Pengkenaina

Kerina kita sienggo ngakuken maka Kristus jadi penebusta, situhuna enggo dat tugas ibas Dibata nari emekap jadi suruh-suruhenNa. Enda me gereja, si hadir ibas doni enda jadi “sira” ras “terang” guna maba kalak sideban kubas keselamaten si kekal. Kalak si ndalanken dahin enda labo soal jabaten, ntahsa ia Pandita, Pertua/Diaken ntah pengurus bidang kategorial bagepe pengurus PJJ, tapi kerina kalak si tek. GBKP enggo seh umurna 123 tahun (1890-2013), alu bage ibas segi umur gerejanta enggo metua ras anggotana pe enggo tersebar i seluruh Indonesia enda. Ibas HUT GBKP si pe 123 enda, kita selaku perpulungen iajuk tole guna memantapken kerna komitmenta ndube ibas ngelai segelah ngasup empermakani rarasen biri-biri Tuhan, gelah banci tetap erdalan ibas terang Kristus. Tapi sipertama kel, labanci lang lit ibas kita eme kiniteruken ukur ras pengakun i lebe-lebe Dibata. Adi lit kin tuhu-tuhu kiniteruken ukur e ibas kita, Dibata pasti mpegegehi kita, emaka meriah siakap ndahiken dahin e.

Kita selaku anak-anakNa sienggo ipeserapNa jadi sikinirajangenNa tentuna ilebuh guna ncidahken spiritualitas ras solidaritasta nandangi kalak sideban. Sekalak siibereken tanggungjawab siterbelinen tentu tanggungjawabna ibas ngelai kalak sideban tentu lebih terbelinen asa kalak si sitik ialokenna. Kai sijadi perayakenta eme gelah kalak ngidah maka kai siibahan kita e, enggo leben ilakoken Jesus man banta. Kita terjeng sebage sarana penyambung berkat. Kita ngelai, sebab IA enggo leben encidahken kekelengenNa man banta. Ise si merhat ngerubah doni enda ku bas hal-hal si lebih mehuli, tentuna ia harus nggit lebe ngerubah dirina jine. Tentuna enda jadi sada gerak iman kita uga kita ipakeken Tuhan Jesus jadi perkakasNa, tentu hal enda tujunna labo soal ise, tapi kininggiten guna ndalanken perentahNa.

Pdt.Alexander Simanungkalit

Artikel lain yang terkait: