Liturgi ras Renungen Kebaktian Keluarga Tutup Tahun 2013 ras Buka Tahun 2014 GBKP Klasis Jakarta-Bandung

KEBAKTIN KELUARGA

TUTUP TAHUN 2013 RAS MBUKA TAHUN 2014

GBKP KLASIS JAKARTA BANDUNG

PERSIKAPEN

Guna kiniraturen perdalanen kebaktin enda kerina jabu-jabu anggota perpulungen ersikap lebe, alu si aturken ise sijadi liturgis/pemimpin kebaktinta, sipersiapken sarana guna kebaktin alu mehuli: Alkitab, ingan persembahen,kursi ras meja (adi iperluken rikutken situasi). Sipersiapken dirinta gelah bengket kita kubas kebaktin alu pusuh situhu-tuhu ersembah man Tuhan. Guna si e asa bancina si non aktifken lebe handphonenta gelah la mengganggu kita beribadah kune lit telephone ntah sms ucapan selamat tahun baru man banta.

Pendilo ku bas kebaktin (iogeken sekalak anak/remaja/permata) :

Puji-pujin ras bujur sisehken man Dibata perban enggo itaruhkenNa kita ku bas penghujung tahun janah nggo ka kita ipebengketNa ku tahun simbaru enda alu mejuah-juah. Ibas tahun si lewat mungkin melala pengalamennta si la bagi ukurta, tapi ibas tahun simbaru enda turah pengarapen simbaru maka tahun enda kita lebih mehuli asa tahun sienggo lewat. Meriah ukurta, mari si alo-alo tahun simbaru tahun 2014 enda alu sisalamen kita kaus kemuhen janah sikataken : SELAMAT TAHUN BARU…..

II. KEBAKTIN (L = liturgis/pemimpin kebaktin ; P = Perpulungen)

1. Rende PEE No 96 : 1 “ Puji Tuhan Haleluya “

Puji Tuhan haleluya, wari enda wari Dibata

Pulung kita k’rina jenda, rende nembah muji gelarNa

Haleluya, haleluya puji gelarNa

Haleluya, haleluya puji gelarNa

2. Ertoto

3. Responsoria : Ende-enden pujin ( Masmur 100 )

L : Ersuraklah man Tuhan o pertibi kerina, nembahlah man Tuhan alu ukur meriah, dahilah kuadep-adepenNa janah rende meriah

P : Ngendeken Reff . PEE No 96

Haleluya, haleluya puji gelarNa. Haleluya, haleluya puji gelarNa

L : Ola lupa maka Tuhan kap Dibata, Ia sinepa kita, emaka sikerajangenNa nge kita,kita kap bangsaNa, kita kap rarasenNa

P : Ngendeken Reff . PEE No 96

Haleluya, haleluya puji gelarNa. Haleluya, haleluya puji gelarNa

L : Bengketlah ku bas pintu gerbangNa alu ende-enden pengataken bujur, ku bas kesainNa Alu puji-pujin. Katakenlah bujur man baNa dingen pujilah Ia

P : Ngendeken Reff . PEE No 96

Haleluya, haleluya puji gelarNa.Haleluya, haleluya puji gelarNa

L : Sabab Tuhan mehuli kap dingen tetap Ia erkeleng ate, Ia setia, tetap rasa lalap

P : Ngendeken Reff . PEE No 96

Haleluya, haleluya puji gelarNa. Haleluya, haleluya puji gelarNa

 4. Renungan : Mazmur 143 : 10 & Pilipi 3 : 13-14

Waktu terus erdalan, ibas mengketi tahun simbaru enda kai nge si jadi tujun geluhta ? mungkin diantara kita nggo rukur kerna karirta, sekolahta, pengembangen usahanta, teman geluhna, rsd. Si enda kerina mehuli tapi gelah sieteh sie kerina terjeng doni enda kel ngenca. Tujun geluhta labo terjeng doni enda tapi tujun geluhta situhu-tuhu eme Surga. Bagi Paulus ngataken maka tujun geluhna eme guna ndatken pemere si isikapken Kristus Jesus. Pemere e me pendilo Dibata guna kegeluhen i surga. Guna ndatken tujun e erlajar kita arah strategi Paulus :

• Bagi ngikuti sada perlumban pinter aku kiam ku tujun, ertina la nia-niaken waktu tapi minter makeken waktu alu mehuli, erlumba alu tutus : gigih, serius ras lit tekad si bulat guna ndatken tujun e. Berkarir, erdahin tutus, erkiniteken pe tutus. Ibas make waktu cuba si nen ku dirinta masing-masing enggo nge sipakeken kerina alu mehuli ? sebab waktu e bergerak LINEAR ( lurus memanjang ) labo SIKLUS ( Berputar-putar ). Waktunta 24 jam/hari = 8.760 jam/tahun. Bicara ibereken Tuhan umurta idoni enda seh 70 tahun = 613.200 jam lit waktu nta idoni enda alu perincian : Waktu istirahat 6-8 jam (8 jam x 365 hari = 2.920 jam /tahun x 70 tahun = 204.400 jam istirahat , jadi lebih kurang sekitar 408.800 jam saja waktunta beraktivitas guna: kegiatan rutin (ridi, erbaju, ersepatu, ersuri, rsd), erdahin (ku kantor, kujuma, erbinaga, rsd), penyaluran hobby (ngkawil, ercatur, olahraga, ku salon, rsd) ras kebaktin (perpulungen jabu-jabu, PA moria/mamre, ku gereja, rsd). Nginget kerna kesempaten e labo lalap jadi sikerajangennta perlu kel kita ngergaken waktu siibereken Tuhan. “berekenlah waktunta guna Tuhan, ula sisa-sisa waktunta sibereken”.

• Ngagui singambati, Tentuna kai pe sijadi tujun geluhta banci jadi lit singambati,perlu kita penampat. Paulus ngataken itegu Tuhan ia gelah banci ia jadi sikerajangen Tuhan. Sipindolah rusur Tuhan sinampati dingen sinegu-negu kita gelah banci kita jadi sikerajangen Kristus labo sikerajangen doni enda.

• - Ngelupaken si arah pudingku janah erpala-pala ndatken si arah lebe. Kai pe sijadi bas geluhta bagi sangana bas perlumbanlah siakap kita, lalaplah kiam , lalap la pernah erpengakap nggo seh. Alu bage berjuang terus guna dalanken peraten Tuhan. Natap kempak Jesus saja kita. Ula bagi ndehara lut erkiteken nulih kupudi emaka salih ia jadi binangun sira (Kej.19 : 26)

Erkemalangenlah kita tetap man Tuhan, Masmur 143 : 10 ngataken man banta : “Kam kap Dibatangku, ajari aku ngelakoken peratenNdu. Mehuli min Kam kempak aku, jenari babai aku arah dalan sipinter “. Selamat Tahun baru man banta kerina. Amin

5. Persembahen + Rende KEE No 117 : 1-4 “ Nggo mentas tahun male e “

(1) Nggo mentas tahun male e, Kam me ku puji Tuhan e

Jaga kawali Kam tetap, tendingku ras dagingku kap

(2) OYesus Kam penebusku, keleng ateNdu man bangku

Tahun simbaru enda pe, taruhken perpulungen e

(3) Ras kami min kataNdu e, man tending ukur kami e

Pedauh min k’rina dosa e, ras percuban si jahat e

(4) Lias ateNdu o Tuhan, b’re min man kami ras teman

Urasi kami k’rina min, alu Kesah Badia kin

6. Pertoton persembahen ras pertoton syafaat

7. Responsoria : Tekad ndalani kegeluhen ibas tahun simbaru ( Pengerana 1 : 3 – 9 )

L : Gedang-gedang geluhta kita erdahin, cur-cur panasta. Tapi kai kin gunana man banta si e kerina ? lesap sada kesusuren reh ka kesusuren si deban, tapi doni enda bage nge lalap

P : lesap sada kesusuren reh ka kesusuren si deban, tapi doni enda bage nge lalap

L + P : Ngendeken Reff . PEE No 91

O Bapa dengkeh pemindonku, lit kap sada sura-surangku Atan min aku ibas rumahNdu segedang geluhku

L : Pultak kang matawari, jenari sundut ka. Latih iakapna mulihken ku bas ingan ndube, jenari pultak ka ia. Angin rembus ku selatan, jenari rembus ka ku utara, erpusing-pusing dungna mulihken ka.

P : Kerina lau mbelin ku lawit perlawesna, tapi lalap ngelawit labo dem. Dungna mulihkenka ku bas uluna, jenari maler ka.

L +P : Ngendeken Reff . PEE No 91

O Bapa dengkeh pemindonku, lit kap sada sura-surangku Atan min aku ibas rumahNdu segedang geluhku

L : Kai pe la mereken kepuasen, kerina erbahan leja. Mata la puas ngenen, pinggel la puasmegi-megi.

P : Kai singgo pernah jadi, denggo jadi ka. Kai si nggo pernah ilakoken , denggo iulihi ka.Kai pe labo lit mbaru ibas doni enda.

L + P : Ngendeken Reff . PEE No 91

O Bapa dengkeh pemindonku, lit kap sada sura-surangku Atan min aku ibas rumahNdu segedang geluhku

8. Pertoton Tuhan

Pdt Karvintaria br Ginting, STh

GBKP Rg. Cijantung- 08126359640

KEBAKTIN TUTUP/BUKA TAHUN 2013/2014 GBKP KLASIS JAKARTA BANDUNG

KELUARGA : __________________________________

RUNGGUN : __________________________________

SEKTOR : __________________________________

TEREM SIPULUNG : __________________________________

PERSEMBAHEN : Rp ..................................................

Artikel lain yang terkait: