Renungan / Khotbah Kejadian 3:17-19, Pekan Penatalayanen Wari I, tgl.19 Januari 2014

Introitus : 

“Kalak si la nggit erdahin ola bere man” (II Tesalomika 3:10b)

Ogen : Perbahanen Rasul-Rasul 18:1-11; Khotbah : Kejadin 3:17-19

Thema : “Mejingkat Erdahin”

Mejuah-juah….. selamat Tahun Baru.

Senina ras turang ibas kekelengen Yesus Kristus, ibas bena tahun simbaru enda mulai me kita bengket kubas kegiaten pelayanen ibas gerejanta. Sue ras prioritas program GBKP tahun 2014 enda, bengket me kita kubas Tahun Peningkatan Kwantitas SDM yang Berkwalitas. Erpalasken si eme Pekan penatalayanen ibas sada minggu enda pe ibabai kubas Thema umum: “Empermuliaken Dibata alu nambahi kalak si pentar ibas GBKP” (Kuan-Kuanen 1:7). Khususna ibas pekan penatalayanen wari si pemena enda, kita ipersingeti segelah” mejingkat erdahin”(thema). Mejingkat erdahin, ulet, kerja keras eme biak geluh kalak si tek, ras salah sada cara, sikap kerja guna meningkatken SDM si berkwalitas.

Erpalasken Kejadin 3 : 17-19, ituriken kerna kearusen erdahin. Ibas bahasa karo lit 3 kali isingetken kerna kata, ”terpaksa”, ertina Kerina manusia sebagai tinepa Dibata arus maka ia erdahin. Erdahin guna ndatken keperlun geluh, erdahin gelah ngasup nampati kalak si deban ibas nehken kekelengen, erdahin guna mpermuliaken Dibata. Terlebih sebagai kalak Kristen patut isedarina, itehna maka geluhna eme citra Dibata, teman sekerja Dibata I doni enda. Kesegambaren manusia ras Dibata eme palas maka kita pe arus erdahin bagi Dibata pe tetap kap erdahin. Ibas Yohanes 5: 17, nina Yesus”BapangKu erdahin kap lalap, e maka Aku pe arus erdahin”. Rasul Paulus pe naksiken kerna pengalamen ibas dahin pelayanenna I kota Korinti (Perbahanen Rasul-rasul18:1-11, ras II Tesalonika3:10), arus maka tetap tutus ras mejingkat, kerja keras ibas erdahin guna nehken Berita si Meriah. Nina Paulus ibas II Korinti 11:27,”Ibas aku erdahin mberat dingen latih suhsah e, megati aku laterpedem, megati muas dingen melihe, megati lalit si man panganenku, megati bergehen erkiteken kurang uis”. Ertina tole, la erkiteken tantangen entah perbeben si lit erbahanca surut, ngadi nehken dahin pelayanen. Kitik entah mbelin dahin si aloken kita sue ras talenta si ibereken Dibata man banta, patut me maka si dahiken alu mehuli. Ulih pendahin labo erpalasken gegeh, pemeteh si lit ibas manusia tapi arah pemere ras pasu-pasu Dibata kap man banta.

Rikutken pengajaren ibas Etika Kristen kerna Etos Kerja, lit piga-piga hal si jadi pelajaren man banta ibas kita erdahin eme :

• Kerja adalah rahmat atau anugrah. Arus erdahin alu dem pengataken bujur, sebab Dibata nge si mereken dahin e man banta.
• Kerja adalah amanah. Arus erdahin alu tutus la banggung-banggung, seh tuntas ras penuh integritas.
• Kerja adalah panggilan. Arus erdahin alu benar, adil ras ertanggung jawab.
• Kerja adalah aktualisasi. Arus erdahin alu penuh semangat.
• Kerja adalah Ibadah. Arus erdahin alu serius ras penuh kecintaan.
• Kerja adalah Seni. Erdahin arus kreatif ras sukacita.
• Kerja adalah Kehormatan. Mejingkat erdahin ras bujur.
• Kerja adalah pelayanan. Erdahin alu mehuli, sempurna ras dem keteruken ukur.

Turang ras senina ibas kekelengen Yesus Kristus, tentu bage me pengarapenta ibas kita ndalani wari-wari kegeluhenta, ibas kita ndahiken dahinta, tetap maka malang kita man Tuhan. ALu bage ngasup kita nguasai diri ras sura-sura si lamehuli eme kemalasen, kerangapen ras kiniganjangen ukur. Jadilah arah kegeluhenta, pendahinta erbahanca malem ate kalak si deban dingen terpuji gelar Dibata.

“Erkiteken sie o senina-senina si kukelengi, tetaplah ukurndu, ola mbewat-mbewat. Mejingkatlah kam rusur ibas ndahiken dahin Tuhan, sabap itehndu maka labo percuma dahin si dahikenndu ibas Tuhan” (I KORINTI 15:58 ). Amin.

RG.GBKP TAMBUN

Pdt.T. Tarigan

Catatan sermon:

1. Lit penabah kayu 10 kalak ibagi 2 kelompok. Kelompok 1 erdahin ia alu tutus ras pekesahken ibas waktuna. Kelompok 2 erdahin alu tutus la pekesahken. Tapi ternyata bekasna belangen kelompok si pemena. Engkai maka bage? Ternyata kelompok sipemena pekesahken ia janahna nggarut sekinna she maka tetap entelap. Enda jadi ilustrasi segelah ula kita terus erdahin lupa pekesahken, lupa ersembah ibas wari minggu. Banci saja mbue dat sen tapi keri nukur tambar, kurumah sakit, rsd.
2. Ibas erdahin ula lupa 3M. Man, minem, medem.
3. Ibas Pekan sipemena enda perlu pe isingetken thema umum. Nambahi kalak sipentar (berkualitas) ibas erdahin. Ertina reh berkualitasna labo asal erdahin.
4. Ibas erdahin, erdahinlah alu HO2. (HO2: Hati, otak dan otot eme sehubungen ras kualitas.
5. Erdahin pe desken kalak main gitar. Talina/senarna ula longgarsa bagepe ula ka gestingsa. Longgar la mejile sorana adi gestingsa banci peltep. Pas gestingna maka mejile. Bageme pe erdahin pas ia maka mehuli jadina.

Artikel lain yang terkait: