Introitus :
"Kelengilah Tuhan Dibatandu asa ukurndu, asa tendindu dingen asa gegeh ras kepentarenndu lit; bage pe kelengilah temanndu manusia bagi kam ngkelengi badanndu (Lukas 10:27).
Ogen : Kejadin 1:26-30; Khotbah : Filipi 2:1-4
Thema : Nggeluh erguna man sekelewetta
Tujun : Nambahi kalak pentar alu nggeluh erguna man sekelewetta
Renungen
Situhuna ngerana kerna erguna man sekelewetta, man kalak Kristen labo nari hal si la jelas, sabab ibas pengajaren Yesus idas uruk enggo me jelas maka kalak sitek iidentikken ras sira ras terang doni. Ertina baik secara inplisit (bagi sira ibas gulen la teridah tapi ernanam) bagepe eksplisit (bagi terang mis teridah) kehadiren kalak Kristen labo kehadiren bage-bage saja tapi kehadiren siknifikan “bermakna” ntahpe erguna man sekelewetna. Bagi sira ras terang she kal perluna ibas kegeluhen manusia, bagem arusna kehadiren kalak keristen she kal perluna itengah-tengah doni enda.
Adi sioge kitab Kejadin, khususna pengogenta ibas Pekan Penatalayanen berngi sipe V ken enda (Kejadin 1:26-30) situhuna tang-tangna nari, ibas diri manusia selaku tinepa Dibata si pepudina ibas kerina sinitepaNa si lain asangken kerina tinepaNa eme la saja manusia e irangcang alu khusus erkiteken ijadiken la saja nina Dibata “jadilah”, tapi “genduari sijadikenlah”[1] (lit “arih-arih") tapi pe “sisentudu ras tempas Dibata”, ertina manusia e makhluk berpribadi janah lit kengasupen lebih asangken tinepa sideban khususna ibas hal akal budi ras kebijaksanaen. Emaka man manusia nge ibereken mandat guna ndemi ras naluken doni enda bage pe “ngkuasai”. Alu bage kehadiren manusia tuhu-tuhu penting itengah-tengah doni enda man tinepa sideban. Alu kata sideban ka erguna man doni enda. Tapi erkiteken manusia ndabuh ku bas dosa, kehadiren manusia la nai bagi si niarapken Dibata. Manusia megati enggo bagi ungkapen sinipopulerken Thomas Hobbes sekalak filsuf Inggris: “homo homini lupus” (manusia adalah serigala bagi manusia lain), ertina lanai bo ia erguna man tinepa sideban tapi sebalikna gelah she tujun la masalah adi erperang pe.
Erkiteken si e manusia perlu ipelimbarui. Janah sienda enggo ilakoken Dibata ibas Yesus Kristus. Ibas II Korintus 5:17 ikataken “Adi kalak ersada ras Kristus, ia me tinepa si mbaru, si male enggo lepas janah nehenlah, si mbaru enggo reh.” Sendalanen ras sienda, tole Paulus ngingetken perpulungen, ngingetken kita pe arah bahan khotbahta (Filipi 2:1-4) maka arusna kerina kalak si enggo tek man Yesus Kristus kegeluhenna enggo ibas Kristus, janah kasa kalak si kegeluhenna ibas Kristus arusna megegeh ibas ngelakoken singena ate Dibata ntah pe alu kata sideban nehi tanggungjawab siibereken Dibata selaku tinepa sisentudu ras tempasNa. Megegeh erkiteken: (1) Keleng ate Kristus ngapuli kita. Amin gia ibas doni enda ntah ibas perpulungen mbue si la bagi ukur[2] sierbahansa ceda ate, tapi keleng ate Kristus sienggo ialoken e, eme ija Yesus Kristus enggo mate guna nebusi dosa manusia, erbahansa perpulungen la nadingken kiniteken. Bagepe tek maka keleng ate Kristus nalihken sila bagi ukur e guna kiniulin perpulungen. (2) Lit “persekutuan Roh” (Ma rembak kin kam ras Kesah Dibata?). Adi kalak si rembah ras Kesah Dibata tentu Kesah Dibata e mempengaruhi ia guna ngasup tetap rukur, ngerana ras erperbahanen sue ras singena ate Dibata. (3) Lit “kasih mesra dan belas kasihan” (Ma kin sikeleng-kelengen kam dingen mekuah atendu sekalak nandangi si debanna?). Kegeluhen ibas Kristus indikatorna lit “kasih mesra ras belas kasihan”. Ertina labo lit kalak singaku tek man Kristus la sikeleng-kelengen. Adi lit denga, perlu jera. Bageme harapen Paulus arah suratna enda eme segelah perpulungen nggeluh ersada, enggeluh sikeleng-kelengen.
Resep si ibereken Paulus gelah tetap lit ibas kiniersadan eme sipemena: ibas erbahan kai pe la erpalasken kerangapen ras ukur meganjang (ayat 3a); sipeduaken: meteruk ukur ras la menganggap diri ulin asangken kalak sideban (ayat 3b); sipeteluken: la egois (ayat 4).
Adi sidalanken resep enda enggo pasti kehadirenta labo saja erguna mpeteguhi persadan tapi pe tentuna man lingkungen ija kita tading, ntah pe erguna man sekelewetta. Erguna man sekelewetta ningen e mbue curakna. Adi ibas persadan, minimal kehadirenta e erbahansa malem ate kalak labo sebalikna; madin sitik ngerana tapi mbue perbahanen, asangken mbue ngerana tapi cakap ngenca. Adi itengah-tengah masyarakat asa ngasupta jadilah kita teladan ibas kai-kai saja pe (banci ipegedang). Emaka iarapken arah pekan penatalayanen wari sipe V enda tole mperingeti kita maka kita kap tinepa Dibata sisentudu ras tempasNa tapi enggo ceda erkiteken dosa ras enggo ipelimbarui arah ngaloken perkuah ate Dibata ibas Yesus Kristus gelah tugasta ntah pe pendilota selaku tinepaNa banci mulihi idalanken alu payo.
Pdt.S.Brahmana
[1] Menurut Tafsiran Masa Kini 1 Kejadian-Ester Hal.82, kata “genduari sijadikenlah” ("Baiklah Kita menjadikan manusia), Dibata ngerana man “tentera surgawi”. Ibas bagin sideban Pustaka Sibadia isingetken maka “mahluk-mahluk roh” (malekat) si singelai lit ideher Dibata (Bd.Kejadin 3:22,24; 11:7 ras 18:21; Bd.Kejadin 18:2; 19:1 ras Jesaya 6:8). Lain ka adi menurut tafsiren Full Life. Nina, kata “Kita” nuduhken litna kejamaken (Ketritunggalan) ibas Dibata (Bd.Maz.2:7; Yes.48:16). Ntah kai pe pendapat kerna sie, sijelas kata jamak ibas ayat 26 enda encidahken kekhususen ibas njadiken manusia ibanding tinepa sideban.
[2] Ibas Perpulungen Filipi kepeken lit perpecahen (Bdk. 4:2) eme sababna ibas suranna Paulus mbelin kal menekanken kesatuan/kiniersadan.
0 komentar:
Post a Comment