PJJ Tanggal 20-26 April 2014 isehken i PJJ Sektor 2 GBKP Rawamangun

OGEN : Kejadin 41:33-36

Thema : Pentar Ngidah Perubahan ekonomi

Perlebe

Salah sada hal penting ras mbue icakapken ibas geluh manusia eme masalah ekonomi. Engkai maka penting sabab manusia mahluk sosial janah keberadan ekonomi menentuken status sosial. La ternapiken status sosial pe megati jadi ukuren ibas milihen pt/diaken, amin gia la tertulis. Bagepe masalah ekonomi mbue penyebab keretaken hubungen keluarga, terlebih ibas jabu. Lit lagu "ada uang abang sayang, tdk ada uang abang melayang". Emaka masalah ekomomi pe mbue ituriken ibas Alkitab. Misalna ibas Amsal isuruh kita erlajar ras perkis. La gia lit pemimpinna tapi ersada ia ibas pepulung nakanna ibas wari perlego segelah paksa perudan lit persedian nakanna (Amsal 30:25). Bagepe nina Paulus sila erdahin/malas ula padah bere man (2 Tes 3:10). Ibas 1 Tim.6:10 Paulus pe ningetken gelah ula merangap nandangi duit. Sabab cinta uang adalah akar segala kejahatan. Bagepe mengenai masalah ekonomi enda isehken Yesus arah perumpaman Kalak bayak silenge (Luk. 12:13-21). Bage perumpaman Lazarus ras kalak bayak (Luk.16:19-31). Emaka menyikapi masalah ekonomi enda perlu kepentaren. Sehubungen ras sienda erlajar kita arah Yusuf. Arah Ogenta teridah kal uga pentarna Yusuf mengarahken raja Firaun uga menyikapi masa depan Mesir sehubungen ras perubahen ekonomi.

Pebagasi Ogen ras Aplikasi

(1) Kepentaren Yusuf erkiteken Dibata singarak-ngaraksa (Kej.39:2, 3, 21, 23) emaka :

• Sangap ia ibas kerina pendahinna (Bd.Mazmur 1:3)
• Kai pe idahikenna mehuli kerina ulihna

(2) Kepentaren Yusuf erkiteken ia mengandalken Dibata (Kej.41:16).

• Bd. Yohanes 16:5

(3) Kai ate Dibata ilakokenNa ntah pe rencana siilakokennNa banci saja arah kalak si labo bangsa Tuhan (ayat 25, 28), saja ngenca iperluken kalak siniarak-arak Dibata mereken antusen sipayo bagi Yusuf.

• Dibata banci saja make ise pe guna kiniulin doni enda. Katakenlah ibas tanggal 9 Juli 2014 milih presiden ras wakil presiden. La gia capres/cawapres e kalak Kristen labo e erbahansa kita la ikut milih. Saja ngenca kalak si niarak-arak Dibata ngasup nentuken pilihen sipayo eme milih capres/cawapres siipake Dibata guna nehken sura-surana nandangi Indonesia enda.
• Kehadiren anak-anak Dibata ibas doni enda seh kal perluna. Bagi kehadiren Yusuf mereken nasehat si payo man Raja Firaun seh maka terhindar ibas masalah kelihen simeneken negeri e. Kerna kehadiren enda eme sababna nina Yesus “kam me sira ras terang (Mat.5:13-16). Nuduhken uga pentingna kehadiren anak-anak Tuhan guna maba kiniulin nandangi doni enda.

(4) Kepentaren Yusuf labo saja terjeng ngasup mereken antusen nipi raja Firaun, tapi pe mereken solusi (ayat 33-36). Kenca enggo jelas permasalahenna, Yusuf mereken usulen/solusi:

• Gelah ipilih sekalak si erpemeteh ras pentar (berakal budi dan bijaksana) ngaturken negeri Mesir sehubungen ras masalah ekonomi/pangan (33)
• Gelah iangkat pegawai-pegawai sideban guna pepulung seperlima ulih peranin tupung paksa nakan riba-riba ras mereken kuasa muniken pangan e, alu bage ibas paksa kelihen 7 tahun lit persedian pangan (34, 35, 36)

(5) Thema: Pintar ngidah perubahen ekonomi.

• Erpalasken ogenta Yusuf ngasup ngidah perubahen ekonomi mesir arah nipi raja Firaun erkiteken Dibata ngarak-ngarak ia. Bagepe kita jaman genduari erkiteken pengarak-ngarak Dibata pintar kita ngidah ras ras menyikapi perubahen ekonomi baik secara internasional, regional, bagepeperubahen ekonomi itengah-tengah bangsanta. Tentu enda labo saja penting man pelaku bisnis, pengusaha, pedagang tapi pe man banta kerina. Secara sederhana misalna sen si lit mis tukurken ku taneh ntah emas asangken taman ku bank. Erkiteken bunga bas bank rendah. Ntah nukarken sen dolar ku rupiah paksa rupiah menguat, rsd.
• Mbaru-mbaru enda ngerana aku ras sekalak si paksa genduari mbelin kal pemasu-masun Dibata arah usaha si lakokenna. Tuhu lenga kuteh maka minggu enda ogen siman oraten eme kerna Yusuf. Reh ningku, kuidah kam bagi Yusuf ibas jaman raja Firaun menyikapi paksa melimpah ulih juma alu cara-cara si cerdik. Engkai maka bage ningku? Sabab kuidah labo saja ia melumbar man kemahen-kemahen Tuhan tapi keuntungen usahana e iinvesna ku hal-hal si menguntungken nandangi masa depan ekonomina. Kukataken pe maka ibas geluh enda, bagepe ibas usaha lit nge paksa-paksana. Lit paksa kelimpahen/maju banci ka lit paksa sulit/lesu. Emaka pentarlah menyikapi paksa-paksa e.
• Bagepe lit ka sekalak pertua si cukup jaya paksa ia erdahin denga ibas pemerintahen. Ia cukup ikenal, ia sekalak melumbar, setiap lit pembangunen gereja usur lit ije gelarna. Reh nina man sekalak temanna pertua ras pernah pe ikatakenna man bangku, harapenna kenca pensiun eme uga maka tetap ia ngasup melumbar ras setiap pembangunen tetap denga lit pemerena. Kai siniarapkenna enda, kai si icurhatkenna enda isikapina alu pentar eme erbahan usaha sibanci akapna terlakoken. Puji Tuhan seh genduari ngasup denga ia tetap eksis.
• Bagepe man ngawan niperpulungen/keluarga arus pe pintar ngaturken ekonominta. Ula “lebih besar pasak dari pada tiang”. Terlebih man pernanden. Ula kari perban kitik denga anak, lenga perlu mbue biaya, emaka pemasuken silit/sen si lit igunaken nehi keinginen ntah pe nukuri si labo kebutuhen, jenari paksa anak membutuhken mbue biaya guna sekolahna la lit sen sabab la lit tabungen ntah investasina. Ula ninta lit nge pagi rejenina anak e. La nai jamanna rukur bage. Emaka erpalasken pengogenta, sisikapilah adi kitik denga anak anggaplah desken paksa pangan riba-iba emaka nabunglah ras paksa anak e reh galangna reh ganjangna ka sekolahna ija mbue ibutuhken dana anggaplah paksa kelihen tapi erkiteken lit tabungen la lit masalah, sabab enggo isikapken kerina.

(6) Payo “kalak pintar erkiteken iarak-arak Dibata, mengandalken Dibata” emaka tetap malem atena erkiteken ngasup ia alu pintar menyikapi paksa-paksa ibas geluhna eme paksa ekonomi sikap ntah lang.

Pdt.S.Brahmana

Artikel lain yang terkait: