Introitus :
Kenca tiap pesta enggo dung,lampas erpagi pagi keke Jop,jenari i persembahkenna persembahen tutungen guna pebadiaken anak anakna e sekalak sekalak. Si e i lakokenna sabab rukur ia,banci jadi anak anak e enggo erbahan dosa si la teridah erkiteken ceda ukur Dibata alu la i arapna.(Jop 1 : 5).
Ogen : Kolose 3:12-17; Khotbah : Masmur 112: 1 -6.
Thema :
Keluarga si erkoinonia,erdiakonia ras ermarturia.
Kata perlebe
Keluarga kriten eme bagin ibas gereja Tuhan nari ntah pe i gelari gereja Tuhan yang mini,ija gereja si arus berpengaruh ku tengah tengah masyarakat,ernanam kusekelewetna arah sikap enggeluh,pengerana,perukuren rasperbahanenna . Gereja si arus jadi teladan i tengah tengah masyarakat,ibas pelayanenna,kekelengenna. Keluarga Kristen eme ,keluarga si erkoinonia,er diakonia,ras er marturia,gelah banci teridah tanda tanda keluarga kalak Kristen e,ija nande,Bapa ras anak anak ikut muaqt bagin ibas kegiaten kegiaten gereja suei ras talenta talenta si lit ibas sekalak sekalak. Gelah alu bage keluarga kristen e,tetap ngasup ncidahken maka ia tuhu tuhu gereja si erpengaruh ku tengah tengah masyarakat ibas perbahanen perbahanen simehuli e.
Bimbingen.
Malem ate kalak sierkemalangen man Tuhan,si ermeriah ukur ngikutken perentah perentahNa( Mas 112 : 1); Kai kin si idarami kita bas nggeluh enda ? Sini i darami kita ibas kegeluhen enda eme kemalemen ate,janah kemalemen ate si tuhu tuhu sidat eme arah erkemelangen man Dibata,labo arah erta doni ntah ndarami hiburen ku mall mall,sebab adi arah erta doni ntah bas ingan ingan sideban sidarami kemalemen ate ,e sifatna sementara ngenca. Tapi kemalemen ate si tuhu tuhu,eme nggeluh ibas perentah Tuhan,ngikutken perentah perentahNa alu ermeriah ukur,eme simereken pengertin man kalak si erkiniteken maka datna kemalemen ate si tuhu tuhu. Keluarga kalak si erkemelangen man Tuhan,la saja ndatken kemalemen ate ,tapi anak anakna pe kalak si erkuasa i negeri,kesusurenna i pasu pasu,isi jabuna jadi bayak namura,janah kebujuren lit bas ia. Jadi padan si ibereken Tuhan man kalak si erkemalangen man Tuhan labo saja terjeng sie saja iberekenNa,jadi terdauhen iberekenNa rikut ras bahan renungenta sendah. Arah kai si i suratken arah bahan renungenta sendah,si banci si buat emekap gelah ibas kegeluhen enda maka orientasi/pusat kegeluhen kalak sitek labo terjeng guna ngayaki ras ndarami kai silit ibas doni enda saja ngenca si sifatna terbatas,tapi terdauhen asa sie eme gelah keluarganta (Bapa,Nande,Anak anak) banci jadi saksi Tuhan arah tutus bersekutu,erdiakonia ras ermarturia. Bujur perbahanenna,perkuah janah nggit melayani,la ia mbiar ngalaken tantangen,tapi kinitekenna tetap paguh dingen ernalem ia tetap man Tuhan. Emaka inget kalak lalap perbahanenna simehuli e,janah i hamati kalak ia ibas geluhna erkiteken kinitekenna si paguh ras perbahanenna siterpuji.
Pengkenaina
Keluarga si erdiakonia eme,kerina anggota keluarga erkemalangen man Tuhan alu nggit ia ndahiken dahin Tuhan,eme nggit nampati kalak si lemah,sisakit,melumbar ia mere man kalak si perlu man sampaten. Keluarga si erdiakonia eme keluarga si labo keperlunna saja ngenca i ukurina,tapi teridah keluarga e,peka ras mediate nandangi kalak silit ibas kepiceten. Keluarga si koinonia eme,ija nande tutus nembah Tuhan arah PA Moria,tutus kugereja,Perpulungen jabu jabu,bagepe ras perbulangen tutus atena PA mamre,PJJ ras kugereja,janah nggit ia ngiah ngiahi kalak si deban gelah berkat ersembah man Tuhan. Bagepe anak anakna permata,teridah ketutusenna ndahiken dahin perpulungen. Ermarturia,kerina keluarga muat bagin ibas dahi dahin kesaksian arah ketutusen Koor/Paduan suara memuji Tuhan alu bulat ukur,nggit ngiah ngiahi teman gelah tutus erkiniteken,janah adi lit pembangunen gereja muat bagi ia,asa ngasup ras gegeh silit ibas ia.Mejingkatka pe ia ndahiken dahin pembangunen gereja,uga maka mejile ras khikmat ibas ruangen gereja ,nggit ia ngukurken ras ndahikenca,rikut pe mperdiateken gedung gereja,ntah lit siman pekenan,mediate ia janah i usahakenna asa ngasup silit ibas ia.
Emaka mari ras ras si ajuk keluarganta gelah erkemalangen man Tuhan alu ncidahken ketutusen ndahiken dahin Tuhan,ncidahken kebujuren,kekelengen ras kinigenggengen ngelakoken si mehuli singena ate Dibata.Bageme tugasta selaku kalak sitek man Tuhan,asa bancina guna tetap njagai kemurnin kinitekenta,ernalemlah man Bana katawari paksa pe.
Pdt.Ediwati Ginting
0 komentar:
Post a Comment