Invocatio :
“Sipeduaken bali ras si ndai e me, Kelengilah temanndu manusia bagi
kam ngkelengi dirindu”. Matius 22:39.
Ogen : Keluaren 23:1-9; Khotbah : Mazmur 112:1-9
Tema : Malem Me Ate Kalak Si ndalanken Kekelengen
Kata Perlebe
Ibas mengawali tahun 2015, kita kerina tersengget mbegi berita kerna salah sada Pesawat eme Air Asia QZ 8501 enggo “bene”. Berita enda tentuna sangat menggemparkan seluruh media sosial. Seh pe dungna i temukan titik jatuh pesawat enda i selat Karimata. Kejadin enda tuhu-tuhu menyita perhatiannta kerina. Masyarakat Indonesia khususna turut berduka terlebih keluarga ras teman-teman si kehilangen ibas musibah enda.
Melalui kejadin enda, kai me ninta ? Ugange Penggejapenta? Apakah penumpang si i datas pesawat Air Asia QZ 8501 merupaken kalak si paling erdosa seh makana Tuhan mengizinken enda terjadi ? Entah pe Tuhannta mpediat umatna mate secara tragis ? Ntah uga ?
Pembahasen
Perpulungen sinikelengi Tuhan, Khotbahta wari enda ibas Kitab Mazmur. Kitab Mazmur merupaken kitab puji-pujin, si ibacaken sangana Wari Raya Yahudi i sinagoge.Adi sioge Pustaka Sibadia bahasa Indonesia ibas pembukaanna, lit sada pernyatan si cukup “janggal” ibas mengawali Mazmur pujin enda.
Eme kata:”takut”, ibas. Kata “takut” biasana lit hubungenna ras perasaan si tertekan, la tenang. Tapi, la bage pengertinna ibas perikop enda. “Takut ” berarti “erkemalangen ” ntahpe “mehamat”. Sekalak si erhadapen ras kuasa Dibata ras nggejapken Dibata lit i lebe-lebena pastilah “takut”, bahasa karo “erkemalangen”(Mehamat man Dibata) perbahan peristiwa e tentuna nggo mpeturah kininggitenna nggeluh alu payo i lebe-lebe Dibata ras tunduk man kuasa-Na. Enda me sebabna kalimat “takut akan Tuhan” i sejajarken pengertinna ras “patuh” (Ul 6:13) ras “erkeleng ate” (Ul 10;12), “erkiniteken” (Ul 10:20), nggeluh rikutken undang-undang-Na (Ul 8:6) ras ndalanken perentahNa (Ul 6:4). Kalak si erkiniteken ngasup ngataken bujur erkiteken ngidah perbahanen-Na si mbelin ras alu pusuh simetedeh nggit makeken geluhna guna Tuhan.
Selanjutna pemazmur nuriken konsekuensi tiap kalak si erkiniteken alu hal-hal si mpeturah kesenangen. Lit i kataken makana kalak si erkemalangen man Tuhan ras si patuh ngikutken kata Dibata pastilah ibere-Na erta sila erkeri-kerin. Pengertin erta enda, man pemamzmur labo hanya mengarah ku materi.
Hal enda rusur menimbulken pengertin si salah , lit ka pengertin maka kalak si nggeluh ibas kinibayaken erta, eme kalak si nggo ndatken pasu-pasu simbelin ibas Dibata nari. Situhuna pemazmur mpeseh pesan enda maka erta kebayaken si ialoken labo perbahan kinibeluhennta tapi perbahan perkuah ate Dibata ras e kerina pemere Dibata. Erta siterindah man kalak sierkemalangen man Tuhan eme anak kempuna pe ndatken pasu-pasuNa i doni (bdk. Ul 6:2), ndat kejuah-juahen ( bdk. Ul 6:3b), ndatken dalan terang ibas paksa gelap (bdk. Ul 6:4a), ukur si dem alu keleng ate (bdk. Ul 6:4b), kiniteken si tetap paguh (bdk. Ul 6:6a), pusuh si megegeh, dem alu kiniteken man Tuhan (bdk. Ul 6:7b).
Senina ras Turang, memang adina sibaca secara langsung sehkel senangna ras malem ate ngikutken dalin Tuhan.Tempa-tempa lanai sijumpai masalah ibas kegeluhenta. Tapina..uga dage kenyatanna ? Uga dage kegeluhen kalak sierkiniteken man Tuhan, nggo me langsung lanai lit masalah ibas kegeluhenna ?
Sangana pemazmur nuratken ntahpe ngogeken mazmur enda, tentu keberadanna labo ibas situasi kegeluhen si mewah ras melala ertana. Tapi sada hal si rusur i gejapken pemazmur makana saat ibas kegeluhen sisusah pe ngasup ia ndalanisa.. Pemazmur terus nggejapken ras ngenehen belinNa Kuasa Dibata ibas kerina paksa si terjadi ibas geluhna. Dingen alu dem kinitekenna igejabkenna maka Tuhan singaturkensa kegeluhen tiap jelma. Dibata tetap nemani kegeluhen anak-anak-Na, labo pernah kita i tadingkenna sedetikpe.
Labo jarang kita naksiken ntahpe mungkin ngelakoken sendiri ras menganggap Tuhan si ersalah ibas musibah si ihadapi kita. Lit kape si ngatakensa “ Tuhan la adil ? “Ngkai maka enda terjadi bangku Tuhan ?” , “Ibas kesusahenku i ja kam Tuhan ?”, “Uga makana aku la ibegiken-Ndu ?” ras melala denga kata-kata sipeseh man Tuhan sanga kita ibas perbeben. Adi siukuri alu mehuli, nggolah payo cara berpikir sibage...? STOP.. Ula nari lakoken cara berpikir sibage..
Mungkin ka pe i lain pihak, sanga lit idat teman musibah, alu spontan kita erkata:”Em akibatna adi la mbegiken katangku” ntah “Nggo reh rawa Tuhan guna nghukumsa” ras sidebanna. Bage kin siharus silakoken selaku kalak sierkiniteken man Tuhan ? Sanga lit perbeben geluh, kita langsung kote ras litka sinalahken Tuhan. Sikap sibagepe labo payo...
Perpulungen sinikelengi Tuhan, Tuhan labo pernah erjanji makana kegeluhen kalak si erkiniteken lanai ndatken perbeben ibas geluhna , tapina Tuhannta erjanji nemani kita seh ku akhir zaman . Kita seharusna ngelakoken kai si enggo i ajarken-Na, eme kekelengen. Alu bage, kemalemen ate situhu-tuhu sidatkenme ibas kegeluhennta.
Kalak sierkiniteken ibere-Na gegeh kengasupen ngalaken perbeben ngeluh singerim-rim kita, labo i pediat-Na kita sisada tapi Ia kap sekawalta. Ibas kinitekenta lit pengarapen si ijanjiken Tuhan. Mari ras-ras sigejapken, gundari saja enggo sibengketi tahun simbaru, tentuna enda pe sada bukti pengkawali Tuhan man banta. Ibas tahun-tahun silewat melala si hadapi kejadin-kejadin ,si tempa-tempa la kita ngasup ngalakenca tapi kerina banci silewati, enda pe bukti keleng ate Dibata man banta.
Pemazmur pe nuratken maka Tuhan erpihak man kalak si nggeluh erkemalangen man Tuhan. Tuhan pasti nampati kalak silit ibas kesusahen ras kebiaren. Jaminan pengkawalina pasti iberekenN man banta. Nggeluh erkemalangen man Tuhan eme ciri rohani kalak Kristen si ngasup tuhu-tuhu ngidah pasu-pasu Tuhan erdahin terus menerus ibas kegeluhenna. Alu bage maka kalak sierkiniteken ngasup ngatakan bujur ibas kerina dampar ibas kegeluhenna, erkiteken keleng ate Tuhan. Amin.
Dibata simasu-masu.
Pdt. Andreas Joseph Tarigan
0 komentar:
Post a Comment