Suplemen Bimbingen PJJ Tgl. 29 Maret - 04 April 2015, Ogen 1 Korinti 15:3-11

Ogen : 1 Korinti 15:3-11
Tema : Lias Ate Dibata Erdahin ibas aku
Tujun :

1. Gelah ngawan ni perpulungen meteh kerna kematen ras kekeken Yesus eme sura-sura Dibata engkelengi manusia
2. Keleng ate Dibata erbahanca perpulungen megegeh erdahin nehken singena ateNa

Ibas ogenta enda, 1Korinti 15:3-11, mulihi Paulus ningetken kerna sipentingna ibas berita simeriah enggo isehken man perpulungen Korinti, eme “Kristus enggo mate” labo erkiteken enggo she umurna (sabab umur Yesus paksa mate 33 tahun denga), bagepe labo erkiteken ia pinakiten, tapi erkiteken dosa-dosa manusia. Jenari ibas wari sipeteluken kenca enggo ikuburken ipekeke Dibata ibas simate nari. Pengajaren enda labo iban-ban ntah ikarang-karang tapi bageme faktana. Payo pengajaren e la gambang ncernasa terlebih adi e inen secara logika, emaka 2 kali isingetken Paulus kerna pengajaren e sue ras kesaksin Pustaka Si badia[1] (ayat 3-4).

Tole ibas menegasken pengajaren maka payo Yesus Kristus enggo keke ibas simate nari, Paulus ibas ayat 5-8 nehken maka labo sada ntah dua saksi ngenca kerna ketuhu-tuhun kekeken e, tapi mbue saksi, termasuk Paulus pe iatanken jadi salah sada saksi, amin gia si arah pudina.

Payo, ibas pustaka sibadia la ituriken ugas prosesna Yesus nggeluh mulihi, nantangi dagangen mentar si i balutken ku maitna, jenari nggulingken batu sinutupi babah kuburen e, si ituriken fakta maka kenca Yesus mate i kayu persilang ibas wari Jumat, jenari i kuburken i kuburen Yusuf Arematea, ibas wari peteluken eme wari Minggu nggeluh mulihi arah ncidahken dirina perlebe man Petrus jenari man nterem saksi. Enda me si perlu icikep. Enda me menurut Paulus sipentingna enggo ipesehna aman perpulungen Korinti.

Jenari, iatanken jadi salah sada saksi tuhu sada hal si la i duga Paulus terlebih nginget latarbelakangna selaku kalak siniksa perpulungen Dibata. Emaka nina Paulus: (1) “aku desken sekalak anak si pertubuhna la bagi kalak”, (2) “aku me rasul si meterukna”, (3) “la metunggung igelari rasul”. Ungkapen enda banci ikataken apologet[2] Paulus nandangi kalak simeraguken bobot berita si isehkenna. Sada sisi tuhu-tuhu isadari Paulus ise dirina, maka secara manusia la sitik pe ia metunggung jadi rasul, eme kalak si ipercayaken nehken berita simeriah. Emaka ibas ayat 10 ikataken, kerina e banci jadi bagepe Paulus bagi litna genduari pelin-pelin erkiteken lias ate Dibata. Emaka sisi sideban ituriken Paulus pe maka erkiteken penggejapen enda me jingkaten ia nehken berita simeriah asangken rasul sideban. Amin gia bage labo e erbahansa Paulus meganjang rukur sabab kejingkatenna e pe erdandanken lias ate Dibata e nge si erdahin ibas ia.

Arah apologet enda ate paulus segelah perpulungen Korinti lanai mempersoalken rasul siapai sinehken berita simeriah e, tapi bagi isingetken ibas ayat 11 uga maka perpulungen tetap ibas kiniteken si enggo iberitaken rasul-rasul e, eme kiniteken man Yesus Kristus si enggo mate dingen ibas wari sipeteluken enggo keke ibas simatenari guna keselamaten manusia.

Thema eme “Lias ate Dibata erdahin ibas aku”. Arah kata Dibata siniorati kita jelas maka erkiteken igejapken Paulus lias ate Dibata sierdahin ibas ia nge erbahansa:

1. Mejingkat erdahin nehken berita simeriah. Ibas sienda la iahan-ahanken Paulus waktu ras gegehna. Ibas ayat 10 ikataken jingkaten ia asangken rasul-rasul sideban.
2. La meganjang rukur. Amin gia Paulus simanteki perpulungen Korinti, la e erbahansa Paulus rate-ate nandangi perpulungen enda, sebalikna desken bapa nandangi anak-anakna tetap ikelengina alu nehken pedah-pedah arah suratna. Pembelan siisehken Paulus semata-mata segelah perpulungen tetap megegeh ibas kiniteken si enggo isuankenna ndube.
3. Jenari sipenting man Paulus labo ise kalakna si nehken Berita Si Meriah e, ia ntah rasul sideban. Ise pe seri nge, sabab si iberitaken e eme Kristus Yesus enggo mate erkiteken dosa manusia, ras ibas wari sipeteluken enggo ipekeke Dibata Ia ibas simate nari. Menurut Paulus berita enda me sipentingna enggo isehkenna man perpulungen (bd. Ayat 12-14), janah perpulungen iselamatken adi tetap icikepna isi Berita Si Meriah si enggo iberitaken Paulus e (ayat 2).

Uga kita? Mari ergiah-giah kita naksiken arah kerina dampar kegeluhenta maka payo kita kalak si enggo ngaloken perkuah ate Dibata ibas kematen ras kekeken Tuhan Yesus, eme arah keteladanenta selaku Mamre, Moria ibas ngikuti kerina kegiaten gereja, kerajinen ras kebujurenta ibas kita erdahin, keramahen ras keleng ateta nandangi kerina jelma, bagepe ibas kebadian geluhta, rsd.

Pdt. S. Brahmana

Diskusi (Bagi sienggo iban ibas Bimbingen Pjj GBKP)

1. Kai nge latar belangmaka perlu iakap rasul Paulus mpegegehi tole kiniteken perpulungen i Korinti? Turikenlah!
2. Rasul Paulus, sekalak rasul si berlatarbelakang kegeluhenna "merasa benar nandangi Torat, munihi kalak si tek man Kristus" tapi ngasup nggejapken lias ate Dibata bas kegeluhenna dingen isaksiken pe kerna si enda. Man banta kerina, turikenlah lias ate Dibata si gejapken kita bas geluhta?

---

[1] Yesaya 53:5-12; Mazmur 16:8-10, Matius 12:40, Perbahanen Rasul 2:24-32

[2] Ibas bahasa inggris : Apologetic. Asalna ibas cakap Yunani à Apologia = Pembelaan = Apologeoma (Apo = dari pada; logos : kata; bahasa Apologeomai = berbicara dari pada (diri sendiri) atau membela diri).

Artikel lain yang terkait: