Suplemen Bimbingen PJJ Tanggal 12-18 April 2015, Ogen 1 Samuel 2:22-26

Ogen  : 1 Samuel 2:22-26

Tema : “Ula Jadi Cakap”

Tujun:

1. Gelah ngawan ni perpulungen ngeteh kinigutulen anak-anak Imam Eli.
2. Gelah ngawan ni perpulungen meteh pentingna pendidiken “Moralitas” ras “Spiritualitas” man anak

Manusia iciptaken Dibata sue ras tempasNa. Janah manusia ibereken tanggungjawab guna ngkuasai kerina tinepa Dibata.  Ertina maka kerina tinepa Dibata eme iteruh kendali manusia berdasarken ketetapen Dibata. Janah adi sinen enda me si langasup manusia ndalankensa. Manusia lebih mperdiateken kepentingen dirina. Akibatna manusia nggelanggar kai perentah Dibata.

Bahan PJJnta sekali enda ncidahkenn man banta uga contoh kegeluhen manusia si la ngasup nggeluh benar ras setia iadepen Dibata. Enda kerna anak-anak Imam Eli.  Tupung sie ikataken maka Eli pe enggo metua umurna. Ibas kinituanna tentu ia pe enggom kurang gegehna. Ibegi Eli rusur kalak ercakap kerna kejahaten anak-anakna enda. 

Ibas 1 Samuel 2:12-17, 22 nuriken uga perbahanen-perbahanen anak-anak Eli. Anak-anak Imam Eli, Hopni ras Pinehas selaku anak imam, bagepe jadi imam(keturunan Lewi), la ngasup  nggeluh jadi usihen man kalak Israel. Sekalak imam (keturunen imam) seharusna nggeluh badia, perbahan kaum imam memang i khususken Dibata guna ngelai i rumah pertoton. Imam ertanggungjawab guna ngajari kalak Israel kerna kata Dibata. Janah imam merupaken jabaten si ni aloken secara turun temurun. Maka ituriken ibas Imamat 21 ras 22:1-6, jelas ituriken syarat-syarat jadi sekalak imam. Sekalak imam eme jadi perantara Dibata ras bangsaNa.

Tapi siterjadi ibas kegeluhen anak-anak Eli malah sebalikna, kalak enda duana labo peduli nangdangi tugasNa selaku imam. Teridah maka Hopni ras Pinehas alu sengaja ngelawan perentah TUHAN. Hopni ras Pinehas pe ngelakoken perbahanen-perbahenen kekerasen man kalak Israel si mereken persembahen ku rumah pertoton. Adi la ibereken man bana kai si ipindona, maka ibuatna secara paksa. Hopni ras Pinehas terfokus man dirina saja ngenca. Pusuhna idemi alu kinilapuasen nangdangi geluhna. Maka kalak enda duana pe muat korban persembahen si ni aturna ibereken man TUHAN. Hopni ras Pinehas la ngasup mengendaliken sura-sura dagingna.  Teridah maka labo ia ndalanken tugas ras tanggungjawabna alu benar. Hopni ras Pinehas menggunaken jabaten ras dahinna selaku imam guna ndatken keuntungen man dirina sendiri. Kesempaten ras kuasa si lit ibas ia ipergunakenna guna kerangapen ibas pangan bagepe guna kejahaten seksual. Ija kalak enda duana pe ngelakoken perzinahen ras pelayan-pelayan diberu i rumah pertoton. Sitik kel pe lanai iergakenna Dibata. Duana anak Eli enda arah kegeluhenna ncurnaken gelar Dibata. Banci ikataken maka kegeluhenna duana sitik kel pe lanai ermoral (hidup dalam kemerosotan moral). Maka ikataken ibas 1 Samuel 2:12 “anak-anak Eli tuhu-tuhu si  kemali. Sitik pe la diatena TUHAN”. Banci ikataken kalak enda serakah ras la berintegritas. Hidup dalam dekadensi moral.[1]

Eli mpersingeti anak-anakna (ayat 24), gelah olanai min iteruskenna erbahan kejahaten-kejahaten. Tapi teridah  maka anak-anak Eli enda labo nggit megiken bapana.

Adi si siksiki terdauhen maka situhuna ibas Eli ngajarken anak-anakna labo ilakokenna alu mereken tindaken si tegas (dinasehati tapi tidak ditindak tegas dalam kesalahannya). Teridah ibas ayat 29 maka amin ipersingeti Eli anakna duana tapi ipehagana nge duana anakna lebihen asa TUHAN. erkiteken sie me maka pada akhirnya keluarga Eli ndatken ukumen ibas Dibata nari.

Adi si perdiateken kegeluhen manusia si genduari enda, maka kai siterjadi ibas keluarga imam Eli enda melala kel nge si idah terjadi itengah-tengah masyarakat. Nterem jelma ngelakoken kejahaten-kejahaten. Nterem jelma lanai ncidahken dirina selaku tinepa Dibata si mulia ras mehaga. Nterem kel jelma nggeluh ibas kinirangapen, bahken guna nehi sura-surana segala cara dan tindaken ilakoken. Lanai sitik kel  pe mbiar man Dibata. Erta doni, kekuasaan enggo jadi tujun nggeluh nterem jelma. Bahken lanai kita heran nterem ka kel jelma genduari ngelakoken perzinahen, lanai ngukurken kebadian kulana ras pinakit-pinakit si banci saja nghancurken masa depan geluhna.

Penyalahgunan kuasa ras wewenang guna kesenangen diri ntah pe kelompokna. Enda itandai alu litna kasus-kasus korupsi si ni idah kita.  Janah berita si enda enggom si idah terjadi iberbagai tempat.

Kemerosoten moral terjadi i seluruh lapisen masyarakat. Setiap wari media massa nuriken kejahaten si terjadi baik i rumah tangga, sekolah, institusi-institusi pmerintahen ras swasta, rumah sakit, rsd. Penipuan, pembunuhen,  tindaken Korupsi, kolusi ras nepotisme, perjudian, perzinahen, perdagangen manusia, perceraian, perampokan (pembegalan yang sedang marak terjadi), pembalakan hutan, pemakaian narkoba, pemalsuan makanan ras minuman (penggunaan zat-zat kimia yang berbahaya). Sifat materialisme si merambah ku pusuh manusia tanpa mengenal umur ras pendahin.  Tentu enda kerina jadi tantangen si mberat man banta khususna warga gereja, ija hampir saja kerina masyarakat menyalahgunaken wewenang ras kesempaten (peluang) si lit ibas ia. Kinilangasupen mengendaliken sura-sura daging si erlandasken kesenangen semata (hedonisme), ija kenikmaten  materi jadi tujun nggeluh si utama man manusia. Penawaren-penawaren doni si erbahanca nterem jelma lupa diri. Sura-sura si berlebihen si erbahansa dirina jadi pusat segalanya ibas geluhna, janah mabai ia lanai mbiar man Dibata.

Kai si terjadi itengah-tengah masyarakat enda tentu ipengaruhi oleh karakter setiap pribadi, imulai itengah-tengah jabuna nari. Emaka penting kel nandai Dibata (erkemalangen man Dibata) sebagai dasar kegeluhen kalak si erkiniteken. Erkemalangen man Dibata njadikan manusia erjuang guna ndauh ibas perbahanen-perbahanen si jahat nari. Pembentuken karakter “takut akan Tuhan” itengah-tengah keluarga khususna man anak tentu mbelin kal pengaruh arah didiken orangtua nari. Didiken ras arahen orangtua guna anak-anakna segelah nandai Dibata enggo jelas kel isuruh man bangsa Israel ibas Ulangen 6:5-9. Keluarga merupaken sumber pendidiken si utama, perbahan kerina pemeteh ras kecerdasen manusia pertama-tama idatkenna ibas lingkungen keluargana. Orangtua eme guru sipertama ras terutama man anak-anaknna gelah anak itengah jabu beluh (pentar) ibas mbedaken si benar ras si salah. Alu bage setiap orangtua arus  njadiken kata Dibata sebage dasar kegeluhen keluarga. Si erbahansa setiap anggota keluarga nggeluh benar sue ras tugas ras tanggungjawabna sebage anggota ibas jabu (bnd. Kol.3:18-23).

Tema-nta bas wari si sendah “ula jadi cakap”. Enda tentu ngajuk kita selaku anak-anak Dibata gelah njagai geluhta gelah ola jadi “cakap” (jadi bahan pembicaraan karena perilaku yang negatif). Tentu sebage keluarga si erkiniteken man Tuhan kerina anggota jabu arus nge njagai dirina. Terlebih pe orangtua, selaku imam itengah jabu, arus mendorong kerina anggota jabu gelah nggeluh ibas kebenaren ras keadilen. Orangtua labo perlu mbiar guna ngukum anak-anakna adi anak itengah jabu erbahan dosa, kejahaten ras pelanggaren, ija e ilakukan alu kekelengen ras bersifat mendidik ntah pe guna mbangun anak-anakna (Kuan. 23:13).

Orangtua berperan guna ngelawan tawaren-tawaren dunia si banci ngerintak anak-anakna si erbahansa ndauh ras Dibata. Orangtua arus mperdiateken anak, mengamati tingkah laku anak. Orangtua arus mengawasi perkembangen anak gelah ola nggelanggar peraturan jabu bagepe lingkungen, terlebih ula sempat ndauh ibas Dibata nari. Perbahan salah sada penyebab anak ndabuh kubas perbahanen-perbahanen si jahat (kemerosotan moral) eme kurangna peranen ras perhatin orangtua. Selaku orangtua la cukup, mpebelin, memelihara ras mereken kebutuhen-kebutuhen jasmani anak tapi pe mereken dasar si kuat ibas kiniteken (spiritualna).

Alu bage ngajari ras ndidik anak mbiar man Dibata perlu ilakoken sanga anak e kitik denga/bahkan ketika masih dalam kandungan (Kuan.19:18). Ula timai anak galang/dewasa maka i pedahi.(Ula timai bagi Eli, ia enggo metua mereken nasehat man anak-anakna). Orangtua ertanggungjawab nangdangi kegeluhen anak-anakna  (bnd. Kel. 3:18-25, Ep. 5:22; 6:1-9).  Orangtua arus harus menjadi contoh ras teladan si mehuli man anak-anak sekaligus mampu jadi guru.    Ibas ndidik moral ras spiritual anak orangtua jadi contoh ras teladan tentu lebih besar pengaruhna asangken nasehat-nasehat  si melala. "Teladan yang baik adalah lebih berharga daripada seribu nasehat-nasehat”. Orangtua arus membentuk karakter/moral anakna ibas cara rukur ras perbahanen.[2]

Keluarga merupaken ingan si paling strategis guna ngajarken, mbentuk ras memelihara nilai-nilai moral si mehuli.  Emaka ibas keluarga aruslah itanamken kepripadian si jujur ras banci ipercaya terutama man anak. Perlunya pengakun adi sekalak anak ngelakoken kesalahen.[3]

Alu bage arah Pjjnta enda iajarken man banta gelah selaku anak-anak Dibata kerina kita ngasup njagai dirinta, integritasta gelah ula jadi cakap erkiteken pengerana ras perbahanenta si la mehuli. Bagepe man orangtua gelah tetap njagai ras mperdiateken pendidiken moral ras spiritual anak-anak itengah jabu. Labo bias anak-anak erlajar kerna kata Dibata ibas sekolah Minggu (KAKR) bagepe i sekolahna secara akademis.

Tanemkenlah ibas pribadi anak gelah erkemalangen man Dibata maka dat kepentaren ia guna ngelakoken bagi singena ate Dibata (Kuan.2:9-11).

Alu bage marilah kita kerina si perdiateken lagu langkahta. Mari si pergermerken kai singena ate Tuhan guna si dalanken. (Ep. 5:15-17).

Diskusi:

1. La erngadi-ngadi ibegi Eli kerna perbahanen jahat anak-anakna janah enggo ipersingeti Eli kerna kai si ibahan anak-anakna selaku imam i rumah pertoton. Kuga pendapatndu kerna “karakter” anak-anak Eli enda? (Bandingken dahinna selaku imam). Turikenlah!
2. Tep-tep masa kegeluhen ana-anak penting emaka enggo arusna orangtua metenget uga peran ras si arus ibahanna. Bagiken pengalamenndu ibas pendampingen masa-masa penting anak-anakndu ibas jabu sekalak-sekalak!

Pdt. Nopritawati Br Sembiring Kembaren. S.Th

GBKP Perpulungen Banjarmasin.

--------------------------------------------

[1] Moral diartikan ajaran tentang yang baik dan buruk perbuatan dan kelakuan. Dekadensi moral: kemerosotan moral, kondisi moral yang merosot. Yang biasanya diakibatkan oleh ketidakpedulian terhadap peraturan atau hukum yang berlaku.

[2] .  Hal inilah yang terjadi pada anak-anak Eli. Meskipun Eli menasehatkan anak-anaknya tetapi ia tidak pernah dengan sungguh-sungguh memperhatikannya. Kemungkinan juga karena kesibukan Eli dalam melayani sehingga anak-anaknya terjatuh dalam nafsu duniawi yang akhirnya tidak  dapat dihentikan lagi oleh Eli.

[3] Seorang anak yang mengakui dengan jujur bahwa dialah yang memecahkan keramik kesayangan ibu mendapat tamparan dari sang ibu, mendapat amarah dan cercaan dari sang ibu yang tentunya sangat menyakitkakn bagi sang anak. Pengakuan ini memberikan kesan dalam dirinya bahwa kejujuran itu mengakibatkan penderitaan sehingga tidak lagi menghargai kejujuran itu malah sebaliknya akan mengembangkan kebohongan sebagai alat menghindarkan hukuman. Kalau ini berlangsung berulang dalam keluarga maka nilai kejujuran menjadi hilang dan kejujuran itu hanya tinggal kata-kata kosong yang tidak bermakna.

Artikel lain yang terkait: