Khotbah - Renungan Kebaktian Minggu Tgl. 7 Juni 2020, Kejadian 1:26-31

KHOTBAH MINGGU, 07 JUNI 2020

Minggu Trinitatis: Dibata Si telu Sada

 

Invocatio:

bali ras terang si ersinalsal man bangsa si deban, gelah reh ndahi Kam e me terang si mereken kemulian man bangsaNdu Israe (Lukas 2:32) 

Ogen: Yohanes 1:29-34

Khotbah: Kejadian 1:26-31 

Thema: Tinepa Dibata Tuhu-tuhu Mehuli

 

Mejuah-juah man banta kerina, shalam, salam Sehat Tuhan yesus simasu-masu kita kerina.

Perpulungen sinikelengi Tuhan, Kitab kejadin ibenaken nehken kesaksin maka doni enda labo jadi-jadi bage, bagi pe kerina si nggeluh I bas doni enda khususna labo jadi erkiteken evolusi, tapi Dibata Si Telu Sada e si njadikenca. Ise Dibata Sitelu Sada e? Ia me Dibata Yahwe, Dibata Si Sada (Allah kita Esa: Ulangen 6:4). Ikataken Telu Sada eme erkiteken Dibata Yahwe e eme ibas njadiken sinasa lit ncidahken Si Sada e ibas telu peran penting eme selaku Bapa, Anak ras Kesah Sibadia. Adi rumusen si iban pengakun kiniteken Calsedon maka Bapa, Anak ras Kesah Sibadia e eme sehakekat.

Situhuna ibas Alkitab labo lit secara langsung istilah Dibata Sitelu Sada, tapi muncul istilah enda erkiteken kinata si isaksiken ibas Pustaka Sibadia e, salah sada bagi ituriken ibas perikop khotbah ibas Minggu enda, khususna ayat 26 “Nina Dibata, "Genduari Sijadikenlah manusia si sentudu ras tempasTa, si menam seri ras Kita …” Ras ise nge Dibata ercakap? Tentuna bas diriNa Si Telu Sada e. Kerna si e banci pe si nen ibas Yohanes 1:1, 14:11, 26, rsd.

Sue ras Thema Minggu enda “Tinepa Dibata tuhu-tuhu mehuli”, mulihi kita ipersingeti maka doni inganta tading enda itepa Dibata ndube alu predikat “tuhu-tuhu mehuli”. Tuhu-tuhu mehuli ertina sempurna la nai lit ije kekurangen. Kegeluhen kerina tinepana banci nggeluh alu mehuli, kai pe lanai lit sikurang. Janah ula lupa maka man manusia (dilaki ras diberu) si ijadiken Dibata sentudu ras tempasNa, si menam seri ras Dibata Sitelu sada e ibas ayat 26,  lit melekat tugas eme ngkuasai kerina nurung, perik-perik, bagepe kerina asuh-asuhen ras rubia-rubia simeliar, subuk sigalang ras si kitik. Bahken tugas enda la saja iulihi ibas ayat 28 kenca ipasu-pasu Dibata manusia si ijadikenna e, tapi lit tambahen tugas eme ertuah bayak jadi enterem ras naluken doni enda. Berarti tugas enda penting, janah tugas enda manusia ngenca ngasup ngelakokenca.  Alu kata sideban manusia selaku tinepa Dibata semenam seri ras Dibata e ibas penciptanna enggo melekat tugas si isingetken ndai ibas dirina. 

Saja kata “taluken doni enda” mekatep isalah tafsirken seolah kata e jadi legitimasi man manusia rate-rate nandangi doni enda. Lang, sabab ibas Kejadin 2:15 ije isingetken gelah manusia ngusahai ras njagai. Berarti kata taluken doni enda banci ibas pengertin (1) ngaturken doni enda gelah tetap ibas kecibalna simehuli ras ratur, bagepe gelah reh sikapna jadi ingan manusia ras rubia-rubia sideban nerusi kegeluhenna, labo sebalikna erbahan kekacauan ntah rontang; (2) gelah ula sebalikna doni enda enggo naluken manusia.

Tapi kinatana siidah erkiteken kinirangapen manusia ibas mengeksploitasi doni enda enggo jadi rontang, jadi gersang, ceda she maka akibatna arusna la terjadi banjir enda enggo bajir, arusna la mokop enda enggo mokup kal. Jenari lit deba manusia enggo nembah ciptan Dibata e, deba enggo ikendaliken kebayaken doni enda she maka la nai ia mehamat man Dibata si jadiken ia, la nai jadi perhatinna kerna kegeluhen si rasa-lalap, padahal uga gia senangna I doni enda ibas paksana la banci lang sitadingken nge, sabab enggo lit batasna umur manusia.

Alu bage dage, arah kata Dibata siman oratenta Minggu enda mpersingeti kita mulihi:

1.    Doni si enggo itepa Dibata alu predikat tuhu-tuhu mehuli, maka jadi tugasta selaku manusia gelah pekena-kena doni enda gelah tetap ibas kecibalna si mehuli e. Sabab adi doni enda tetap mehuli maka mahan bana kerina si enggeluh ije termasuk manusia nggeluh ka alu mehuli, sikap, dame ras senang, tapi sebalikna jadi malapetaka man manusia. Enda me si mekatep terjadi ibas kegeluhen manusia: longsor, banjir, kekeringen, rsd, erkiteken la njaga doni enda alu payo. Kai banci siban? Paling tidak sitotoken gelah kerina manusia I ja pa pe ia ringan sadar tugasna pekena-kena doni enda, jenari inganta tading si pesikap, baik kebersihenna, bagepe keindahenna alu nuan kai sibanci isuan.

2.    Ise pe kita, uga gia keadanta, ingetlah maka kita eme pribadi si meherga I mata Dibata, sebab kita I ciptaken labo asal iciptaken tapi iciptaken arah sada proses si terencana ras matang, enda icidahken uga Dibata Si Telu Sada e teridah arih-arih. Emaka ula kal pernah siturunken harga dirita erkiteken sesuatu si lit idoni enda, bagepe tetaplah bersyukur kerna keadanta ntah sekali uga gia si jadi, sabab labo kebetulen kita lit uga litna kita genduari e.

Dibata simasu-masu kita kerina. Amin.

Artikel lain yang terkait: