Khotbah - Renungan Kebaktian Minggu, 23 Agustus 2020, 2 Samuel 9:1-13

KHOTBAH MINGGU 23 AGUSTUS 2020

Minggu XI Kenca Trinitatis/Minggu Mamre

 

Invocatio:

Ietehndu kai si ibahan kami man bandu sekalak-sekalak bali ras perbahanen sekalak bapa nandangi anak-anakna (! Tesalonika 2:11)

Ogen: 1 Johanes 3:1-3; Khotbah: 2 Samuel 9:1-13 

Thema: BAPA SI SETIA RAS ERKELENG ATE

 

Perpulungen sinikelengi Tuhan, erbahan simehuli man kalak si mehuli biasa, engkelengi kalak si erbahan mehuli man banta e pe biasa, si la biasa eme kalak si membalas air tuba alu air susu. Membalas kejahaten alu kiniulin. Enda me si icidahken Daud man sinursur Saul. Ibas pustaka sibadia ituriken uga Daud enggo nampati raja saul ras kerina bangsa Israel ibas ia enggo naluken Golit, sabab paksa e sada pe lapang kalak Israel ngelawan Goliat kecuali Daud. Tapi kai si ibahan Saul, erkiteken cian ate ras iakapna Daud saingen iusahakenna munuh Daud.

Tapi kalak si tetap ernalem man Dibata teridah ibas la nggit membalas kejahaten alu kejahaten, tapi tetap mehuli perbahanen, 3 kali lit kesempaten Daud munuh Saul tapi la nggit Daud ngelakokenca. Bagem kepe kalak si erdalin ibas dalin Tuhan. Janah man kalak si bage iban Tuhan pe usur lit dalanna guna mulahi Daud. Upaya munuh Daud si pemena I gagalken Mihal anak Saul sendiri si jadi nderaha Daud (1 Samuel 19), bapepe konspirasi munuh Daud si peduaken I gagalken Jonatan anak Saul ka (1 Samuel 20). Bagem pengasuhi Dibata Daud she maka ia jadi raja.

Simenarik eme kenca Daud jadi raja, ia la bali ras kebiasan raja secara umum eme engkernepken kerina imbang-imbangna, baik secara langsung bagepe la langsung, sabab mbiar ia jadi ancamen ku pudi wari. Daud sebalikna, isulu-suluina ntah pe idaramina ntah lit denga sinursur raja saul si la ikut terbunuh ibas peperangen e. Kedungenna arah sekalak pelayan saul gelarna Siba mereken informasi maka lit denga sekalak sinursur raja Saul eme anak Jonathan si tergelar Mepiboset. Mis idilo Daud ras ipehagana pe alu kedekah geluhna bali iban Daud ras sekalak anak raja. Tambah si e pe kerina taneh sekerajangen Saul iulihken Daud man Mepiboset, rikut Siba ras anggota keluargana jadi suruh-suruhen Mepiboset.

Perpulungen sinikelengi Tuhan, kai nge banci sijadiken pelajaren arah kata Dibata enda?

Arah kata Dibata enda, mpersingeti kita (1) Ula mbir erbahan simehuli, bagepe ngkapiti kalak si benar, amin gia banci saja la seri agamata, sukuta, pilihen politikta, rsd, bagi Jonathan anak Saul, pang ia berlawanen ras bapana. Ikapitina Daud sabab tehna daud la salah. Arah kata Dibata enda ncidahken maka perbahanen si mehuli e ngarak-ngarak kita bagepe sinursurta. Payo bagi isingetken ibas pustaka sibadia “kai si isuan e ka nge iperani”. Amin gia Mepiboset cempang, adi secara umum lanai lit ergana tapi kiniulin bapana Jonathan maler pasu-pasu Dibata man anakna Mepiboset arah Daud. Ibahan daud ia desken anak raja.

(2) Kalak si rembak ras Dibata ngasup tetap ngelakoken simehuli singena ate Dibata apakah paksa musil ntah ibas kiniseran ntah pe kenca jadi sierkuasa. Endame si icidahken Daud ibas geluhna. Kerembakenna ras Dibata e mahansa ngasup ia nggejabken penampat ras perkuah ate Dibata, penggejapen enda me pengasup ia ngataken bujur ras nggeluh setia man Dibata, teridah arah ia ngasup memposisiken dirina selaku bapa si setia ras erkeleng ate man Mepiboset anak Yonatan bagi ndube pernah Daud erjanji man Jonatan lako ngkelengi sinursurna. Tentuna kita pe kerina bage, perkuah ate Dibata si enggo sialoken eme keselamaten ibas Yesus Kristus erbahansa kita ngasup nggeluhken geluhta desken bapa si setia ras erkeleng ate man kerina jelma terlebih man jabunta. Amin.

 

Tiban, 23 Agustus 2020

Pdt. Sabar S. Brahmana

Artikel lain yang terkait: