Khotbah - Renungan Kebaktian Minggu Tgl. 6 September 2020, Yohanes 2:1-12

KHOTBAH MINGGU, 6 SEPTEMBER 2020

Minggu XIII Kenca Trinitatis/Minggu Budaya II

 

Invocatio:

Dage sirayakenlah pestanta, labo alu roti si lit i je ragi si ndekah -- ragi dosa dingen kejahaten -- tapi alu roti si la itama ragi, alu biak si bersih dingen benar (! Korinti 5:8)

Ogen: Job/Ayub 42:7-11; Khotbah: Johanes 2:1-12

Tema:

YESUS NGELAYASI ADAT

 

Perpulungen sinikelengi Tuhan, manusia eme mahluk social, ertina ia nggeluh ersosial ntah pe ermasyarakat. Emaka tantangna lit manusia enggo nggeluh berintraksi sada ras sidebanna, Hawa ijadiken Dibata gelah Adam la kesepian. Manusia si ersosial e erbahan kelompok ntah pe nggeluh erkelompok, baik kelompok kitik she galang. Bangsa Indonesia saja mbue kelompok suku si lain bahasana ras tentuna pe kesemalen-kesemalenna si ikataken budaya ntah adatna, amin gia deba la tertulis tapi kesemalen e jadi aturen nggeluh itengah-tengah masyarakat. Bage ka me pe kalak Karo. Adi sigar-gari terdauhen kerna kesemalen e ibas kalak karo mbue ka erbagena, sipasti mulai tubuh she mate lit adatna. Tentu bage kange bangsa sideban, katakenlah kalak Yahudi. Mulai tubuh she mate pe lit ka nge adatna. Yesus Kristus si tubuh itengah-tengah kalak Yahudi tentuna pe ngikuti adat e, misalna umur 8 wari Ia isunatken janah ibaba ku rumah pertoton, umur 40 wari ibaba ka Yesus ku Rumah Pertoton sabab sue Hukum Taurat kenca 40 wari sekalak pernanden melahirken anak dilaki, wajib pernanden e mpersembahken korban ku rumah pertoton guna pembersihen diri, rsd. Bagem pe bagin kata Dibata siman oratenta sendah, ija Yesus hadir ibas sada kerja erdemu bayu, adi siuri kai sinilakoken Maria nande Yesus maka banci isimpulken keluarga Yusuf ntah pe orang tua Yesus deher denga perkade-kadenna ras simada kerja, adi ibas kalak karo kemungkinen besar Keluarga Yusuf e eme anak beru ibas kerja e.

Sue ras Minggu enda eme Minggu budaya, janah temata eme Yesus ngelayasi adat, maka bagin kata Dibata Yohanes 2:1-12 banci sipahami labo saja terjeng kesaksian maka Yesus erkuasa nalihken lau jadi anggur eme mujizat sipemena. Tapi bagin kata Dibata enda pe ngingetken kita maka kerehen Yesus ku doni enda selaku Mesias labo persilahang adat. Kerehen Yesus labo meneken adat, sabab adi e kin ndai salah sada misiNa tentu labo Ia reh ku pesta adat erdemu bayu, oke banci ninta Ia reh erkiteken malang man Yusuf ras Maria selaku orang tuana si erkade-kade denga ras si mpu kerja e. Tapi terdauhen si nin uga kehadiren Yesus ibas pesta e, ternyata labo saja Ia sekedar hadir tapi ikut berperan nampati si si mada kerja paksa kekurangen lau anggur she maka simada kerja la kemalun. Enda ertina kehadiren Yesus ku doni enda MABA KINIULIN LABO SEBALIKNA, alu bage kai si enggo mehuli ula sicedaken, adi lit si kurang payo ilayasi. Tentuna adi e erkawiten ras ncurnai Dibata pastilah arus I tadingken bahken adi lanai banci ipekena I kernepken. Sabab jelas kal baleng-balengna I bas pustaka sibadia kerna si e, umpamana adat si mengkorbanken manusia, adat nembah berhala, rsd, tentulah si e arus pengadi, adi lenga terpengadi minimal ula kita ikut-ikuten ibas adat sibage.

Perpulungen sinikelengi Tuhan,

Selaku kita enggo kalak Kristen tentu lit kebiasaan siarusna si rawat ntah pe sipekena-kena ras ilestariken. Kai e? Arah Invocatiota, 1 Korinti 5:8 eme gelah kita Nggeluh bersih ras benar; Arah pengogen, Job 42:7-11 eme gelah kita Saling mendoaken ras sialem-alemen salah. Janah arah khotbah, Yohanes 2:1-12 eme gelah ibas ngikuti adat ntah kehadirenta ibas sada kerja adat labo ngerontangi tapi ngelayasi adi lit kin siman layasen. Eme sinilakoken Yesus. Kehadiren Yesus ibas kerja adat perjabun e tuhu mereken dampak luar biasa khususna nandangi simada kerja ija arusna kemalun, tapi kehadiren Yesus erbahansa sebalikna simada kerja e ipujiken, bahken she asa genduari iinget kalak peristiwa e, adi wisata rohani kita ku Israel pasti singgah ras minem anggur ibas ingan e. Enda pe ngingetken kita kerina selaku kalak Kristen ntah pe pengikut Yesus kristus eme:

1)  Adat si lit itengah-tengah kegeluhenta baik ibas kita kalak karo ntah pe suku sideban arusna siergai bahken adatta e silestariken sepenjang e la bertentangen ras kinitekenta sabab adat e sada tatanen nggeluh sitentuna ertujun mehuli eme ngerakut kiniersadan, siergan ras pe kiniraturen nggeluh, terlebih ncidahken keleng ate.

2) Bagi kehadiren Yesus, kehadirenta pe arusna ngelayasi ertina pehuliken labo sebalikna. Ingetlah usur kuan-kuan enda “adi la beluh pehuliken ntah ngelayasi ula ka kita ngerontangi”;

Kai pe silakoken, khususna adi erbahan kerja adat, baik kerja kitik ntah galang undanglah Yesus, bahanlah Ia hadir ije janah siban jadi persukutenta, tek kita maka kerina nge pasti erlayas jadina. Amin.

Tiban, 6 September 2020

Pdt. Sabar S. Brahmana

Artikel lain yang terkait: