KHOTBAH MINGGU TGL. 20 SEPTEMBER 2020
MINGGU KERJA RANI GBKP TIBAN-BATAM
Invocatio :
Ibahan Nuah sada batar-batar ingan
persembahen man TUHAN . Ibuatna sada ibas tep-tep erbage rubia-rubia ras
perik-perik si la pantangen rikutken aturen agama. Kenca bage itutungna
bulat-bulat i datas batar-batar ndai, jadi persembahen.
Ogen : Roma 12:1-2; Khotbah : BILANGEN 15:17-21
Tema :
PERSEMBAHEN KHUSUS MAN TUHAN
Mejuah-juah man banta kerina, shalom, salam sehat, Tuhan Yesus simasu-masu kita kerina.
Perpulungen sinikelengi Tuhan, ibas pustaka si Badia, khususna Padan si ndekah icidahken maka kegeluhen tokoh-tokoh si lit, bage pe bangsa Israel selket kal ras kegeluhen sinehken persembahen man Dibata. Kain ras Abel nehken persembahen man Dibata arah ulih pendahinna, Nuah ibas invocatiota ituriken bage kenca ia ndarat I bas perahu nari perlebe si ilakokenna eme erbahan batar-batar ingan nehken persembahen man Dibata. Janah adi sigar-gari terdauhen tokoh-tokoh e ras pe bangsa Israel aminna gia padit nehken persembahen man Dibata ternyata labo e erbahansa ia reh musilna malah sebalikna reh simparna pasu-pasu Dibata.
Nehken persembahen banci pe ikataken bukti kepatuhen man Dibata bagepe pengakun maka baik kegeluhen, kejuah-juahen, ras kerina si lit e terlebih keselamaten rehna ntah pe ialoken iba Dibata nari.
Bagem maka ibas gereja pe kerna nehken persembahen jadi sada hal sipenting. Adi ndube, ibas tahun 2005 ku teruh lit denga persembahen sehna berita si meriah, persembahen Minggu zending, ras sidebanna, termasuk kerja rani, si la lit ibas paksa e eme persepuluhen. Genduari persembahen si lit I bas GBKP eme kolekte ibas kerina kebaktin ras PA, persembahen pengataken bujur, persepuluhen ras kerja rani. Kerna Kerja rani tetap denga ilakoken erkiteken isamping alasen teologis tapi pe alasen konteks warga GBKP si mbue denga pendahinna erjuma.
Ngerana kerna persembahen khusus man Tuhan sue ras temata, maka sue ras ertina “khusus” e berarti la umum. Adi bage banci iertiken persembahen e secara khusus ilakoken, tambah si e ka arusna si isehken e pe khusus ka baik secara kuantitas bagepe kualitasna alu kata si deban si terbaik.
Hal enda me si iperintahken Dibata man kalak Israel ibas bagin kata Dibata si jadi nats khotbah. Lenga pe ndube bangsa Israel enda she ras ndatken taneh I taneh Kanan si ipadanken Dibata iberekenna man kalak Israel, perintah nehken persembahen khusus man Dibata enggo isehken. Penekanenna arah aturen neheken persembahen e eme gelah bangsa Israel nehken persembahen khusus ertina secara khusus isikapken ras ipersembahken man Dibata berarti yang terbaik. Kata “sipemena” si itekanken ibas aturen nehken persembahen khusus e ngingetken adi roti kin e, maka roti sipemena iserapken ras ipersembahken man Dibata, berarti man Dibata lebe ope man banta ras sipan.
Bagem ibas Ulangen 26:10 ilakoken bangsa Israel aturen e, ije ikataken “emaka genduari kubaba man Tuhan, bagin si pemena ibas ulih juma si enggo iberekenNa man bangku”… Enda me persembahen kerja rani eme persembahen khusus man Tuhan berarti simehulina ikhususken man Tuhan.
Payo kita jemaat GBKP Tiban enda labo kerina si erjuma, amin gia bage pemaknanna kerna pendahinta e apakah erjuma, erbinaga, PNS, karyawan, TNI/Polri, rsd, ulih pendahinta e tek kita kerina e erkiteken pemasu-masun Dibata. Adi bage tentu ibas kerja rani enda tuhu-tuhu meriah ukurta ncidahken bukti kepatuhenta ngelakoken perintah Dibata ras sekaligus pengakunta maka kerina si lit ibas kita sialoken ibas Dibata nari.
Perpulungen sinikelengi Tuhan, alu bage
dage, mari sue ras kata Dibata Minggu enda:
1) Siteladani kai si enggo ilakoken kalak sierkiniteken ibas
pustaka sibadia maka la ia biar-biaren nehken persembahen man Dibata, sabab
salah sada indicator kepatuhen ras penggejapen maka kerina silit ibas kita
terlebih keselamaten sialoken ibas Dibata kap.
2) Sipersembahken si terbaik man Tuhan sue ras tema ibas
Minggu Kerja Rani sinilakoken kita eme Persembahen khusus man Tuhan.
3) Erpalasken penggogen Roma 12:1-2 I kaitken ras tema
persembahen khusus man Dibata berarti pe mpersembahken kegeluhenta e secara
total man Dibata, ertina kai pe sinilakoken kita, silakoken guna kemulian
Dibata. Sabab rimbangken pengorbanen Dibata ibas Yesus Kristus si enggo mate I
kayu persilang guna nebusi kita ibas kematen erkiteken kuasa dosa maka arusna
kerina kita lanai nggeluh guna dirinta tapi guna Dibata bagi sitersurat ibas
Roma 14:7-8.
Selamat man banta kerina si enggo ikut muat bagin ibas kerja rani enda, baik si hadir I gereja bagepe irumah-rumah. Dibata simasu-masu kita kerina. Amin
Tiban, 20 September 2020
0 komentar:
Post a Comment