MINGGU GUNA NGERGAKEN HAM
Invovatio:
Cilaka me kam, o kam si nalihken kebujuren si pentar jadi
nggeduk, dingen ndampesken kebenaren ku taneh (Amos 5:7)
Ogen: Esekiel 18:7-9; Khotbah: Yohanes 8:1-11
Tema: Bahanlah si ngena
ate Dibata
Renungen:
Perpulungen sinikelengi Tuhan, mbaru-mbaru enda ibas sidang PBB sinilakoken tgl. 22-29 September 2020 lit si menarik eme labo saja erkiteken Peresiden Joko Widodo ndatken kehamaten nehken pidatona, tapi pe uga Silvany Austin Pasaribu diplomat muda Indonesia alu tegas ras lugas nehken hak jawabna sehubungen isu pelanggaren HAM Papua Barat si isehken utusen negara Vanuatu PM Bob Loughman ku bas sidang e. Kepeken tiap tahun mulai 2016 utusen Vanwatu enda la erngadi ngadi maba isu HAM Papua enda. Hal simenarik kai si isehken utusen Indonesia e eme kepeken Vanuatu sendiri lenga pernah menandatangani ras mengesahken konvesi si menentang penyiksan ras kekejamen sidebanna ibas perjanjin ntah hukumen si bersifat merendahken martabat sehubungen ras tanggungjawab hak asasi manusia negara enda, emaka seterusna utusen Indonesia e menghimbau gelah ope ncakapken negara kalak sehubungen ras HAM, idungima lebe tanggungjawab HAM nandangi rakyatna sendiri bage pe dunia. Alu kata sideban arah kai si ikataken utusen Indonesia enda eme pekena lebe dirindu, maka kalak sideban I kritikndu ntah isurangindu. Adi terdauhen si cakapken engkai maka bage kal semangatna negara Vanwatu enda mpersoalken pelanggaren HAM I Papua barat, maka banci mbue jabana, banci memang erkiteken empati tapi banci ka erkiteken lit ije kepentingen ntah pe maksud-maksud tertentu. Bagi istilah megati si begi, tidak ada makan siang gratis.
Enda iangkatken kami sendalanen ras bagin Kata Dibata si man oratenta, ija ituriken waktu Yesus ngajar, reh me guru-guru Undang-undang ras kalak Parisi maba sekalak diberu sitangkapna asum diberu e erlua-lua. Adi si oge ayat 6 maka motivasi kalak enda situhuna eme ncubai Yesus, gelah lit dalanna ngaduken Yesus. Penungkunen guru-guru Undang-undang ras kalak Parisi e tuhu-tuhu menjebak, nina “I bas Undang-undangta isuruh Musa maka diberu si bagenda arus ibenteri alu batu seh mate. Tapi kam, kuga nindu? Adi nina Yesus lakoken saja sue ras undang-undang Musa, maka Yesus I preming la lit kekelengenNa, la sue ras kai si iajarkenNa, rsd, adi sebalikna nina Yesus ula pada dalanken undang-undang e, berelah kesempaten man diberu e jera, maka ipreming kalak enda ka maka Yesus la ngergai Undang-Undang Musa. Jadi bagi judul film Dono, kasino Indro eme maju mundur kena.
Tapi Yesus la nggit terjebak ku bas upaya penggiringen ku dua pilihen e, tapi nina Yesus "Apai kam si langa pernah erdosa, ialah lebe mentersa. "Sederhana tempa kai si ikataken Yesus enda, tapi dampakna luar biasa. Guru-guru Undang-undang ras kalak Parisi si terkenal menganggap diri lebih benar asangken kalak sideban e lawesen sada-sadai mulai ibas simetuana. Engkai maka ikataken mulai ibas simetuana? Banci lit dua sebab, sipemena erkiteken adat, sipeduaken banci ka erkiteken penggejapen reh tuana jelma reh buena nge dosana ntah pe perbahanenna si la ngena ate Dibata, baik si isadari ntah pe lang. Kita pe singikuti kebaktin enda baik si igereja bagepe si irumah secara online lit nge kita si lenga pernah erbahan dosa? Kuakap reh gedangna umurta ntah reh buena nge dosanta ntah pe perhananen si la ngena ate Dibata enggo silakoken.
Janah uga sikap Yesus nandangi diberu e? Nina Yesus “Aku pe la ngukum kam. Mulihlah olanai bahan si la ngena ate Dibata”. Arah kata enda Yesus ngingetken diberu e maka perbahanen si langena ate Dibata situhuna arus iukum, sabab kata “Aku pe la ngukum kam” berarti lit hak Yesus ngukumsa, saja ngenca la ilakoken Yesus, iberekenna denga kesempaten man diberu e perobahi cara nggeluh eme gelah mulai paksa e ola nai ngelakoken si la ngena ate Dibata. Tentuna pesan enda pe berlaku ka man banta kerina.
Temata Minggu enda “BAHANLAH SI NGENA ATE DIBATA”. Tema enda eme pengajuk
gelah ibas ndalani kegeluhenta si lakoken kai singena ate Dibata. Kai kin
perbahanen singena ate Dibata? Tentuna mbue hal, saja erpalasken kata dibata
Minggu enda eme Minggu guna ngergaken HAM maka:
1) Lit
pemahamenta maka kerina jelma seri nge ergana ilebe-lebe Dibata ntah uga gia
sekali kecibalna, sabab Dibata kap sijadiken manusia. Arah pemahamen enda gelah
kita pe ngergai sesama manusia ntah kai gia bangsana, sukuna, bagepe status
sosialna. Selaku kalak Kristen, kualitas ngergai enda ncidahken pe kualitas
kinitekenta.
2) Kerina
manusia enggo erdosa emaka ula kita saling menghakimi tapi sebalikna siajar-ajaren,
saling mendoaken, jenari tetap bereken kesempaten guna robah adi lit temanta e
nggeluh denga ibas dalin si la payo. Inget, enda usur singetken kami, ope
tambat duana kambal-kambal nahe ta e lenga bo siteh uga kita ku pudi wari enda. Banci saja
temanta siakap lanai banci robah ntah pe jadi jelma e, robah ia ras jadi berkat
si luar biasa.
3) Payo ibas
kegeluhenta la terhindarken lit persaingen ibas mbue hal, saja ibas persaingen
enda bersainglah secara sehat labo sebalikna ndarami dalan uga ndabuhken ntah
pe meneken saingenta e alu erbage cara, bagi meritaken berita si la tuhu
(hoaks), menjebak, ngelakoken koinspirasi, rsd. Kerina e tutu-tuhu la ngena ate
Dibata (bandingken kai si isingetken ibas Invocatio, Amos 5:7).
4) Nggeluh dem keleng ate. Ertina mbelin kepatena nandangi kerina jelma. Endame palas ibas ngergai Hak Asasi Manusia. Bagi enggo icidahken Yesus arah kata bagepe sikap nandangi diberu si itangkap erlua-luaLa e, bagepe bagi isingetken ibas ogenta, Esekiel 18:7-9. Keleng ate erbahansa la nggit nipu ntah ngerampas, barang-barang jaminen kalak si rutang iulihkenna, sikelihen iberena man, kalak simanjang-anjang iuisina, kalak minjam duit la pernah ibahanna erbunga, la nggit erbahan jahat, adi lit kalak rubat ibelaskenna keputusen si bujur. Enda kerina tanda nggeluh dem keleng ate.
Perpulungen si nikelengi Tuhan, mari sipala-palai asa gegeh ras
kengasupenta sibahanlah singena ate Dibata ibas kegeluhen si ibereken Dibata
denga man banta. Amin.
0 komentar:
Post a Comment