PA MAMRE TANGGAL 18-24 OKTOBER 2020, TITUS 2:1-2

PA MAMRE 18-24 OKTOBER 2020

 

TITUS 2:1-2

NGASUP NGKUASAI DIRI

Pengajaren ibas bagin kata Dibata si jadi bahan PA-ta ialamatken secara langsung man Titus (1, 7, 8, 15), tapi arah surat enda pe Paulus  mereken pengajaren man kerina perpulungen I Kreta. Titus eme kalak Yunani si enggo tek man Tuhan Yesus. Ia sekalak pembantu ntah teman sekerja Paulus si nguda denga ibas pelayanen. Man Tutus enda isuruh Paulus gelah nehken pengajaren si sehat/pengajaren si payo. Janah ulih ntah dampak ajaren si payo/benar eme perbahanen si mehuli labo sebalikna. Salah sada alamat pengajaren e itujuken man dilaki si enggo metua ibas ayat 2 (Band. 1:9, 13; 2:1). Engkai maka pengajaren e secara khusus ialamatken man dilaki si enggo metua? Tentu lit alasenna. Sipemena:  secara actual  ntah potensial kalak si enggo metua levelna eme pengajar, emaka kegeluhenna arus sesuai ras levelna e. Sipeduaken eme jadi teladan. Kegeluhen dilaki si enggo metua arusna jadi usihen man kalak si lebih muda labo sebalikna. Nginget uga pentingna posisi sekalak dilaki si enggo metua itengah-tengah masyarakat maka Paulus mpersingeti Titus gelah ngajarken dilaki si enggo metua e, gelah kai? Gelah jore ukurna, mehuli lagu langkahna, ngasup ngkuasai diri. Sehat kinitekenna, erkeleng ate dingen megenggeng.

Tentuna labo man dilaki si enggo metua saja gelah iajarken amin gia ijenda itujuken man dilaki si enggo metua, tapi pe ngajarken anak perana gelah ngasup ngkuasai diri ibas ayat 6. Saja ibas PA Mamreta enda persinget e ntah ajaren e itujuken man mamre kerina baik si enggo metua bagepe si nguda. Sabab Mamre eme kepala itengah-tengah jabu, jenari salah sada fungsina pe eme imam itengah jabu. Emaka nginget posisi mamre itengah jabu tuhu penting, maka man kerina mamre arusna:

1)      Memahami pengajaren si sehat ntah payo. Kai kin pengajaren sipayo? Erpalasken ayat 12 eme ajaren si nadingken kegeluhen si la ngena ate Dibata ras sura-sura doni, bujur dingen nembah Dibata ibas kegeluhen I doni enda.

2)      Sue ras temah PA ibas berngi enda eme ngasup engkuasai diri. Engkuasai diri eme salah sada buah roh ibas Galatia 5:23.

Alu bage dage mamre ngasup ndalanken fungsina alu mehuli she maka teridah ulihna ija anak jabu terkepkep, jenari nggeluh erkemalangen man Dibata.

Payo ibas dalanken fungsi e labo nukah sabab ije mbue tantangen, mbue godan emaka tema PA Mamre berngi enda eme “Ngasup ngkuasai diri” jadi kata kunci penting man banta. Arah tema enda  ngingetken gelah mamre ula ndabuh erkiteken tantangen ntah godan e.

Kai kin tantangen ntah godan ibas jamanta genduari? Ngerana kerna tantangen ibas jaman genduari tentu mbue baik secara internal eme ibas diri nari bagepe secara eksternal ntah ibas darat diri nari.

1.      Internal eme la akapna meherga keberadanna selaku mamre ija fungsina tuhu-tuhu penting itengah-tengah jabu, labo saja soal cari nafkah tapi pe jadi teladan ras imam.

2.      Eksternal. 

a)     Ibas kemajuan jaman genduari terlebih pe ibas teknologi informasi si luar biasa majuna ija sada sisi mbue kal dampar positifna tapi sisi sideban mbue ka dampar negatifna, adi la bijak makekenca banci kita ndabuh. Misalna godaan pertemanen baik sejenis bagepe la sejenis arah erbage layanen medsos. Kuakap kerina nge kita meteh erkiteken la bijak makeken medsos si lit erbahansa mbue jabu jadi berantaken. Awalna hanya sekedar sapa kedungenna enggo berkomunikasi lewat DM. Jenari HP pe enggo pake password ntah pola, HP la banci sirang ras dirina, ras sidebanna.

b)      Lingkungen si lit ingan erjudi enda pe tantangen si cukup mberat sabab erjudi end ape megegeh kal daya tarikna.

c)      Lingkungen si nukah ndatsa obat-obat terlarang, rsd.

d)   Lenga ka tantangen gelah sukses, gelah bayak ntah gelah mbue dat sen, mbue godan kerna si e, sabab lit kecendrungen jelma atena la latih tapi mbue dat sen.

e)      Banci sitambahi tole tantangen ntah godan kai saja.

Genduari uga nge carana segelah mamre menang ibas tantangen ntah godan e nari? Ntah pe uga maka kita ngasup ngkuasai dirinta? Sipasti adi kita mengandalken gegeh ras kengasupenta pasti kita gagal, tapi sebalikna adi kita nggeluh ibas kebenaren kata Dibata pasti megegeh kita. Si inget uga Yesus menang ngalaken percoban ibas si iblis nari kenca la man 40 wari 40 berngi, waktu icobai I gurun pasir? Labo iandalkenna kuasaNa tapi kata Dibata. Emaka tutuslah kita ngoge kata Dibata ras ertoto.  Pasti kita ngasup ngkuasai dirinta. Tambah sie si inget ka ise kita. Kita eme anak-anak Tuhan, kita eme Mamre, kita kalak meherga ibas Tuhan. Alu si inget ise kita, tentu e banci mpegegehi kita ngasup engkuasai dirinta. Tambah si e perlu ka si evaluasi dirinta, ibas kai nge si jadi kelemahenta, adi enggo sieteh coba e secara khusus terus itotoken, pindo gegeh man Dibata segelah banci kita menang ibas kelemahen e nari. 

Pdt. Sabar S. Brahmana

Artikel lain yang terkait: