Khotbah - Renungan Kebaktian Minggu Tanggal 25 Oktober 2020, Perbahanen Rasul 15:30-35

KHOTBAH MINGGU TGL. 25 OKTOBER 2020

MINGGU ZENDING

Invocatio :          

Tapi nina Jesus man bana, "Berita Si Meriah kerna Kinirajan Dibata arus Kupeseh ku kuta-kuta si deban, sabap guna ngelakoken si e me kap Aku isuruh Dibata (Lukas 4:43)

Ogen: Yeremia 2:1-3; Khotbah    : Perbahanen Rasul 15:30-35

Tema:  

Ngajar Dingen Meritaken Kata Tuhan

 

 Mejuah-juah, shalom, salam sehat, Tuhan Yesus tetap simasu-masu kita kerina.

Perpulungen sinikelengi Tuhan, ibas jaman genduari upaya meritaken berita simeriah enggo reh gampangna. Sabab meritaken berita simeriah banci isehkeb arah erbage cara, salah sada eme arah teknologi. Kata Dibata banci isehken ibas situasi siugapa pe, arus informasi e la tertebeng. Adi bagelah ate banci kerina kita nehken berita simeriah arah medsos si lit. Emaka ibas jaman genduari sepanjang lit signal banci siikuti arus informasi, perkembangen ras kejadin-kejadin ibas doni enda. Saja ngenca apakah kemajun e iikuti semangat reh majuna ka ibas kalak Kristen ibas nehken tanggungjawabna selaku kalak si rutang bagi nina Paulus guna nehken berita simeriah e?.  Masing-masing kita banci mengevaluasisa, mulai dirinta nari bagepe secara gereja selaku lembaga. Janah dahin si la kalah pentingna jaman genduari eme bagi temata Minggu enda “NGAJAR DINGEN MERITAKEN KATA TUHAN”. Sabab ngerana kerna penggenapen Amanat Agung Matius 28:19-20, lit 4 hal arusna ilakoken eme:

1.      Meritaken Injil Kerajan Dibata man kalak sideban gelah tek man Yesus Kristus (Markus 16:15).

2.      Meneguhken. Eme nempati kalak si mbaru tek gelah bertumbuh ibas Kristus (Kolose 2:6-7)

3.      Melengkapi. Eme melatih perpulungen si sangana bertumbuh e ku bas visi ras cara pelipatgandan kegeluhenna ku bas kegeluhen kalak sideban (Efesus 4:11-12)

4.      Mengutus. Eme kenca pelatihen seterusna pengutusen (Kolose 1:28-29)

Arah si e jelas maka kenca ilakoken sidang I Yerusalem eme ncakapken persoalen siterjadi  I Antiokia kerna perbedan pendapat antara Paulus ras piga-piga kalak si enggo tek man Yesus si reh I Judea nari kerna keselamaten, ija kalak si reh I Judea e ngajarken maka labo banci terkelin adi la isunatken bagi iaturken undang-undang Musa, tapi menurut Paulus ras Barnabas sebalikna kalak terkelin labo erdandanken ndalanken undang-undang tapi perban ia tek man Yesus Kritus.  Kenca enggo lit keputusen ibas sidang e eme sue bagi pemahamen Paulus kerna keselamaten e, maka iutus me  Yudas si I gelari Barsabas ras Silas, duana kalak enda nabi. Kalak enda iutus perpulungen Jerusalem mendampingi mulihi Paulus ras Barnabas ku Antiokia. Guna kai? Meneguhken (ayat 32) tentuna sekaligus Ngajari ras meritaken kata Tuhan, ertina gelah reh mengertina perpulungen Antiokia kerna kata Dibata sue ras ajaren Yesus. Banci pe I kataken ngajari ras meritaken kata Tuhan enda eme proses pemuridan gelah kalak si enggo tek e banci ka ngikuti teladan ras perintah Yesus eme lako meritaken berita keselamaten man kerina manusia.

Perpulungen sinikelengi Tuhan, lit iklan singatakensa bagependa: Jangan ngaku ke Medan kalau belum ke durian ucok. Sendalanen ras iklan e banci ka si ban: jangan ngaku Kristen kalau tidak memberitakan Injil.  Ibas cakap karona: Ula ngaku Kristen adi kegeluhenta labo meritaken berita simeriah. Khususna sue ras Minggu Zending enda teladan ras perintah Yesus man banta eme bagi isingetken ibas Lukas 4:43 invocatiota singataken “Tapi nina Jesus man bana, "Berita Si Meriah kerna Kinirajan Dibata arus Kupeseh ku kuta-kuta si deban, sabap guna ngelakoken si e me kap Aku isuruh Dibata."   Arah ayat enda ngingetken kita guna nerusi pendahin Yesus e bagi isingetken pe ibas Markus 16:15 “jenari nina Jesus man ajar-ajarNa, "Laweslah, siari doni enda jenari beritaken Berita Si Meriah man kerina manusia”. Enda me tugasta. Enggo me sidalanken? Inget maka gereja si lanai ndalanken tugas meritaken berita simeriah berarti gereja si enggo mate suri. Enda ngatakensa maka tugas enda she kal pentingna guna si lakoken. Jeneri ibas meritaken berita simeriah e pe ncidahken ntah pe ngataken man doni enda kerna keleng ate Dibata bagi isingetken ibas Ogen Yeremia 2:1-3.

Uga carana meritaken berita simeriah e. Tentu banci erbage cara:

1.  Bagi ndai enggo isingetken ibas jaman teknologi informasi enda. Banci kita meritaken berita simeriah e arah medsos, bagepe ibas ngajarisa. Terlebih ibas jaman pandemic covid 19 enda jadi peluang mbelin guna er-PI arah medsos, secara online,  bagepe upaya meneguhken arah pengajaren si benar, sekaligus pe melengkapi ras memotivasi gelah kerina kita bagi penggejapen Paulus merasa berhutang guna er-PI.

2.    Erkiteken la lit waktu ntah pe banci ka erkiteken keterbatasen kengasupenta erPI sementara cukup buatenta lit, banci ka kita jadi donator ngelitken ras ngutus tenaga PI e.

3.   Secara organisasi banci ka gereja erbahan kotak persembahen guna Pos PI, gelah alu bage secara Runggun banci ka mengutus tenaga PI ntah detaser ku ingan-ingan simembutuhken.

4.   Arah kesaksin nggeluh eme tetap konsisten ncidahken sikap geluhta maka kita kalak si enggo tek man Yesus Kristus nandangi kerina kalak si lit isekelewetta, misalna man pembantuta adi lit, karyawanta adi kita pengusaha, rsd. Ibas si enda penting. Sabab lit kubaca sada kesaksin sekalak ratu Kristen, tading i dataran tinggi Nairobi, Kenya. Ratu enda ngangkat sekalak anak perana jadi pelayan ntah pembantu I rumahna. Wari lepas wari tanpa isedari ratu enda, anak perana e mengamati gerak-gerikna selaku kalak Kristen. Emaka kenca 3 bulan, anak perana e mindo ngadi erdahin ras ratu e, atena pindah erdahin ku sekalak Syekh deher ras rumah ratu e.

 

Kepeken anak perana enda erdahin jadi pembantu I rumah ratu e labo hanya soa gaji, tapi enggo irencanakenna erhahin hanya 3 bulan ije, jenari erdahin ka 3 bulan I rumah Syekh, kenca si e me iputuskenna jadi kalak Kristen ntah muslim.

 

Tentuna kenca meteh sie, erkadiola kal ratu nginget perbahan selama 3 bulan e, ija megati ia merawa-rawa alu kasar, memandang rendah ras mbue denga perbahanen si la ncidahken sifat Kristen. Emaka lanai lit kata belas-belas ratu enda selain alu sora erkadiola nina “engkai maka tantang kam erdahin la ikatakenndu sura-surandu e”?

 

Perpulungen sinikelengi Tuhan, kesaksin enda ngingetken kita gelah tetap sisedari maka kita idilo arah kerina dampar geluhta guna meritaken berita simeriah baik secara Proklamasi ertina meritaken berita simeriah man kalak si lenga tek alu mereken penjelasen baik secara langsung jumpa fisik bagepe non fisik misalna arah medsos bagi enggo ndai isingetken bagepe secara Afirmasi eme er-PI arah sikap geluhta si jadi teladan man kalak si lit isekelewetta. Selamat er-PI, Selamat Minggu Zending man banta kerina. Amin.

 

Pdt. Sabar S. Brahmana, S.Th.,MA

Artikel lain yang terkait: