KHOTBAH
MINGGU, 1 NOPEMBER 2020
MINGGU
REFORMASI GEREJA
Invocatio:
Sendah Kubereken man bandu kuasa
nandangi bangsa-bangsa ras kerajan-kerajan lako mbungkarken dingen
ngeruntuhken, lako ngkernepken dingen ngeradasken, lako manteki dingen nuan
(Jeremia 1:10).
Ogen: 1 Korinti 3:10-17; Khotbah: 2
Raja-raja 23:1-14
Tema: Reformasi Spiritualitas.
Mejuah-juah man banta kerina, shalom, salam sehat, Tuhan Yesus tetap simasu-masu kita kerina.
Perpulungen sinikelengi Tuhan, ngerana kerna reformasi tentuna siinget jaman Marten Luther si ngelakoken reformasi gereja tahun 1517. Alu 95 dalil si itempelken Marten Luther I pintun gereja Wittenberg, Jerman erbahansa adi istilah genduari eme viral/heboh ibas paksa sie. Pembaharuan enda erbahansa mbue perdebaten, diskusi bahken gereja paksa si e erpengakap maka Marten Luther enggo metunggung ibunuh, emaka ndarat me fatwa maka dareh Marten Luther halal. Bagem kepe ngerana kerna reformasi, ngerana kerna upaya-upaya pembaharuan guna reh sikapna mbue kepe tantangenna bagepe pengorbanen ibas memperjuang kenca. Katakenlah upaya presiden genduari, gelah bangsata si mbelin enda reh sikapna ternyata labo kepe nukah, mbue tantangen bahken pengorbanen gelah kai si iperjuangken e terwujud. Emaka pemimpin si kurang kinipangenna labo ngasup mbue erbahan perubahen ntah pe reformasi. Istilahna kin, siap la popular bahken siap meling ibas erbahan perubahen-perubahen ku arah simehuli.
Bagem bagin kata Dibata si jadi khotbah minggu enda nuriken uga sekalak raja si naik tahta ibas umur si nguda denga tapi kinipangenna mereformasi keagamaan paksa e tuhu-tuhu hal siluar biasa. Bayangken saja paksa e penyembahen man Dewa Baal, Dewi Asera ras bintang-bintang enggo jadi penembahen nasional, tapi alu ndatken momentum si tepat (ayat 1-3) Josia erbahan reformasi keagamaan secara total I bas kerina wilayah Juda. Adi sioge mulai ayat 4-14 ituriken uga Josia merintahken mbersihken ras engkernepken baik barang-barang, batar-batar ingan persembahen, asrama ras kerina si berhubungen ras penyembahen man Baal, Dewi Asera ras bintant-bintang e. Bagepe ipengadina kerina imam-imam si enggo itangkuhken raja Juda sebelumna. Endame reformasi si luar biasa si pernah terjadi ibas kegeluhen bangsa Israel. Tentuna reformasi e bagi biasana labo la lit tantangen terlebih siman reformasin e menyangkut agama ras agama e enggo lit legalitasna ibas raja Juda sebelumna. Saja ngenca tantangen e la mengendorken semangat raja Josia bage pe pengikutna si setuju ras ia, maka penyembahen situhu-tuhu eme man Dibata ngeca.
Temata ibas Minggu enda “Reformasi Spiritualitas” berarti pembaharuan kerohanian-ta ntah pe sue ras kata spiritualitas ibas kata spirit=semangat, jiwa, roh, rohani ras keagaman. Arah tema enda mpersingeti gereja secara lembaga bagepe secara ngawan ni perpulungen, uga kehadirenta itengah-tengah doni enda, tetap denga nge sipahami maka kita enda utusen Dibata lako menghadirken Kerajan Dibata? Apakah nilai spiritualitasta tetap teridah reh terangna antara lain kinipangen guna mewartaken kebenaren, kesedian guna mpelimbarui diri, tetap jadi terang ras sira itengah-tengah doni enda, terlebih ibas situasi pandemic genduari apakah tetap tutus ersembah man Dibata amin gia ilakoken irumah-rumahta secara keluarga? Ras mbue denga banci itambahi nilai spiritualitas si arusna teridah ibas kegeluhenta selaku gereja, selaku anak-anak Tuhan. Sipasti menjiwai spiritualitas labo sekedar agama guna sermonial saja. Adi terjeng ije saja, kuakap keagaman kalak Indonesia enda luar biasa semarak sermonialna, kai ka paksa perayan agama, banci ikataken sangat luar biasa rikut teridah ras symbol-simbol keagaman e. Khususna kalak Kristen, la pe ia nterem banci bangunna gereja si megah. Bagepe ibas perayan natal tahun enda, amin gia ibas masa pandemic la ngkurangi semangat merayakenca, apakah serara live treaming ntah pe bagi biasana hadir ibas gereja ntah ibas sada ingan. Tapi lit nge korelasina ras kinata kegeluhen bermasyarakat si cinta dame, ramah, rukun, bujur, adil, rajin, ulet, menghormati kalak sideban, rsd. Sebab ngerana kerna menjiwai spiritualitas berarti teridah kehadiren Dibata e arah kerina aktivitasta, sebab spiritualitas ningen e harusna jadi acuan ibas kerina pengkebetta. Janah kerina pengkebetta e ibas wari pendungi pagi arus sipertanggungjawabken bagi si isingetken ibas pengogenta, 1 Korinti 3:10-17. Ijendame relevansina reformasi ningen e, ertina gereja arus terus menerus membaharui dirina segelah spiritualitasna la jadi redup tapi sebalikna ibas krina situasi ras zaman kehadirenna tuhu-tuhu jadi pasu-pasu, mabai kalak nandai Dibata si tuhu-tuhu, Dibata ibas Yesus Kristus si jadi Juruslamat e.
Selamat nggit ras terus berjuang guna mereformasi spiritualitasta gelah tetap ibas koridor singena ate Dibata. Amin.
Pdt. Sabar S. Brahmana
0 komentar:
Post a Comment