Khotbah - Renungan Natal Tgl. 25 Desember 2020, Nats: Heber/Ibrani 1:1-4

KHOTBAH NATAL 25 DESEMBER 2020

 

Invocatio   :

”Rempet teridah nterem malekat Surga tedis ras malekat si ndai dingen rende muji Dibata, Terpujilah Dibata i bas Surga si meganjangna. Janah dame i doni man manusia si ngena ateNa (Lukas 2:13-14)

O g e n: Mazmur 98:1-9; Khotbah: Heber 1:1-4

Thema:

ANAK DIBATA SI MADA KERINA SI NASA LIT

 

Mejuah-juah, shalom, salem sehat, Tuhan Yesus simasu-masu kita kerina.

Perpulungen sinikelengi Tuhan, sikataken bujur man Dibata sabab ibas tahun 2020 enda pe banci ka kita mperingeti Natal eme wari ketubuhen Tuhanta Yesus Kristus. Amin gia carata mperingetisa agak berbeda ibanding tahun sebelumna, ija guna banci kebaktin tanggal 25 Desember 2020 sendah arus lebe mendaftarken diri, apakah ngikuti kebaktin si jam 08.00 ntah kebaktin si jam 10.00. Jenari e pe ibatasi ka rikutken kapasitas gerejata enda sue ras aturen protocol kesehaten. Enda me salah sada dampak pandemic covid 19. Emaka teruslah kita ertoto gelah pandemic enda pedas erleka ibas kegeluhenta nari, paling tidak virus enda la nari jadi kebiaren alu kerina masyarakat enggo ndatken vaksinasi.

Tapi sisi sideban hal simenarik idah kami eme uga semangatta perpulungen banci hadir igereja lako ras-ras kebaktin Natal enda. Tangtangna ibatasi baik jam 08.00 bagepe jam 10.00 hanya lima puluh kalak, pendaftaren ibenaken tgl. 21 Desember 2020, janah ibas jam 19.58 kebaktin si jam 08.00 enggo 50 kalak, tapi kebaktin si jam 10.00 enggo mendaftar she 61 kalak ibas jam 20.28, berarti enggo lebih asa si itetapken. Janah ibas tanggal 23 Desember 2020 kenca enggo itata ulang kursi rikut protocol kesehaten isepakati baik jam 08.00 ras jam 10.00 masing-masing 70 kalak. Intina lit mbelin animo ngawan perpulungen gelah ia pe banci ikut kebaktin Natal I Gereja.

Enda me hal baru si nialami kita ibas pandemic covid 19 enda. Saja ngenca ateku nuriken sienda lako ngingetken kita, sipemena: jemaat singikuti kebaktin ibas mperingeti Natal enda payo ibatasi erkiteken protocol kesehaten rikut kapasitas gerejata enda. Tapi meriah ukurta sabab nina Yesus Kristus si iperingeti kita ketubuhenna sendah maka I rumah Bapa I surge mbas nge, kerina kita siat nge ije. Jadi baik sihadir I gereja enda bagepe si lang erkiteken terlambat mendaftar ntah memang enggo iputuskenna ngikuti kebaktin e secara live streaming, sipenting kal man banta eme Rumah Bapa I Surga e la ibatasi jumlahna, kerina kita la erdobahen siat nge ije, janah eme tujunta pe selaku kita kalak Kristen eme banci kita ras-ras I rumah Bapa I surga. Sipeduaken, sipentingna ibas mperingeti Natal enda labo soal formalitas, tapi apakah kita tuhu-tuhu focus natap kempak perbahanen Dibata arah natal e ntah lang. Perbahanen Dibata arah Natal arusna enggo jelas man banta eme Yesus Kristus si enggo reh ku doni enda lako jadi penampat singeganjangna man manusia. Nderbih ibas kebaktin malam Natal enggo ijelasken kerna erti penampat simeganjangna eme Yesus Kristus ngenca ngasup erbahansa manusia terkelin arah tek man baNa. Adi keselamaten pe iberekenNa, kai ka hal-hal sideban si iperluken kita ibas   doni enda, tentu kitik akap Dibata.

Enda me salah sada si itekanken ibas nats khotbahta, Heber 1:1-4. Ija penulis Heber enda menekanken maka Yesus Kristus si iperingeti kita ketubuhenNa e eme Simada kerina sinasa lit (ayat 2). Jadi ibas mperingeti Natal labo saja terjeng pemahamen meriah-siah desken tubuh sekalak anak ibas jabu, bagepe labo sekedar perayaan wari keagaman alu erbage-bage kreasi ras atraksi, tapi lebih memfokusken (1) rasa syukur erkiteken Yesus Kristus Juruslamat si ipadanken Dibata e enggo reh ku doni enda, (2) reh tetapna ukurta ndalani kegeluhen enda amin gia sangana pandemic covid 19. Engkai? Sabab Tuhanta Yesus Kristus e eme Simada kerina sinasa lit (ayat 2), I sorga Ia kundul arah kemuhen Dibata si Mada Kuasa simeganjangna (ayat 3), janah ndauh ganjangen asangken malekat-malekat (ayat 4). Enda tole mpetandaken ise kin Tuhanta Yesus si iperingeti kita ketubuhenna wari enda. Janah tentu hal enda erbahansa reh tetapna ukurta ndalani kegeluhenta amin gia genduari masa pandemic covid 19, tek kita Tuhanta e ndauh beliden, ndauh erkuasan asangken kuasa kai pe silit ibas doni enda termasuk kuasa virus corona. Sipenting man banta eme sidalani kegeluhen enda labo sekedar focus beragama, sabab adi bage kita hanya terjebak kubas kegiaten rutinitas ras formalitas keagaman, tambah si e mis pe terjadi gap nandangi kalak si la seri agamanta, agama banci erbahana lanai siperiahen, la nai sikeleng-kelengen sapih-sapih manusia padahal kita tinepa si seri selaku manusia, terlebih banci ka saling membunuh, tapi arusna sidalani kegeluhenta selaku kalak erkiniteken man Yesus Kristus. Sabab kalak si tuhu-tuhu erkiniteken man Yesus Kristus teridah ibas kerina keadaan tetap jadi pasu-pasu. Labo saja arah nampati kalak secara materi, tapi pe arah kesaksin geluhna selaku kalak si tetap teridah optimis, tetap semangat, tetap lit keriahen/sukacita, la jungut-jungut erkiteken keadan susah ntah keadan la bagi ukur, berpikir positif alu la pebelin-belin perbadan bagepe salah kalak, kekurangen bahken kebodohen kalak sabab adi lenga tambat kambal-kambal nahata e lenga bo siteh uga kedungenna masa depan setiap jelma, sabab arus si inget Natal ningen e berarti kepedulian Dibata nandangi manusia ibas kerina kekurangen, kebodohen ras keberdosanna.

 

Selamat wari Natal berarti selamat tetap optimis ras nggeluh jadi pasu-pasu. Emaka isehken kami man banta kerina baik sikebaktin I gereja enda bagepe si I rumah secara live streaming, Selamat wari Natal. Amin.

Pdt. S. Brahmana

Artikel lain yang terkait: